അടുത്ത അഞ്ച് മുതൽ ഏഴ് വർഷത്തിനുള്ളിൽ മേഖലയിൽ 12 ശതമാനം വരെ വളർച്ചയുണ്ടാകുമെന്ന് ഫ്രോസ്റ്റ് & സള്ളിവൻ റിപ്പോർട്ട്; അബുദാബിയുടെ ഹെൽം ക്ലസ്റ്ററും ജിനോമിക്സ് പദ്ധതികളും നിർണായകം.
ദുബായ്, ഒക്ടോബർ 7, 2026 : ജീനോമിക്‌സ്, ആർട്ടിഫിഷ്യൽ ഇന്റലിജൻസ് (എഐ), അത്യാധുനിക മരുന്ന് നിർമ്മാണം എന്നിവയിൽ യുഎഇ നടത്തുന്ന വൻതോതിലുള്ള നിക്ഷേപങ്ങൾ പശ്ചിമേഷ്യയിലെ ബയോഫാർമസ്യൂട്ടിക്കൽ മേഖലയുടെ മുഖച്ഛായ മാറ്റിയെഴുതുന്നു. മിഡിൽ ഈസ്റ്റിലെ പ്രിസിഷൻ മെഡിസിൻ വിപണി വരുംവർഷങ്ങളിൽ ഇരട്ടക്കക്ക വളർച്ച കൈവരിക്കുമെന്നാണ് പുതിയ വ്യവസായ പഠനം വ്യക്തമാക്കുന്നത്.
വേൾഡ് ഹെൽത്ത് എക്‌സ്‌പോയും (WHX) ആഗോള ഗവേഷണ സ്ഥാപനമായ ഫ്രോസ്റ്റ് & സള്ളിവനും സംയുക്തമായി തയ്യാറാക്കിയ ‘ഫ്രം ഡിസ്കവറി ടു ഡെലിവറി: ദ ടെക്നോളജീസ് റീഷേപ്പിംഗ് ഗ്ലോബൽ ബയോഫാർമ’ എന്ന റിപ്പോർട്ടിലാണ് ഈ വിവരങ്ങളുള്ളത്. അടുത്ത അഞ്ച് മുതൽ ഏഴ് വർഷത്തിനുള്ളിൽ മിഡിൽ ഈസ്റ്റിലെ പ്രിസിഷൻ മെഡിസിൻ മേഖല 10 മുതൽ 12 ശതമാനം വരെ വാർഷിക വളർച്ച നേടുമെന്ന് റിപ്പോർട്ട് ചൂണ്ടിക്കാട്ടുന്നു. വികസിത രാജ്യങ്ങളിലെ ഫാർമസ്യൂട്ടിക്കൽ വിപണികൾക്ക് സമാനമായ കുതിപ്പാണിത്.
വിദേശത്തുനിന്ന് മരുന്നുകൾ ഇറക്കുമതി ചെയ്യുന്ന രീതിയിൽ നിന്ന് മാറി, രാജ്യത്തിനകത്തുതന്നെ മരുന്ന് ഗവേഷണവും ഉത്പാദനവും വ്യാപിപ്പിക്കാനുള്ള യുഎഇയുടെ നയങ്ങളാണ് ഈ മാറ്റത്തിന് വഴിയൊരുക്കിയത്.
രാജ്യത്തെ ജനങ്ങളിൽ നിന്ന് പത്ത് ലക്ഷം ഡിഎൻഎ സാമ്പിളുകൾ ശേഖരിക്കാൻ ലക്ഷ്യമിടുന്ന ‘എമിറാത്തി ജീനോം പ്രോഗ്രാം’ ഈ ദൗത്യത്തിൽ മുഖ്യപങ്കുവഹിക്കുന്നു. പ്രാദേശിക ജനവിഭാഗങ്ങളുടെ ജനിതക സവിശേഷതകൾ വിശകലനം ചെയ്യുന്നതിനായി 50,000-ത്തിലധികം സാമ്പിളുകൾ ഉൾപ്പെടുത്തി യുഎഇ റഫറൻസ് ജീനോം പഠനവും പുരോഗമിക്കുകയാണ്. വിദേശ പരീക്ഷണങ്ങളെ മാത്രം ആശ്രയിക്കാതെ, ഈ മേഖലയിലെ ആളുകളുടെ ജനിതകഘടനയ്ക്ക് അനുയോജ്യമായ ചികിത്സകൾ വികസിപ്പിക്കാൻ ഈ വിവരശേഖരം ശാസ്ത്രജ്ഞരെ സഹായിക്കും.
വൻകിട പശ്ചാത്തല സൗകര്യ പദ്ധതികളും അബുദാബിയിൽ ഇതിനായി ഒരുങ്ങുന്നുണ്ട്. അബുദാബിയുടെ ‘ഹെൽത്ത്, എൻഡുറൻസ്, ലോംഗ്വിറ്റി ആൻഡ് മെഡിസിൻ’ (HELM) ക്ലസ്റ്ററിലേക്ക് 4,200 കോടി ദിർഹം (1,150 കോടി ഡോളർ) നിക്ഷേപം എത്തുമെന്നാണ് കണക്കുകൂട്ടൽ. 2045-ഓടെ എമിറേറ്റിന്റെ ജിഡിപിയിലേക്ക് 9,400 കോടി ദിർഹം സംഭാവന ചെയ്യാനും ഈ പദ്ധതി വഴി ബയോടെക്നോളജി രംഗത്ത് 30,000 തൊഴിലവസരങ്ങൾ സൃഷ്ടിക്കാനും സാധിക്കും.
നിർമ്മിത ബുദ്ധി (AI) ഉപയോഗിച്ചുള്ള മരുന്ന് കണ്ടെത്തലിലും യുഎഇ വലിയ മുന്നേറ്റമാണ് നടത്തുന്നത്. അബുദാബി കേന്ദ്രമായി പ്രവർത്തിക്കുന്ന ഇൻസിലിക്കോ മെഡിസിൻ, കാൻസർ, വേദന സംഹാരികൾ എന്നിവയ്ക്കുള്ള രാജ്യത്തെ ആദ്യത്തെ സമ്പൂർണ്ണ എഐ അധിഷ്ഠിത പ്രീ-ക്ലിനിക്കൽ മരുന്നുകൾ 2025-ൽ നാമനിർദ്ദേശം ചെയ്തിരുന്നു. വെറും 12 മാസത്തിനുള്ളിലാണ് ഈ കണ്ടെത്തൽ സാധ്യമാക്കിയത്. 2026 ജൂണിൽ അബുദാബി ഡിപ്പാർട്ട്‌മെന്റ് ഓഫ് ഹെൽത്തും ജർമ്മൻ ഫാർമ കമ്പനിയായ ബോറിംഗർ ഇംഗൽഹൈമും ഒപ്പുവെച്ച പങ്കാളിത്തം ജിനോമിക്സ് അധിഷ്ഠിത ഗവേഷണങ്ങൾക്ക് കൂടുതൽ വേഗത പകർന്നു.
മരുന്ന് നിർമ്മാണ ശൃംഖലകൾ പ്രാദേശികവൽക്കരിക്കുന്നതിന്റെ ഭാഗമായി 2025-ൽ ‘മുബാദല ബയോ’ യുഎഇയിൽ പ്രവർത്തനം ആരംഭിച്ചിരുന്നു. സൗദി അറേബ്യയിൽ ലൈഫെറയും നോവോ നോർഡിസ്കും തമ്മിലുള്ള കരാറിലൂടെ പ്രമേഹ, അമിതവണ്ണ ചികിത്സയ്ക്കുള്ള ജിഎൽപി-1 മരുന്നുകൾ നിർമ്മിക്കാനുള്ള ശ്രമങ്ങളും നടക്കുന്നുണ്ട്.
2025 ലെ കണക്കനുസരിച്ച് മിഡിൽ ഈസ്റ്റ്-ആഫ്രിക്കൻ ഫാർമസ്യൂട്ടിക്കൽ വിപണിയുടെ മൂല്യം 5,866 കോടി ഡോളറാണ്. ഇത് ആഗോള വിപണിയുടെ 3.6 ശതമാനം വരും.
ഡിജിറ്റൽ ഇൻഫ്രാസ്ട്രക്ചറും ജനിതക വിവരശേഖരണവും പ്രാദേശികമായി വളരുമ്പോൾ, വിദേശ സാങ്കേതികവിദ്യകളെ മാത്രം ആശ്രയിക്കാതെ തനതായ ചികിത്സാരീതികൾ വികസിപ്പിക്കാൻ മിഡിൽ ഈസ്റ്റിന് സാധിക്കുമെന്ന് ഫ്രോസ്റ്റ് & സള്ളിവൻ ഹെൽത്ത്‌കെയർ വിഭാഗം പ്രിൻസിപ്പൽ ആരതി ചിതലെ വ്യക്തമാക്കി.
2027 ജനുവരി 25 മുതൽ 28 വരെ ദുബായ് എക്‌സ്‌പോ സിറ്റിയിലെ ഡിഇസിയിലും ദുബായ് വേൾഡ് ട്രേഡ് സെന്ററിലുമായി നടക്കുന്ന വേൾഡ് ഹെൽത്ത് എക്‌സ്‌പോയിൽ ഈ പുരോഗതികൾ ചർച്ചയാകും. ആഗോള ബയോഫാർമ കമ്പനികളെയും നിക്ഷേപകരെയും ബന്ധിപ്പിക്കുന്നതിനായി പ്രത്യേകം ഫാർമ സോൺ, ബയോടെക് സോൺ എന്നിവയും എക്‌സ്‌പോയിൽ സജ്ജീകരിക്കും.
