അബുദാബി: യുഎഇയിൽ നിന്ന് ഇറാനിലേക്ക് വൻതുക പണം കൈമാറിയെന്ന തരത്തിൽ ചില അന്തർദേശീയ മാധ്യമങ്ങളിൽ വന്ന റിപ്പോർട്ടുകൾ തള്ളി യുഎഇ . 3 ബില്യൺ യുഎസ് ഡോളർ ഇറാനിലേക്ക് കൈമാറിയെന്ന ആരോപണങ്ങൾ പൂർണമായും തെറ്റും അടിസ്ഥാനരഹിതവുമാണെന്ന് യുഎഇ വിദേശകാര്യ മന്ത്രാലയം വ്യക്തമാക്കി.
ഇറാനുമായി ബന്ധപ്പെട്ട് മരവിപ്പിച്ചിരുന്ന ഫണ്ടുകൾ യുഎഇ വഴി വിട്ടുനൽകുകയോ, കൈമാറുകയോ, അതിന് സൗകര്യമൊരുക്കുകയോ ചെയ്തിട്ടില്ലെന്ന് മന്ത്രാലയം പുറത്തിറക്കിയ പ്രസ്താവനയിൽ വ്യക്തമാക്കി. ഇത്തരം വാർത്തകൾക്ക് യാതൊരു വസ്തുതാപരമായ അടിസ്ഥാനവുമില്ലെന്നും ഔദ്യോഗിക രേഖകളോ സ്ഥിരീകരണങ്ങളോ ഇല്ലാതെയാണ് ചില മാധ്യമങ്ങൾ വാർത്തകൾ പ്രചരിപ്പിക്കുന്നതെന്നും മന്ത്രാലയം ചൂണ്ടിക്കാട്ടി.
ഇറാനിലേക്ക് യുഎഇയിൽ നിന്ന് 3 ബില്യൺ ഡോളർ കൈമാറിയെന്ന ആരോപണങ്ങൾ അടുത്തിടെ ചില അന്തർദേശീയ മാധ്യമങ്ങളിലൂടെ പ്രചരിച്ചതിനെ തുടർന്നാണ് യുഎഇയുടെ ഔദ്യോഗിക വിശദീകരണം പുറത്തുവന്നത്. രാജ്യത്തിന്റെ സാമ്പത്തിക ഇടപാടുകളെക്കുറിച്ചും അന്താരാഷ്ട്ര ധനകാര്യ സംവിധാനങ്ങളിലെ സുതാര്യതയെക്കുറിച്ചും തെറ്റിദ്ധാരണ സൃഷ്ടിക്കുന്ന തരത്തിലുള്ള വാർത്തകൾ ഉത്തരവാദിത്തമില്ലാത്ത നടപടിയാണെന്നും അധികൃതർ വ്യക്തമാക്കി.
വാർത്തകൾ പ്രസിദ്ധീകരിക്കുമ്പോൾ കൃത്യത ഉറപ്പാക്കണമെന്നും ഔദ്യോഗിക സ്രോതസുകളിൽ നിന്ന് ലഭിക്കുന്ന വിവരങ്ങളെ മാത്രം ആശ്രയിക്കണമെന്നും യുഎഇ വിദേശകാര്യ മന്ത്രാലയം മാധ്യമങ്ങളോട് അഭ്യർഥിച്ചു. സ്ഥിരീകരിക്കാത്ത വിവരങ്ങളും അടിസ്ഥാനരഹിതമായ ആരോപണങ്ങളും പ്രചരിപ്പിക്കുന്നത് ഒഴിവാക്കണമെന്നും മന്ത്രാലയം മുന്നറിയിപ്പ് നൽകി.
അന്താരാഷ്ട്ര രാഷ്ട്രീയ-സാമ്പത്തിക വിഷയങ്ങളുമായി ബന്ധപ്പെട്ട വാർത്തകൾ പ്രസിദ്ധീകരിക്കുമ്പോൾ മാധ്യമങ്ങൾ കൂടുതൽ ജാഗ്രത പാലിക്കേണ്ടതിന്റെ ആവശ്യകതയും മന്ത്രാലയം ഓർമ്മിപ്പിച്ചു.
