സെപ്റ്റംബർ 18 വരെ അഡ്നെക് സെന്ററിൽ നടക്കുന്ന മേള ഉദ്ഘാടനം ചെയ്ത് യുഎഇ ഉപപ്രധാനമന്ത്രി ശൈഖ് അബ്ദുല്ല ബിൻ സായിദ് അൽ നഹ്യാൻ
അബുദാബി, സെപ്റ്റംബർ 14, 2026 : യുഎഇ പ്രസിഡന്റ് ശൈഖ് മുഹമ്മദ് ബിൻ സായിദ് അൽ നഹ്യാന്റെ രക്ഷാകർതൃത്വത്തിൽ നടക്കുന്ന 35-ാമത് അബുദാബി അന്താരാഷ്ട്ര പുസ്തകോത്സവത്തിന് (ADIBF) തലസ്ഥാനത്ത് തുടക്കമായി. യുഎഇ ഉപപ്രധാനമന്ത്രിയും വിദേശകാര്യ മന്ത്രിയുമായ ശൈഖ് അബ്ദുല്ല ബിൻ സായിദ് അൽ നഹ്യാൻ അഡ്നെക് സെന്ററിൽ മേള ഔദ്യോഗികമായി ഉദ്ഘാടനം ചെയ്തു.
സെപ്റ്റംബർ 18 വരെ നീളുന്ന പുസ്തകോത്സവത്തിൽ 95 രാജ്യങ്ങളിൽ നിന്നുള്ള 1,200 പ്രസാധകരും സ്ഥാപനങ്ങളും പങ്കെടുക്കുന്നുണ്ട്. ‘ടേൺ ദി പേജ്, റീഡ് ദി വേൾഡ്’ എന്നതാണ് ഈ വർഷത്തെ പ്രമേയം. ഡിപ്പാർട്ട്മെന്റ് ഓഫ് കൾച്ചർ ആൻഡ് ടൂറിസം – അബുദാബിയുടെ (ഡിസിടി അബുദാബി) കീഴിലുള്ള അബുദാബി അറബിക് ലാംഗ്വേജ് സെന്ററാണ് (എഎൽസി) മേള സംഘടിപ്പിക്കുന്നത്.
ഉദ്ഘാടന ചടങ്ങിന് ശേഷം ശൈഖ് അബ്ദുല്ല വിവിധ അന്താരാഷ്ട്ര-ദേശീയ പവലിയനുകൾ സന്ദർശിച്ചു. ലൂവ്ര് അബുദാബി, അബുദാബി മ്യൂസിക് ആൻഡ് ആർട്സ് ഫൗണ്ടേഷൻ, ചൈനീസ് ദേശീയ പവലിയൻ, മനാസ്സ ഡിസ്ട്രിബ്യൂഷൻ എന്നിവയും ഇതിൽ ഉൾപ്പെടുന്നു. എഎൽസി എക്സിക്യൂട്ടീവ് ഡയറക്ടർ സഈദ് ഹംദാൻ അൽ തുനൈജി രചിച്ച ‘ദി യുഎഇ ഇൻ പിക്ചേഴ്സ്: റിഫ്ലക്ഷൻസ്’ എന്ന പുസ്തകവും സെന്ററിന്റെ ഡിജിറ്റൽ-ഓഡിയോ പദ്ധതികളും അദ്ദേഹം വിലയിരുത്തി.
യുഎഇയുടെ വികസനത്തിൽ നിർണായക പങ്കുവഹിച്ച പ്രതിഭകളെ ആദരിക്കുന്നതിനായി ഇത്തവണ തുടക്കം കുറിച്ച ‘എമിറാത്തി പയനിയേഴ്സ്’ പവലിയനും അദ്ദേഹം സന്ദർശിച്ചു. മുഹമ്മദ് ബിൻ റാഷിദ് അൽ മക്തൂം ലൈബ്രറി ഫൗണ്ടേഷൻ ചെയർമാൻ മുഹമ്മദ് അൽ മുർറാണ് ഈ വിഭാഗത്തിലെ ആദ്യ വ്യക്തിത്വം.
യുഎഇ ‘കുടുംബ വർഷം’ (ഇയർ ഓഫ് ഫാമിലി) ആചരിക്കുന്ന പശ്ചാത്തലത്തിൽ, കുടുംബങ്ങളെയും കുട്ടികളെയും വായനയിലേക്ക് ആകർഷിക്കുന്ന പ്രത്യേക ശിൽപ്പശാലകൾ മേളയിലുണ്ട്. സാഹിത്യം, ചിന്ത, വിദ്യാഭ്യാസം, വിവർത്തനം എന്നിവയെ അടിസ്ഥാനമാക്കി 1,500-ലധികം സാംസ്കാരിക പരിപാടികളാണ് ആറു ദിവസങ്ങളിലായി അരങ്ങേറുന്നത്. പ്രസാധന രംഗത്ത് കൃത്രിമ ബുദ്ധിയുടെ (AI) ഉപയോഗം, പകർപ്പവകാശ സംരക്ഷണം, വ്യാജ പതിപ്പുകൾക്കെതിരായ നടപടികൾ തുടങ്ങിയ പ്രൊഫഷണൽ സെഷനുകളും മേളയുടെ ഭാഗമാണ്.
അറബിക് ഭാഷയുടെ ഉന്നമനവും ആഗോള സാംസ്കാരിക വിനിമയവുമാണ് മേള ലക്ഷ്യമിടുന്നതെന്ന് ഡിസിടി അബുദാബി ചെയർമാൻ മുഹമ്മദ് ഖലീഫ അൽ മുബാറക്കും, എഎൽസി ചെയർമാൻ ഡോ. അലി ബിൻ തമീമും വ്യക്തമാക്കി.
റിപ്പബ്ലിക് ഓഫ് നോർത്ത് മാസിഡോണിയയുമായി സഹകരിച്ച് ബാൾക്കൻ സംസ്കാരത്തെയാണ് ഇത്തവണ ‘ഗസ്റ്റ് ഓഫ് ഓണർ’ ആയി തിരഞ്ഞെടുത്തത്. അറബി ഭാഷാ വ്യാകരണ ശാഖയ്ക്കും വൃത്തശാസ്ത്രത്തിനും അടിത്തറയിട്ട പ്രമുഖ പണ്ഡിതൻ അൽ ഖലീൽ ഇബ്നു അഹമ്മദ് അൽ ഫറാഹിദിയെ മേളയുടെ ‘ഫോക്കസ് പേഴ്സണാലിറ്റി’യായി ആദരിക്കുന്നു. മിഗ്വൽ ഡി സെർവാന്റസിന്റെ ലോകപ്രശസ്ത കൃതി ‘ഡോൺ കിഹോത്തെ’ ‘ബുക്ക് ഓഫ് ദി വേൾഡ്’ ആയി തിരഞ്ഞെടുത്തു. കൂടാതെ, ഇരുപതാം വാർഷികം ആഘോഷിക്കുന്ന ശൈഖ് സായിദ് ബുക്ക് അവാർഡ് ജേതാക്കൾക്കുള്ള പുരസ്കാര വിതരണവും മേളയോടനുബന്ധിച്ച് നടക്കും.
