അബുദാബി, അൽ ഐൻ, അൽ ദഫ്ര എന്നിവിടങ്ങളിലെ ‘ഫ്യൂച്ചർ എന്റർപ്രണർ പ്രോഗ്രാം’ വേനൽക്കാല ക്യാമ്പിൽ നാല് മുതൽ 18 വയസ്സ് വരെയുള്ള കുട്ടികൾക്ക് ഡിജിറ്റൽ സുരക്ഷാ പരിശീലനം നൽകുന്നു.
അബുദാബി : ഭാവിയിലെ യുവ സംരംഭകർക്കായി വേനൽക്കാല ഡിജിറ്റൽ സുരക്ഷാ പരിശീലന പരിപാടിയുമായി യു.എ.ഇ ഖലീഫ ഫണ്ട് ഫോർ എന്റർപ്രൈസ് ഡെവലപ്മെന്റും സൈബർ സെക്യൂരിറ്റി കൗൺസിലും. ‘ഫ്യൂച്ചർ എന്റർപ്രണർ പ്രോഗ്രാം 2026’ സമ്മർ ക്യാമ്പിന്റെ ഭാഗമായാണ് പ്രത്യേക സൈബർ അവബോധ സെഷനുകൾ സംഘടിപ്പിക്കുന്നത്.
“ഇന്നത്തെ വേനൽക്കാലം, നാളത്തെ സംരംഭങ്ങൾ… സുരക്ഷിതത്വത്തോടും ആത്മവിശ്വാസത്തോടും കൂടി” എന്ന പ്രമേയത്തിലാണ് പദ്ധതിയൊരുക്കിയിരിക്കുന്നത്. അബുദാബി, അൽ ഐൻ, അൽ ദഫ്ര എന്നിവിടങ്ങളിലായി നടക്കുന്ന പരിശീലനത്തിൽ വ്യക്തിഗത വിവര സംരക്ഷണം, ഡിജിറ്റൽ ഐഡന്റിറ്റി സുരക്ഷിതമാക്കൽ, ഓൺലൈൻ പേയ്മെന്റ് പ്ലാറ്റ്ഫോമുകളുടെ സുരക്ഷിതമായ ഉപയോഗം എന്നിവ കേന്ദ്രീകരിച്ചാണ് ക്ലാസുകൾ.
ബിസിനസുകൾ ഡിജിറ്റൽ സംവിധാനങ്ങളെയും ഓൺലൈൻ ഇടപാടുകളെയും കൂടുതൽ ആശ്രയിക്കുന്ന പുതിയ കാലത്ത്, തുടക്കത്തിൽ തന്നെ സൈബർ ഭീഷണികൾ തിരിച്ചറിയാനും പ്രതിരോധിക്കാനും കുട്ടികളെ പ്രാപ്തരാക്കുകയാണ് ലക്ഷ്യം. ഡിജിറ്റൽ വിവരങ്ങൾ സുരക്ഷിതമായി സൂക്ഷിക്കുന്നത് ഒരു ബിസിനസിന്റെ സുസ്ഥിരമായ വളർച്ചയ്ക്ക് എത്രത്തോളം പ്രധാനമാണെന്ന് ക്യാമ്പ് വിശദീകരിക്കുന്നു.
നാല് മുതൽ 18 വയസ്സ് വരെയുള്ള കുട്ടികൾക്കും കൗമാരക്കാർക്കുമായി യംഗ് ഇന്നൊവേറ്റേഴ്സ്, ഫൗണ്ടേഷൻ സ്റ്റേജ്, ഇന്റർമീഡിയറ്റ് സ്റ്റേജ്, അഡ്വാൻസ്ഡ് സ്റ്റേജ് എന്നിങ്ങനെ നാല് പഠന നിലവാരങ്ങളിലായാണ് ക്യാമ്പ് തരംതിരിച്ചിരിക്കുന്നത്.
പ്രായോഗിക പരിശീലനങ്ങൾ, വർക്ക്ഷോപ്പുകൾ, മെന്ററിംഗ്, പ്രോജക്ട് പ്രസന്റേഷനുകൾ എന്നിവ ഉൾപ്പെടുന്നതാണ് ക്യാമ്പ്. സ്വന്തം ബിസിനസ് ആശയങ്ങൾ വികസിപ്പിക്കുന്നതിനൊപ്പം ഡിജിറ്റൽ സുരക്ഷ ഉറപ്പാക്കാനും കളരിയിൽ കുട്ടികളെ പഠിപ്പിക്കുന്നു. ക്യാമ്പ് പൂർത്തിയാക്കുന്ന വിദ്യാർത്ഥികൾക്ക് ബിരുദദാന ചടങ്ങിൽ സർട്ടിഫിക്കറ്റുകൾ വിതരണം ചെയ്യും.
ഡിജിറ്റൽ സാമ്പത്തിക രംഗത്ത് മുന്നേറുന്ന യു.എ.ഇയിൽ സുരക്ഷിതമായ ബിസിനസ് അന്തരീക്ഷം സൃഷ്ടിക്കാനും, വിവരസാങ്കേതികവിദ്യ ഉത്തരവാദിത്തത്തോടെ ഉപയോഗിക്കാൻ യുവതലമുറയെ പ്രാപ്തരാക്കാനും ഈ സംരംഭം വഴി സാധിക്കുമെന്ന് അധികൃതർ വ്യക്തമാക്കി.
