ദുബൈ: യു.എ.ഇയിലെ ഷാർജയിൽ നിന്ന് ഒമാനിലെ മസ്കത്തിലേക്കും സൊഹാറിലേക്കും സർവീസ് നടത്തുന്ന ഇന്റർസിറ്റി ബസുകൾക്ക് പുതിയ സമയക്രമം പ്രഖ്യാപിച്ചു. ഷാർജ റോഡ്സ് ആൻഡ് ട്രാൻസ്പോർട്ട് അതോറിറ്റി (എസ്.ആർ.ടി.എ)യാണ് റൂട്ട് 203-ന്റെ പുതുക്കിയ സർവീസ് സമയങ്ങൾ പുറത്തിറക്കിയത്.
ഷാർജയിലെ അൽ ജുബൈൽ ബസ് സ്റ്റേഷനിൽ നിന്നാണ് സർവീസ് ആരംഭിക്കുന്നത്. സന്ദർശകർക്കും സ്ഥിരതാമസക്കാർക്കും കൂടുതൽ സൗകര്യപ്രദമായ യാത്രാ ഓപ്ഷനുകൾ ഒരുക്കുക എന്ന ലക്ഷ്യത്തോടെയാണ് പുതിയ സമയക്രമം നടപ്പിലാക്കുന്നതെന്ന് അധികൃതർ അറിയിച്ചു. യു.എ.ഇയും ഒമാനും തമ്മിലുള്ള യാത്രാ ബന്ധം കൂടുതൽ ശക്തിപ്പെടുത്തുന്നതിനും യാത്രക്കാരുടെ ആവശ്യങ്ങൾ മികച്ച രീതിയിൽ നിറവേറ്റുന്നതിനുമാണ് നടപടി.
പുതുക്കിയ സമയക്രമമനുസരിച്ച് ഷാർജയിൽ നിന്ന് മസ്കത്തിലേക്ക് ദിവസേന മൂന്ന് സർവീസുകളാണ് ഉണ്ടായിരിക്കുക. രാവിലെ 6.30നും ഉച്ചയ്ക്ക് ശേഷം 3.30നും രാത്രി 8.30നും ബസുകൾ അൽ ജുബൈൽ ബസ് സ്റ്റേഷനിൽ നിന്ന് പുറപ്പെടും.
അതേസമയം, സൊഹാറിലെയും മസ്കത്തിലെയും യാത്രക്കാർക്ക് ഷാർജയിലേക്ക് മടങ്ങാൻ ദിവസേന മൂന്ന് സർവീസുകളും ലഭ്യമാകും. രാവിലെ 7 മണിക്കും ഉച്ചയ്ക്ക് 1.30നും വൈകുന്നേരം 3 മണിക്കും ബസുകൾ ഷാർജയിലേക്ക് സർവീസ് നടത്തും.
യാത്രക്കാർക്ക് കൂടുതൽ യാത്രാ സൗകര്യങ്ങളും സമയ തിരഞ്ഞെടുപ്പുകളും നൽകുന്നതിനൊപ്പം സുരക്ഷിതവും നിലവാരമുള്ളതുമായ യാത്ര ഉറപ്പാക്കുകയാണ് പുതിയ സമയക്രമത്തിന്റെ ലക്ഷ്യമെന്ന് എസ്.ആർ.ടി.എ വ്യക്തമാക്കി. യാത്രക്കാർ യാത്രകൾ ആസൂത്രണം ചെയ്യുന്നതിന് മുമ്പ് അതോറിറ്റിയുടെ ഔദ്യോഗിക പ്ലാറ്റ്ഫോമുകൾ വഴി ഏറ്റവും പുതിയ സർവീസ് വിവരങ്ങളും സമയക്രമവും പരിശോധിക്കണമെന്നും അധികൃതർ നിർദേശിച്ചു.
ഗൾഫ് രാജ്യങ്ങൾക്കിടയിലെ റോഡ് ഗതാഗത സേവനങ്ങൾക്ക് വർധിച്ചുവരുന്ന ആവശ്യകത കണക്കിലെടുത്ത് ഇത്തരത്തിലുള്ള സേവനങ്ങൾ യാത്രക്കാർക്ക് വലിയ ആശ്വാസമാകുമെന്നാണ് വിലയിരുത്തൽ.
