ഷാർജ: അതിർത്തികൾ കടന്ന് പ്രവർത്തിച്ചിരുന്ന നാല് അന്താരാഷ്ട്ര സംഘടിത കുറ്റകൃത്യ ശൃംഖലകളെ തകർത്ത് ഷാർജ പൊലീസ്. യുഎഇ ആഭ്യന്തര മന്ത്രാലയവുമായി സഹകരിച്ച് നടത്തിയ ‘എൻഡ് ഓഫ് ദി ബാറ്റിൽ’ (End of the Battle) എന്ന സുരക്ഷാ ഓപ്പറേഷനിലൂടെ 12 രാജ്യങ്ങളിൽ നിന്നുള്ള 33 പേരെ അറസ്റ്റ് ചെയ്തു. ലോകമെമ്പാടുമുള്ള 30-ലധികം കമ്പനികളുടെയും സ്ഥാപനങ്ങളുടെയും 65 ബില്യൺ ദിർഹത്തിലധികം മൂല്യമുള്ള ആസ്തികൾ സംരക്ഷിച്ചതായും അധികൃതർ അറിയിച്ചു.
സൈബർ ആക്രമണം, ഡിജിറ്റൽ വാലറ്റുകളിൽ നിന്നുള്ള പണം മോഷ്ടിക്കൽ, ഓൺലൈൻ തട്ടിപ്പ്, പണം വെളുപ്പിക്കൽ, ഭീഷണിപ്പെടുത്തി പണം തട്ടൽ, ഡാർക്ക് വെബിലൂടെ മോഷ്ടിച്ച വിവരങ്ങളുടെ വ്യാപാരം, ശാരീരിക ആക്രമണം തുടങ്ങിയ കുറ്റകൃത്യങ്ങളിലാണ് ശൃംഖലകൾ ഏർപ്പെട്ടിരുന്നതെന്ന് അന്വേഷണത്തിൽ കണ്ടെത്തി. കുറ്റകൃത്യങ്ങൾക്കായി നിർമിതബുദ്ധി സാങ്കേതികവിദ്യകളും ഉപയോഗിച്ചിരുന്നതായി പൊലീസ് വ്യക്തമാക്കി.
8.82 ബില്യൺ ദിർഹത്തിന്റെ പണം വെളുപ്പിക്കൽ
ഷാർജ പബ്ലിക് പ്രോസിക്യൂഷന്റെ അന്വേഷണത്തിൽ, പണം വെളുപ്പിക്കൽ കുറ്റകൃത്യങ്ങളുമായി ബന്ധപ്പെട്ട ഇടപാടുകളുടെ മൂല്യം 8,825,381,741.50 ദിർഹമാണെന്ന് കണ്ടെത്തി. ബാങ്ക് അക്കൗണ്ടുകൾ, ഡിജിറ്റൽ വാലറ്റുകൾ, വിവിധ അന്താരാഷ്ട്ര പ്ലാറ്റ്‌ഫോമുകൾ എന്നിവയിലൂടെ പണം കൈമാറ്റം ചെയ്താണ് കുറ്റകൃത്യങ്ങളിൽനിന്ന് ലഭിച്ച വരുമാനത്തിന്റെ ഉറവിടം മറച്ചുവെച്ചത്.
പിന്നീട് ഈ പണം റിയൽ എസ്റ്റേറ്റ്, ആഡംബര കാറുകൾ, വിലകൂടിയ വാച്ചുകൾ, ആഭരണങ്ങൾ തുടങ്ങിയവ വാങ്ങുന്നതിനായി വിനിയോഗിച്ചിരുന്നതായും അന്വേഷണത്തിൽ വ്യക്തമായി.
200 മില്യൺ ദിർഹത്തിലധികം പിടിച്ചെടുത്തു
ഓപ്പറേഷനിൽ 200 മില്യൺ ദിർഹത്തിലധികം പണം പിടിച്ചെടുത്തു. കൂടാതെ 3,000-ത്തിലധികം ഡിജിറ്റൽ വാലറ്റുകൾ പരിശോധനയ്ക്കും സ്ഥിരീകരണത്തിനും വിധേയമാക്കി. 17 ആഡംബര വാഹനങ്ങൾ, 29 വിലകൂടിയ വാച്ചുകൾ, ആഭരണങ്ങൾ, ഒരു താമസവില്ല, നിർമാണത്തിലിരിക്കുന്ന രണ്ട് വില്ലകൾ, രണ്ട് പാർപ്പിട ഭൂമികൾ എന്നിവയും പിടിച്ചെടുത്ത ആസ്തികളിൽ ഉൾപ്പെടുന്നു.
കുറ്റകൃത്യങ്ങളുമായി ബന്ധമുള്ള ഡിജിറ്റൽ വാലറ്റുകളിൽ കോടിക്കണക്കിന് ദിർഹത്തിന്റെ ഇടപാടുകൾ നടന്നതായും അധികൃതർ അറിയിച്ചു. വിദേശത്തുണ്ടായിരുന്ന പ്രധാന പ്രതികളെ കണ്ടെത്തി യുഎഇയിലേക്ക് തിരിച്ചെത്തിച്ച് അറസ്റ്റ് ചെയ്യാനും അന്വേഷണ സംഘത്തിന് സാധിച്ചു.
നാല് ശൃംഖലകൾ; വ്യത്യസ്ത ചുമതലകൾ
അന്വേഷണത്തിൽ കണ്ടെത്തിയ നാല് കുറ്റകൃത്യ ശൃംഖലകളും പരസ്പരം ബന്ധപ്പെട്ടു പ്രവർത്തിച്ചവയായിരുന്നു. ഒരു സംഘം സൈബർ ആക്രമണങ്ങളും വിവരമോഷണവും നടത്തി. രണ്ടാമത്തെ സംഘം വെർച്വൽ ആസ്തികൾ ഉപയോഗിച്ച് പണം വെളുപ്പിച്ചു. മൂന്നാമത്തെ സംഘം സോഷ്യൽ എൻജിനീയറിങ് തന്ത്രങ്ങളിലൂടെ ഇരകളെ വഞ്ചിക്കുകയും ഡിജിറ്റൽ വാലറ്റുകൾ കൈക്കലാക്കുകയും ചെയ്തു. നാലാമത്തെ സംഘം ഇരകളെ തട്ടിക്കൊണ്ടുപോകുകയും ശാരീരികമായി ആക്രമിക്കുകയും ഭീഷണിപ്പെടുത്തുകയും ചെയ്ത് വാലറ്റുകളുടെ രഹസ്യ കോഡുകൾ വെളിപ്പെടുത്താൻ നിർബന്ധിച്ചു.
മോഷ്ടിച്ച വിവരങ്ങൾ ഡാർക്ക് വെബിലൂടെ വിൽക്കുകയും നിർമിതബുദ്ധിയുടെ സഹായത്തോടെ ഫിഷിങ്, ഓൺലൈൻ തട്ടിപ്പ് തുടങ്ങിയവ നടത്തുകയും ചെയ്തിരുന്നു. വിവിധ രാജ്യങ്ങളിലായി പ്രവർത്തിച്ചിരുന്ന സംഘത്തിന്റെ നേതാക്കളെയും അംഗങ്ങളെയും കണ്ടെത്തുന്നതിൽ ഡിജിറ്റൽ തെളിവുകളും സാമ്പത്തിക ഇടപാടുകളും നിർണായകമായി.
10,000-ത്തിലധികം രേഖകൾ പരിശോധിച്ചു
കേസിന്റെ അന്വേഷണത്തിന്റെ ഭാഗമായി 10,000-ത്തിലധികം രേഖകളും റിപ്പോർട്ടുകളും പരിശോധിച്ചു. 142 റിപ്പോർട്ടുകളും അന്വേഷണ സെഷനുകളും നടത്തുകയും 385 തീരുമാനങ്ങളും 478 ജുഡീഷ്യൽ ഉത്തരവുകളും പുറപ്പെടുവിക്കുകയും ചെയ്തു. 103 ഇലക്ട്രോണിക് ഉപകരണങ്ങളും പരിശോധിച്ചു. സാമ്പത്തിക രഹസ്യാന്വേഷണ വിഭാഗവുമായി ഏകോപിപ്പിച്ച് 109 അഭ്യർഥനകളും അന്താരാഷ്ട്ര സഹകരണവുമായി ബന്ധപ്പെട്ട എട്ട് നടപടികളും ഉൾപ്പെടെ വിവിധ അന്വേഷണ നടപടികൾ സ്വീകരിച്ചു.
ഷാർജ പൊലീസ് കമാൻഡർ ഇൻ ചീഫ് ലെഫ്റ്റനന്റ് ജനറൽ അബ്ദുല്ല മുബാറക് ബിൻ ആമർ, ഷാർജ മീഡിയ സിറ്റിയായ ഷംസ് (Shams) ൽ നടത്തിയ വാർത്താസമ്മേളനത്തിലാണ് ഓപ്പറേഷന്റെ വിശദാംശങ്ങൾ വെളിപ്പെടുത്തിയത്.
യുഎഇ ആഭ്യന്തര മന്ത്രാലയം, വിവിധ പ്രാദേശിക-അന്താരാഷ്ട്ര സുരക്ഷാ ഏജൻസികൾ, നീതിന്യായ സ്ഥാപനങ്ങൾ എന്നിവയുടെ ഏകോപിത പ്രവർത്തനമാണ് ഓപ്പറേഷന്റെ വിജയത്തിന് സഹായിച്ചതെന്ന് അദ്ദേഹം പറഞ്ഞു. സൈബർ കുറ്റകൃത്യങ്ങളും അതിർത്തികൾ കടന്നുള്ള സംഘടിത കുറ്റകൃത്യങ്ങളും തടയുന്നതിനുള്ള രാജ്യത്തിന്റെ ശേഷി ഈ നടപടി വ്യക്തമാക്കുന്നതായും അദ്ദേഹം കൂട്ടിച്ചേർത്തു.
ഷാർജ അറ്റോർണി ജനറൽ കൗൺസിലർ അൻവർ അൽ ഹർമൂദി ഉൾപ്പെടെയുള്ള ഉദ്യോഗസ്ഥരും വാർത്താസമ്മേളനത്തിൽ അന്വേഷണത്തിന്റെ വിവിധ ഘട്ടങ്ങൾ വിശദീകരിച്ചു. കുറ്റകൃത്യങ്ങളുമായി ബന്ധപ്പെട്ട പണം കണ്ടെത്തുന്നതിനും ആസ്തികൾ മരവിപ്പിക്കുന്നതിനും പ്രതികളെ നിയമത്തിന് മുന്നിൽ കൊണ്ടുവരുന്നതിനും പബ്ലിക് പ്രോസിക്യൂഷൻ നിർണായക പങ്കുവഹിച്ചതായി അധികൃതർ അറിയിച്ചു.
