ദേശീയ സേവനത്തിന്റെ ഭാഗമായി 11 മാസം നീളുന്ന പ്രത്യേക പരിശീലനം; യുവ എമിറാത്തികൾക്ക് മികച്ച അവസരം.
അബുദാബി, ഓഗസ്റ്റ് 27, 2026:യുഎഇയുടെ ദേശീയ പ്രതിരോധ ശേഷി ശക്തിപ്പെടുത്തുന്നതിനും ഭാവിയിലെ ആവശ്യങ്ങൾക്കനുസൃതമായി സജ്ജരായ സൈനിക റിസർവ് ശക്തിയെ രൂപപ്പെടുത്തുന്നതിനുമായി പ്രതിരോധ മന്ത്രാലയം ‘ബിലാദി’ (Beladi) പദ്ധതിക്ക് തുടക്കം കുറിച്ചു.
ദേശീയ സേവന (National Service) വ്യവസ്ഥകളുടെ ഭാഗമായി പ്രവർത്തിക്കുന്ന ഈ പദ്ധതി 11 മാസം നീണ്ടുനിൽക്കുന്നതാണ്. എമിറാത്തി യുവാക്കളിൽ നേതൃത്വപാടവവും സാങ്കേതിക പ്രാഗത്ഭ്യവും വളർത്തുക എന്ന ലക്ഷ്യത്തോടെയാണ് പദ്ധതി ആസൂത്രണം ചെയ്തിരിക്കുന്നത്.
ആദ്യ വർഷത്തിൽ പൈലറ്റ് അടിസ്ഥാനത്തിൽ ആരംഭിച്ച ഈ പദ്ധതിയിലേക്ക് മികച്ച ഉദ്യോഗാർത്ഥികളെയാണ് തെരഞ്ഞെടുത്തിരിക്കുന്നത്. പ്രാരംഭ ഘട്ടത്തിൽ മനഃശാസ്ത്രപരമായ പരിശോധനകൾ, കായികക്ഷമതാ വിലയിരുത്തലുകൾ, അഭിമുഖങ്ങൾ എന്നിവ അടങ്ങിയ പ്രത്യേക ‘നേതൃത്വ ശേഷി നിർണ്ണയ’ (Leadership Competency Assessment) പ്രക്രിയയ്ക്ക് തെരഞ്ഞെടുക്കപ്പെട്ടവർ വിധേയരായി.
യുഎഇ സായുധ സേനയിലെ വിദഗ്ധരായ പരിശീലകരും ഉദ്യോഗസ്ഥരും നൽകുന്ന നേരിട്ടുള്ള ക്ലാസുകളും പ്രായോഗിക ആയുധ-തന്ത്രപരമായ പരിശീലനങ്ങളും പദ്ധതിയിൽ ഉൾപ്പെടുന്നു. വരും വർഷങ്ങളിൽ കൂടുതൽ പ്രത്യേക പരിശീലന മേഖലകൾ (specialised pathways) ഈ പദ്ധതിക്ക് കീഴിൽ കൂട്ടിച്ചേർക്കുമെന്ന് പ്രതിരോധ മന്ത്രാലയം അറിയിച്ചു.
സൈനിക പരിശീലനത്തിനപ്പുറം, യുവ തലമുറയും രാജ്യത്തിന്റെ പ്രതിരോധ സംവിധാനങ്ങളും തമ്മിലുള്ള ബന്ധം കൂടുതൽ ശക്തമാക്കാനും ഭാവിയിലെ അടിയന്തര സാഹചര്യങ്ങൾ നേരിടാൻ ശേഷിയുള്ള കരുത്തുറ്റ ഒപ്പറേണൽ റിസർവ് ഫോഴ്സിനെ തയ്യാറാക്കി നിർത്താനും ബിലാദി പദ്ധതി സഹായിക്കും.
