അബൂദബി: സൗഹൃദ സന്ദർശനത്തിനായി അബൂദബിയിലെത്തിയ ഖത്തർ അമീർ ശൈഖ് തമീം ബിൻ ഹമദ് ആൽ ഥാനി, യു.എ.ഇ പ്രസിഡന്റായ ശൈഖ് മുഹമ്മദ് ബിൻ സായിദ് ആൽ നഹ്യാനുമായി കൂടിക്കാഴ്ച നടത്തി. ശനിയാഴ്ച അൽ ബതീൻ വിമാനത്താവളത്തിൽ എത്തിയ അമീറിനെ ശൈഖ് മുഹമ്മദ് നേരിട്ടെത്തി സ്വീകരിച്ചു.
തുടർന്ന് നടന്ന കൂടിക്കാഴ്ചയിൽ മേഖലയിലെ സമാധാനവും സ്ഥിരതയും ഉറപ്പാക്കേണ്ടതിന്റെ പ്രധാന്യം ഇരുനേതാക്കളും ഊന്നിപ്പറഞ്ഞു. ഇരു രാജ്യങ്ങളും തമ്മിലുള്ള സഹകരണം കൂടുതൽ ശക്തിപ്പെടുത്തുന്നതിനുള്ള മാർഗങ്ങൾ സംബന്ധിച്ചും ചർച്ചകൾ നടന്നു.
അമീറിനെ സ്വീകരിക്കാൻ വൈസ് പ്രസിഡന്റും ഉപപ്രധാനമന്ത്രിയും പ്രസിഡൻഷ്യൽ കോർട്ട് ചെയർമാനുമായ ശൈഖ് മൻസൂർ ബിൻ സായിദ് ആൽ നഹ്യാൻ, ദുബൈ കിരീടാവകാശിയും ഉപപ്രധാനമന്ത്രിയും പ്രതിരോധമന്ത്രിയുമായ ഹംദാൻ ബിൻ മുഹമ്മദ് ബിൻ റാശിദ് ആൽ മക്തൂം, അബൂദബി ഉപഭരണാധികാരിയും ദേശീയ സുരക്ഷാ ഉപദേഷ്ടാവുമായ തഹ്നൂൻ ബിൻ സായിദ് ആൽ നഹ്യാൻ, ഉപപ്രധാനമന്ത്രിയും ആഭ്യന്തരമന്ത്രിയുമായ സൈഫ് ബിൻ സായിദ് ആൽ നഹ്യാൻ എന്നിവർ സന്നിഹിതരായിരുന്നു.
ഖത്തർ പ്രതിനിധി സംഘത്തിൽ അമീറിന്റെ വ്യക്തിഗത പ്രതിനിധിയായ ജാസിം ബിൻ ഹമദ് ആൽ ഥാനി, ഒളിമ്പിക് കൗൺസിൽ ഓഫ് ഏഷ്യയുടെ പ്രസിഡന്റും ഖത്തർ ഒളിമ്പിക് കമ്മിറ്റി പ്രസിഡന്റുമായ ജുആൻ ബിൻ ഹമദ് ആൽ ഥാനി, അമീരി ദിവാൻ മേധാവി അബ്ദുല്ല ബിൻ മുഹമ്മദ് അൽ ഖുലൈഫി തുടങ്ങിയ മുതിർന്ന ഉദ്യോഗസ്ഥരും പങ്കെടുത്തു.
