ദോഹ: എൻട്രി വിസകൾക്ക് താൽക്കാലികമായി അനുവദിച്ചിരുന്ന കാലാവധി നീട്ടൽ ഉൾപ്പെടെയുള്ള ഇളവുകൾ അവസാനിപ്പിച്ചതായി ഖത്തർ ആഭ്യന്തര മന്ത്രാലയം അറിയിച്ചു. ജൂൺ 7 മുതൽ പുതിയ തീരുമാനം പ്രാബല്യത്തിൽ വരും. ഇതോടെ രാജ്യത്തെ സന്ദർശക വിസകൾക്കും മറ്റ് എൻട്രി വിസകൾക്കും മുമ്പ് നിലവിലുണ്ടായിരുന്ന നിയമങ്ങളും നടപടിക്രമങ്ങളും വീണ്ടും ബാധകമാകും.
പശ്ചിമേഷ്യൻ മേഖലയിലെ സംഘർഷ സാഹചര്യങ്ങൾ പരിഗണിച്ചാണ് ഖത്തർ സർക്കാർ എൻട്രി വിസകൾക്ക് പ്രത്യേക ഇളവുകൾ പ്രഖ്യാപിച്ചിരുന്നത്. മാർച്ച് 3 മുതലാണ് വിസാ കാലാവധി താൽക്കാലികമായി നീട്ടിക്കൊടുക്കുന്ന നടപടി ആരംഭിച്ചത്. യാത്രാ ബുദ്ധിമുട്ടുകളും മേഖലയിൽ നിലനിന്നിരുന്ന അനിശ്ചിതത്വവും കണക്കിലെടുത്തായിരുന്നു ഈ തീരുമാനം.
ഇപ്പോൾ സാഹചര്യം പുനഃപരിശോധിച്ച ശേഷമാണ് ഈ പ്രത്യേക ആനുകൂല്യങ്ങൾ അവസാനിപ്പിക്കാൻ മന്ത്രാലയം തീരുമാനിച്ചിരിക്കുന്നത്. രാജ്യത്ത് കാലാവധി കഴിഞ്ഞതോ കാലാവധി അവസാനിക്കാൻ പോകുന്നതോ ആയ എല്ലാ വിഭാഗം എൻട്രി വിസകൾക്കും അനുവദിച്ചിരുന്ന ഇളവുകൾ നിർത്തലാക്കുമെന്നും അധികൃതർ വ്യക്തമാക്കി.
ജൂൺ 7 മുതൽ സന്ദർശക വിസകളുടെ കാലാവധി, പുതുക്കൽ നടപടിക്രമങ്ങൾ, അനുബന്ധ ഫീസുകൾ എന്നിവ മുമ്പുണ്ടായിരുന്ന നിയമങ്ങൾ പ്രകാരം തന്നെ തുടരും. അതിനാൽ രാജ്യത്തുള്ള സന്ദർശകരും താമസക്കാരും തങ്ങളുടെ വിസാ സ്റ്റാറ്റസ് പരിശോധിച്ച് ആവശ്യമായ നടപടികൾ സമയബന്ധിതമായി സ്വീകരിക്കണമെന്ന് മന്ത്രാലയം നിർദേശിച്ചു.
നിയമലംഘനങ്ങളും പിഴകളും ഒഴിവാക്കുന്നതിനായി വിസ പുതുക്കേണ്ടവർ ഉടൻ പുതുക്കണമെന്നും അധികൃതർ ഓർമ്മിപ്പിച്ചു. രാജ്യത്തെ കുടിയേറ്റ നിയമങ്ങൾ കർശനമായി പാലിക്കേണ്ടതിന്റെ ആവശ്യകതയും ആഭ്യന്തര മന്ത്രാലയം വീണ്ടും വ്യക്തമാക്കി.
