അൽ ദൈദ് തടാകത്തിന് മുകളിലൂടെയുള്ള 320 മീറ്റർ നീളമുള്ള പാലത്തിൽ നാല് ലിഫ്റ്റുകളും വ്യൂവിങ് ഏരിയകളും ഒരുങ്ങി
ഷാർജ, യുഎഇ — ഷാർജ സെൻട്രൽ റീജിയണിലെ ഗതാഗത സൗകര്യങ്ങൾ മെച്ചപ്പെടുത്തുന്നതിനായി നിർമിച്ച 320 മീറ്റർ നീളമുള്ള അൽ ദൈദ് പാലം നവംബർ 15-ന് ഗതാഗതത്തിനായി തുറന്നുകൊടുക്കും. പദ്ധതിയുടെ അവസാനഘട്ട മിനുക്കുപണികൾ പുരോഗമിക്കുകയാണെന്ന് അധികൃതർ അറിയിച്ചു.
ഷാർജ റോഡ്സ് ആൻഡ് ട്രാൻസ്‌പോർട്ട് അതോറിറ്റിയും (എസ്ആർടിഎ) ഷാർജ ഇനിഷ്യേറ്റീവ്സ് ഇംപ്ലിമെന്റേഷൻ അതോറിറ്റിയും (മുബാദറ) സംയുക്തമായാണ് പദ്ധതി പൂർത്തിയാക്കുന്നത്. അൽ ദൈദിലെ പ്രധാന റോഡുകളെ തമ്മിൽ ബന്ധിപ്പിച്ച് പ്രദേശത്തെ ഗതാഗതക്കുരുക്കിന് വലിയൊരളവിൽ പരിഹാരം കാണാൻ പുതിയ പാലം സഹായിക്കും.
ഷാർജ റേഡിയോ ആന്റ് ടെലിവിഷന്റെ ‘ഡയറക്ട് ലൈൻ’ പരിപാടിയിലൂടെയാണ് പാലത്തിന്റെ സവിശേഷതകളും രൂപകൽപ്പനയും സംബന്ധിച്ച വിവരങ്ങൾ പുറത്തുവിട്ടത്. താഴെയുള്ള അൽ ദൈദ് തടാകത്തിന്റെ ദൃശ്യങ്ങൾ ആസ്വദിക്കാൻ സാധിക്കുന്ന ബാൽക്കണികൾ, പ്രത്യേക വ്യൂവിങ് ഏരിയകൾ, നാല് ലിഫ്റ്റുകൾ എന്നിവ ഉൾപ്പെടുത്തിയാണ് പാലം സജ്ജമാക്കിയിരിക്കുന്നത്.
യുഎഇ സുപ്രീം കൗൺസിൽ അംഗവും ഷാർജ ഭരണാധികാരിയുമായ ശൈഖ് ഡോ. സുൽത്താൻ ബിൻ മുഹമ്മദ് അൽ ഖാസിമിയുടെ വികസന കാഴ്ചപ്പാടിന്റെ ഭാഗമായാണ് പദ്ധതി നടപ്പിലാക്കുന്നത്. എമിറേറ്റിലുടനീളം സുരക്ഷിതവും സുഗമവുമായ യാത്രാസൗകര്യങ്ങൾ ഒരുക്കുന്നതിനായി വിവിധ സർക്കാർ വകുപ്പുകളുമായി സഹകരിച്ച് റോഡ് വികസന പ്രവർത്തനങ്ങൾ തുടരുമെന്ന് റോഡ്സ് ആൻഡ് ട്രാൻസ്‌പോർട്ട് അതോറിറ്റി വ്യക്തമാക്കി.
