അബുദാബി: യു.എ.ഇ ദേശീയ മാധ്യമ അതോറിറ്റിയുടെ (National Media Authority) പുതിയ സെക്രട്ടറി ജനറലായി മുഹമ്മദ് സയീദ് റാഷിദ് അൽ ഷെഹിയെ നിയമിച്ചുകൊണ്ട് യു.എ.ഇ പ്രസിഡന്റ് ശൈഖ് മുഹമ്മദ് ബിൻ സായിദ് അൽ നഹ്യാൻ ഫെഡറൽ ഉത്തരവ് പുറപ്പെടുവിച്ചു. മന്ത്രാലയ അണ്ടർ സെക്രട്ടറി പദവിയോടെയാണ് നിയമനം.
രാജ്യത്തിന്റെ മാധ്യമ നയങ്ങൾ രൂപീകരിക്കുന്നതിലും വിലയിരുത്തുന്നതിലും യു.എ.ഇയുടെ പോസിറ്റീവ് ഇമേജ് ആഗോളതലത്തിൽ ഉയർത്തിപ്പിടിക്കുന്നതിലും പുതിയ സെക്രട്ടറി ജനറൽ നിർണായക പങ്ക് വഹിക്കും. മാധ്യമ രംഗത്തുണ്ടാകുന്ന പ്രതിസന്ധികൾ മുൻകൂട്ടി കണ്ടെത്തുക, ദേശീയ മാധ്യമ മേഖലയുടെ വികസനവുമായി ബന്ധപ്പെട്ട തന്ത്രങ്ങളും നിയമങ്ങളും തയ്യാറാക്കുക, മാധ്യമ സ്ഥാപനങ്ങൾക്കും പ്രവർത്തനങ്ങൾക്കും ലൈസൻസ് നൽകുക തുടങ്ങിയവയാണ് അദ്ദേഹത്തിന്റെ പ്രധാന ചുമതലകൾ.
ഔദ്യോഗിക വാർത്താ ഏജൻസിയായ ‘വാം’ (WAM)-ന്റെ മേൽനോട്ട ചുമതലയും ഇതോടൊപ്പം അദ്ദേഹം നിർവ്വഹിക്കും. കൂടാതെ, ഫ്രീ സോണുകൾ ഉൾപ്പെടെ യു.എ.ഇയിൽ പ്രവർത്തിക്കുന്ന വിദേശ മാധ്യമങ്ങളുടെയും മാധ്യമപ്രവർത്തകരുടെയും രജിസ്ട്രേഷനും അക്രഡിറ്റേഷനും നിയന്ത്രിക്കുന്നതും അദ്ദേഹത്തിന്റെ കീഴിലായിരിക്കും.
മുമ്പ് യു.എ.ഇ മീഡിയ കൗൺസിൽ സെക്രട്ടറി ജനറലായി സേവനമനുഷ്ഠിച്ചിട്ടുള്ള മുഹമ്മദ് സയീദ് അൽ ഷെഹി, മാധ്യമം, സ്പെഷ്യലൈസ്ഡ് സോണുകൾ, കായികം എന്നീ മേഖലകളിൽ നിരവധി നേതൃപദവികൾ വഹിച്ചിട്ടുണ്ട്. യു.എ.ഇയിലെ മാധ്യമരംഗത്തെ പുരോഗതിക്കും സ്വദേശി പ്രതിഭകളെ ശാക്തീകരിക്കുന്നതിനുമായി നിരവധി പ്രോജക്ടുകൾക്ക് അദ്ദേഹം നേതൃത്വം നൽകിയിട്ടുണ്ട്.
