ഷാർജ: ഏപ്രിൽ ഫൂൾ ദിനവുമായി ബന്ധപ്പെട്ട് സമൂഹമാധ്യമങ്ങളിൽ തെറ്റായ വിവരങ്ങൾ പങ്കുവെക്കുന്നതിനെതിരെ കർശന മുന്നറിയിപ്പുമായി ഷാർജ പബ്ലിക് പ്രോസിക്യൂഷൻ. തമാശയുടെ പേരിലായാലും തെറ്റായതോ തെറ്റിദ്ധരിപ്പിക്കുന്നതോ ആയ ഉള്ളടക്കങ്ങൾ പങ്കുവെക്കുന്നത് യുഎഇ നിയമപ്രകാരം കുറ്റകരമാണെന്ന് അധികൃതർ വ്യക്തമാക്കി.
ഏപ്രിൽ ഫൂൾ ദിനത്തിൽ വ്യാജവാർത്തകളും കബളിപ്പിക്കൽ ഉള്ളടക്കങ്ങളും വ്യാപകമായി പ്രചരിക്കുന്ന സാഹചര്യത്തിലാണ് ഈ മുന്നറിയിപ്പ്. പൊതുജനങ്ങളെ തെറ്റിദ്ധരിപ്പിക്കുന്നതും ഭീതി പരത്തുന്നതുമായ ഉള്ളടക്കങ്ങൾ പൊതുതാൽപര്യത്തിന് ഹാനികരമാണെന്നും അധികൃതർ ചൂണ്ടിക്കാട്ടി.
യുഎഇ നിയമപ്രകാരം തെറ്റായ വിവരങ്ങൾ പ്രചരിപ്പിക്കുന്നവർക്ക് ഒരു വർഷം വരെ തടവും 1 ലക്ഷം ദിർഹം വരെ പിഴയും ലഭിക്കാം. സർക്കാർ സ്ഥാപനങ്ങളെയോ അധികാരികളെയോ ലക്ഷ്യമിട്ട് ഉള്ളടക്കം പങ്കുവെച്ചാൽ ശിക്ഷ കൂടുതൽ കർശനമാകും. അത്തരത്തിലുള്ള കേസുകളിൽ രണ്ട് വർഷം വരെ തടവും 2 ലക്ഷം ദിർഹം വരെ പിഴയും ലഭിക്കാം.
തമാശയെന്ന പേരിൽ ഇത്തരം പ്രവർത്തനങ്ങൾ ന്യായീകരിക്കാനാകില്ലെന്നും അധികൃതർ വ്യക്തമാക്കി. സാമൂഹ്യമാധ്യമങ്ങളിൽ ഉള്ളടക്കം പങ്കുവെക്കുമ്പോൾ പൊതുജനങ്ങൾ ഉത്തരവാദിത്തത്തോടെ പെരുമാറണമെന്നും, തെറ്റായ അല്ലെങ്കിൽ സ്ഥിരീകരിക്കാത്ത വിവരങ്ങൾ പ്രചരിപ്പിക്കുന്നത് ഒഴിവാക്കണമെന്നും ഷാർജ പബ്ലിക് പ്രോസിക്യൂഷൻ ആവശ്യപ്പെട്ടു.
