‘ആരാണ് വിവരങ്ങളുടെ നിയന്ത്രണം കൈയാളുന്നത്?’ എന്ന പ്രമേയത്തിൽ എഐ, വ്യാജവാർത്താ പ്രതിരോധം, മാധ്യമ സാങ്കേതികവിദ്യ എന്നിവ ചർച്ച ചെയ്യാൻ ആഗോള വിദഗ്ധർ ഒത്തുചേരുന്നു
അജ്മാൻ, യുഎഇ — ആർട്ടിഫിഷ്യൽ ഇന്റലിജൻസും ഡിജിറ്റൽ സാങ്കേതികവിദ്യകളും മാധ്യമരംഗത്ത് വരുത്തുന്ന അടിസ്ഥാനപരമായ മാറ്റങ്ങൾ ചർച്ച ചെയ്യുന്നതിനായി പ്രഥമ അജ്മാൻ മീഡിയ ഫോറം 2026 നവംബർ 18, 19 തീയതികളിൽ സംഘടിപ്പിക്കും. ‘Who Owns the Signal?’ (ആരാണ് വിവരങ്ങളുടെ നിയന്ത്രണം കൈയാളുന്നത്?) എന്നതാണ് ഫോറത്തിന്റെ പ്രധാന പ്രമേയം.
അജ്മാനിലെ താറ സെന്റർ ഫോർ എന്റർപ്രണർഷിപ്പിൽ ചേർന്ന വാർത്താസമ്മേളനത്തിൽ അജ്മാൻ ഗവൺമെന്റ് മീഡിയ ഓഫീസാണ് ഫോറത്തിന്റെ ഔദ്യോഗിക വിവരങ്ങൾ പുറത്തുവിട്ടത്.
പരമ്പരാഗത മാധ്യമങ്ങൾക്ക് പുറമെ ഡിജിറ്റൽ പ്ലാറ്റ്‌ഫോമുകൾ, അൽഗോരിതങ്ങൾ, കൃത്രിമബുദ്ധി, സ്വതന്ത്ര കണ്ടന്റ് ക്രിയേറ്റർമാർ എന്നിവ വിവര കൈമാറ്റത്തിലും പൊതുജനാഭിപ്രായ രൂപീകരണത്തിലും ചെലുത്തുന്ന സ്വാധീനമാണ് ഫോറത്തിന്റെ പ്രധാന ചർച്ചാവിഷയം. മാധ്യമരംഗത്തെ പരിവർത്തനങ്ങൾ, കണ്ടന്റ് നിർമ്മാണത്തിൽ എഐയുടെ പ്രയോഗം, വ്യാജവാർത്തകളെ പ്രതിരോധിക്കലും മാധ്യമ വിശ്വാസ്യതയും, ദേശീയ പ്രതിച്ഛായയും സർക്കാർ ആശയവിനിമയവും, ഡിജിറ്റൽ പ്ലാറ്റ്‌ഫോമുകളുടെ സാമ്പത്തിക ഘടന എന്നീ അഞ്ച് സുപ്രധാന വിഷയങ്ങൾ കേന്ദ്രീകരിച്ചാണ് സെഷനുകൾ ക്രമീകരിച്ചിരിക്കുന്നത്.
വിവരങ്ങളുടെ വിതരണത്തിലും സ്വാധീനത്തിലും പ്രകടമായ മാറ്റങ്ങളാണ് നടക്കുന്നതെന്നും, ഉത്തരവാദിത്തവും വിശ്വാസ്യതയും നിലനിർത്തുന്ന സുതാര്യമായ മാധ്യമാന്തരീക്ഷം സൃഷ്ടിക്കുകയാണ് ഫോറത്തിന്റെ ലക്ഷ്യമെന്നും അജ്മാൻ ഗവൺമെന്റ് മീഡിയ ഓഫീസ് എക്സിക്യൂട്ടീവ് ഡയറക്ടർ മുഹമ്മദ് അബ്ദുല്ല അൽ കഅബി വാർത്താസമ്മേളനത്തിൽ വ്യക്തമാക്കി.
മാധ്യമമേഖല നേരിടുന്ന വെല്ലുവിളികൾക്ക് പ്രായോഗിക പരിഹാരങ്ങൾ കണ്ടെത്താൻ ലക്ഷ്യമിട്ട് ഫോറത്തോടനുബന്ധിച്ച് ‘മീഡിയത്തോൺ’ സംഘടിപ്പിക്കും. കൂടാതെ, ഡാറ്റാ ഗവേഷണ സ്ഥാപനമായ സ്റ്റാറ്റിസ്റ്റയുടെ സഹകരണത്തോടെ അന്താരാഷ്ട്ര സൂചികകളും വിവര ശേഖരണങ്ങളും മുൻനിർത്തി നയരൂപകർത്താക്കളുടെ പ്രത്യേക റൗണ്ട് ടേബിൾ ചർച്ചയും ഉണ്ടാകും.
എഐ കണ്ടന്റ് നിർമ്മാണം, വിവരങ്ങളുടെ ആധികാരികത പരിശോധിക്കുന്ന സംവിധാനങ്ങൾ എന്നിവ നേരിട്ട് പരീക്ഷിക്കുന്നതിനായി ‘എഐ മീഡിയ ലാബ്’ (AI Media Lab) വേദിയൊരുക്കും. മാധ്യമപ്രവർത്തകർക്കും സ്രഷ്ടാക്കൾക്കും സംവാദങ്ങൾക്കും അഭിമുഖങ്ങൾക്കുമായി ‘അജ്മാൻ സ്റ്റുഡിയോസ്’ എന്ന പ്രത്യേക കേന്ദ്രവും പ്രവർത്തിക്കും.
യുഎഇയും ചൈനയും തമ്മിലുള്ള മാധ്യമ-സാങ്കേതിക സഹകരണം വിപുലീകരിക്കുന്നതിന്റെ ഭാഗമായി ചൈനീസ് എഐ, നൂതന സാങ്കേതികവിദ്യകൾ അവതരിപ്പിക്കുന്ന പ്രദർശനവും ഫോറത്തിൽ ഉൾപ്പെടുത്തിയിട്ടുണ്ട്.
നാഷണൽ മീഡിയ അതോറിറ്റി, ട്രെൻഡ്സ് ഗ്രൂപ്പ്, അജ്മാൻ സാമ്പത്തിക വികസന വകുപ്പ്, അബുദാബി മീഡിയ നെറ്റ്‌വർക്ക്, അറേബ്യൻ റേഡിയോ നെറ്റ്‌വർക്ക്, അജ്മാൻ മുനിസിപ്പാലിറ്റി ആൻഡ് പ്ലാനിംഗ് വകുപ്പ്, അജ്മാൻ ട്രാൻസ്‌പോർട്ട് അതോറിറ്റി എന്നിവരാണ് ഫോറത്തിന്റെ പങ്കാളികൾ. മാധ്യമ ചർച്ചകൾക്കും നൂതന സാങ്കേതിക ആശയവിനിമയത്തിനും സ്ഥിരം വേദിയൊരുക്കി അജ്മാനെ മേഖലയിലെ മാധ്യമ ഹബ്ബായി വികസിപ്പിക്കുകയാണ് ഇതിലൂടെ ലക്ഷ്യമിടുന്നത്.
