ഷാർജ: അടിയന്തര സാഹചര്യങ്ങളിൽ ജീവൻ രക്ഷിക്കാൻ സഹായിക്കുന്ന ഹൃദയ-ശ്വാസകോശ പുനരുജ്ജീവന പ്രക്രിയയായ സി.പി.ആർ (Cardiopulmonary Resuscitation) പരിശീലന പരിപാടി ഷാർജ ഇന്ത്യൻ സ്കൂൾ, ജുവൈസയിൽ സംഘടിപ്പിച്ചു. സ്കൂളിലെ സോഷ്യൽ അവയർനെസ് ക്ലബ്ബിന്റെ നേതൃത്വത്തിൽ ദുബായ് ഹാർട്ട് സിറ്റിയുടെയും ദുബായ് ആരോഗ്യ വിഭാഗത്തിന്റെയും സഹകരണത്തോടെയാണ് പരിശീലനം നടന്നത്.
ഇന്നത്തെ കാലഘട്ടത്തിൽ ജീവൻ അപകടത്തിലാക്കുന്ന അടിയന്തര സാഹചര്യങ്ങൾ എവിടെയും എപ്പോൾ വേണമെങ്കിലും സംഭവിക്കാം. അത്തരം സാഹചര്യങ്ങളിൽ ഒരു ജീവൻ രക്ഷിക്കാൻ സഹായിക്കുന്ന അത്യന്താപേക്ഷിതമായ കഴിവാണ് സി പി ആർ നൽകുകയെന്നത്. അതിൻ്റെ പ്രാധാന്യത്തെക്കുറിച്ചുള്ള അവബോധം വളർത്തുന്നതിനും അധ്യാപകരെ ഈ ജീവൻ രക്ഷാ നൈപുണ്യത്തിൽ പരിശീലിപ്പിക്കുന്നതിനുമായിട്ടാണ് പരിശീലനം ഒരുക്കിയതെന്നു സ്കൂൾ പ്രിൻസിപ്പൽ വിജിമോൻ അയ്യപ്പൻ പറഞ്ഞു.
പരിശീലനത്തിൽ പങ്കെടുത്ത 200-ലധികം അധ്യാപകർ വിജയകരമായി പരിശീലനം പൂർത്തിയാക്കി സി.പി.ആർ സർട്ടിഫിക്കറ്റുകൾ കരസ്ഥമാക്കി. പരിശീലനത്തിന്റെ ഭാഗമായി ഹൃദയാഘാതം സംഭവിക്കുന്ന സാഹചര്യങ്ങളിൽ സ്വീകരിക്കേണ്ട അടിയന്തര നടപടികൾ, രോഗിക്ക് പ്രാഥമിക സഹായം നൽകുന്ന രീതികൾ, അടിയന്തര സേവനങ്ങളെ അറിയിക്കേണ്ട നടപടിക്രമങ്ങൾ എന്നിവയെക്കുറിച്ച് വിശദമായ പരിശീലനവും പ്രായോഗിക ക്ലാസുകളും നടന്നു.
വൈസ് പ്രിൻസിപ്പൽ രാജീവ് മാധവൻ, ഹെഡ്മിസ്ട്രസ് ദീപ്തി ടോംസി, സോഷ്യൽ അവയർനെസ് ക്ലബ് കോർഡിനേറ്റർ ഫെബിന റഷീദ് എന്നിവർ പരിപാടിക്ക് നേതൃത്വം നൽകി. പരിശീലനത്തിൽ പങ്കെടുത്ത അധ്യാപകർക്ക് ആവശ്യമായ മാർഗനിർദേശങ്ങളും നിർദേശങ്ങളും ഇവർ നൽകി.
അറിവും പ്രായോഗിക പരിശീലനവും ഒരുപോലെ ഉൾക്കൊള്ളിച്ച പരിപാടി അധ്യാപകർക്കിടയിൽ മികച്ച പ്രതികരണമാണ് നേടിയത്. അടിയന്തര സാഹചര്യങ്ങളിൽ ആത്മവിശ്വാസത്തോടെ ഇടപെടാനും ജീവൻ രക്ഷിക്കുന്ന നടപടികൾ സ്വീകരിക്കാനും ഈ പരിശീലനം സഹായകരമായതായി പങ്കെടുത്ത അധ്യാപകർ അഭിപ്രായപ്പെട്ടു.
