സിബിഎസ്ഇ യുഎഇ ക്ലസ്റ്റർ ഹാൻഡ്‌ബോൾ: മെട്രോപൊളിറ്റൻ ഇന്റർനാഷണലിനും ഡിപിഎസ് അജ്മാനും കിരീടം

അജ്മാനിൽ നടന്ന മൂന്ന് ദിവസത്തെ ടൂർണമെന്റിൽ മാറ്റുരച്ചത് 26 സ്കൂളുകളിൽ നിന്നുള്ള എണ്ണൂറോളം കായികതാരങ്ങൾ; വിജയികൾ ദേശീയ ചാമ്പ്യൻഷിപ്പിലേക്ക്.

അജ്മാൻ, സെപ്റ്റംബർ 19, 2026 : സിബിഎസ്ഇ യുഎഇ ക്ലസ്റ്റർ ഹാൻഡ്‌ബോൾ ടൂർണമെന്റിൽ അണ്ടർ-14, അണ്ടർ-17 വിഭാഗങ്ങളിൽ മെട്രോപൊളിറ്റൻ ഇന്റർനാഷണൽ ഇംഗ്ലീഷ് സ്കൂളും അണ്ടർ-19 വിഭാഗത്തിൽ ഡൽഹി പ്രൈവറ്റ് സ്കൂൾ അജ്മാനും ജേതാക്കളായി. അജ്മാൻ ദി റോയൽ അക്കാദമിയിൽ മൂന്ന് ദിവസങ്ങളിലായി നടന്ന മത്സരങ്ങൾ ശനിയാഴ്ച സമാപിച്ചു.

നോർത്ത് പോയിന്റ് എജ്യുക്കേഷന്റെ മേൽനോട്ടത്തിൽ അജ്മാൻ ദി റോയൽ അക്കാദമി ആതിഥേയത്വം വഹിച്ച ടൂർണമെന്റിൽ യുഎഇയിലെ വിവിധ എമിറേറ്റുകളിൽ നിന്നുള്ള 26 സ്കൂളുകളെ പ്രതിനിധീകരിച്ച് എണ്ണൂറോളം വിദ്യാർത്ഥികളാണ് കളത്തിലിറങ്ങിയത്. സെപ്റ്റംബർ 17-ന് രാവിലെ ആരംഭിച്ച മത്സരങ്ങൾ ശനിയാഴ്ച വൈകുന്നേരത്തോടെയാണ് പൂർത്തിയായത്. ബോയ്സ് അണ്ടർ-14, അണ്ടർ-17, അണ്ടർ-19 കാറ്റഗറികളിലായിരുന്നു പോരാട്ടം.

അണ്ടർ-14 ഫൈനലിൽ ഫുജൈറ എമിനൻസ് പ്രൈവറ്റ് സ്കൂളിനെ പരാജയപ്പെടുത്തിയാണ് അജ്മാൻ മെട്രോപൊളിറ്റൻ ഇന്റർനാഷണൽ ഇംഗ്ലീഷ് സ്കൂൾ ഒന്നാം സ്ഥാനം സ്വന്തമാക്കിയത്. അജ്മാൻ കോസ്മോപൊളിറ്റൻ ഇന്ത്യൻ ഇന്റർനാഷണൽ സ്കൂൾ, ഫുജൈറ റോയൽ പ്രൈവറ്റ് ഇംഗ്ലീഷ് സ്കൂൾ എന്നിവർ ഈ വിഭാഗത്തിൽ മൂന്നാം സ്ഥാനം (സെക്കൻഡ് റണ്ണേഴ്സ്-അപ്പ്) പങ്കിട്ടു.

അണ്ടർ-17 വിഭാഗത്തിലും ആധിപത്യം തുടർന്ന മെട്രോപൊളിറ്റൻ ഇന്റർനാഷണൽ കിരീടം നിലനിർത്തി. ഡിപിഎസ് അജ്മാൻ റണ്ണേഴ്സ്-അപ്പായപ്പോൾ, അജ്മാൻ ഹാബിറ്റാറ്റ് സ്കൂൾ, അൽ അമീർ ഇംഗ്ലീഷ് സ്കൂൾ എന്നിവർ മൂന്നാം സ്ഥാനം പങ്കിട്ടു.

വാശിയേറിയ അണ്ടർ-19 ഫൈനലിൽ അബുദാബി പ്രൈവറ്റ് ഇന്റർനാഷണൽ ഇംഗ്ലീഷ് സ്കൂളിനെ മറികടന്ന് ഡൽഹി പ്രൈവറ്റ് സ്കൂൾ അജ്മാൻ ജേതാക്കളായി. ഇന്ത്യൻ ഇന്റർനാഷണൽ സ്കൂൾ ഡിഎസ്ഒ, ഷാർജ ഇന്ത്യ ഇന്റർനാഷണൽ സ്കൂൾ എന്നിവരാണ് മൂന്നാം സ്ഥാനം പങ്കിട്ട മറ്റ് ടീമുകൾ.

സ്കൂൾ കായികരംഗത്ത് ഹാൻഡ്‌ബോളിന് ലഭിക്കുന്ന സ്വീകാര്യത ശ്രദ്ധേയമാണെന്ന് ദി റോയൽ അക്കാദമി പ്രിൻസിപ്പൽ ഡോ. പ്രേമ പറഞ്ഞു. ഫുട്ബോളും ക്രിക്കറ്റും പോലെ തന്നെ യുഎഇയിലെ വിദ്യാർത്ഥികൾക്കിടയിൽ ഹാൻഡ്‌ബോളിനും വരുംവർഷങ്ങളിൽ വലിയ ജനപ്രീതി ലഭിക്കുമെന്നാണ് പ്രതീക്ഷിക്കുന്നതെന്നും അവർ വ്യക്തമാക്കി.

വിജയികൾക്ക് നോർത്ത് പോയിന്റ് എജ്യുക്കേഷൻ മാനേജ്‌മെന്റ് പ്രതിനിധികളും സ്കൂൾ മേധാവികളും ചേർന്ന് ട്രോഫികൾ വിതരണം ചെയ്തു. ക്ലസ്റ്റർ തലത്തിൽ വിജയികളായ ടീമുകൾ ഇന്ത്യയിൽ നടക്കുന്ന സിബിഎസ്ഇ ദേശീയ ഹാൻഡ്‌ബോൾ ചാമ്പ്യൻഷിപ്പിൽ യുഎഇ ക്ലസ്റ്ററിനെ പ്രതിനിധീകരിക്കും.