സ്മാർട്ട് സാങ്കേതികവിദ്യയും അതിവേഗ സേവനങ്ങളും ഉറപ്പാക്കാൻ നിർദേശം; അന്താരാഷ്ട്ര വിതരണ ശൃംഖലകളുടെ സുരക്ഷയ്ക്ക് മുൻഗണന
ദുബായ്: ആഗോള വ്യാപാര-ലോജിസ്റ്റിക്സ് ഹബ്ബായി ദുബായുടെ സ്ഥാനം കൂടുതൽ ശക്തമാക്കുന്നതിനായി ദുബായ് കസ്റ്റംസ് നടപ്പിലാക്കുന്ന വികസന പ്രവർത്തനങ്ങൾ വിലയിരുത്തി ദുബായ് കിരീടാവകാശിയും ഉപപ്രധാനമന്ത്രിയും പ്രതിരോധ മന്ത്രിയുമായ ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തും. രാജ്യാന്തര വ്യാപാര ശൃംഖലകളുടെ സുരക്ഷ ഉറപ്പാക്കുന്നതിനും ചരക്കുനീക്കം തടസ്സമില്ലാതെ സുഗമമാക്കുന്നതിനും കസ്റ്റംസ് വകുപ്പ് സ്വീകരിച്ചിട്ടുള്ള അത്യാധുനിക നടപടികൾ അദ്ദേഹം നേരിട്ടെത്തി അവലോകനം ചെയ്തു.
ദുബായ് സർക്കാരിന്റെ ദീർഘകാല സാമ്പത്തിക ലക്ഷ്യങ്ങൾ കൈവരിക്കുന്നതിൽ കസ്റ്റംസ് വകുപ്പ് നിർണായക പങ്കുവഹിക്കുന്നുണ്ടെന്ന് ഷെയ്ഖ് ഹംദാൻ വ്യക്തമാക്കി. ആഗോള വിതരണ ശൃംഖലകളുടെ (Supply Chains) കാര്യക്ഷമത വർധിപ്പിക്കുക, ബിസിനസുകൾക്ക് അതിവേഗ കസ്റ്റംസ് സേവനങ്ങൾ ലഭ്യമാക്കുക, അത്യാധുനിക സ്മാർട്ട് സാങ്കേതികവിദ്യകളുടെ ഉപയോഗം പരമാവധി വ്യാപിപ്പിക്കുക എന്നിവയ്ക്കാണ് ദുബായ് സർക്കാർ നിലവിൽ മുൻഗണന നൽകുന്നതെന്നും അദ്ദേഹം കൂട്ടിച്ചേർത്തു.
വ്യാപാര സൗഹൃദ അന്തരീക്ഷം ഒരുക്കുന്നതിൽ ദുബായ് ലോകത്തിന് മാതൃകയാണെന്ന് വ്യക്തമാക്കിയ കിരീടാവകാശി, കസ്റ്റംസ് നടപടികൾ കൂടുതൽ ലളിതമാക്കാൻ ഡിജിറ്റൽ പരിവർത്തനം വേഗത്തിലാക്കണമെന്നും നിർദേശിച്ചു. ലോകമെമ്പാടുമുള്ള നിക്ഷേപകരെയും പ്രമുഖ വ്യാപാര ശൃംഖലകളെയും ആകർഷിക്കുന്നതിൽ ദുബായ് കസ്റ്റംസ് സ്വീകരിക്കുന്ന സുരക്ഷാ മാനദണ്ഡങ്ങളും ആധുനിക പരിശോധനാ സംവിധാനങ്ങളും വലിയ പങ്കാണ് വഹിക്കുന്നത്.
കിഴക്കിനെയും പടിഞ്ഞാറിനെയും ബന്ധിപ്പിക്കുന്ന പ്രധാന ആഗോള വ്യാപാര കവാടമെന്ന നിലയിൽ ദുബായിയുടെ പദവി നിലനിർത്താൻ കസ്റ്റംസ് സേവനങ്ങളിലെ ഈ പുരോഗതി വഴിതെളിക്കുമെന്നാണ് വിലയിരുത്തപ്പെടുന്നത്.
