അബൂദബി: ഈദ് അൽ അദ്ഹ ആഘോഷങ്ങൾക്ക് മുന്നോടിയായി രാജ്യത്തെ വിവിധ ശിക്ഷാനടപടി സ്ഥാപനങ്ങളിൽ കഴിയുന്ന 956 തടവുകാർക്ക് മോചനം അനുവദിച്ച് യുഎഇ പ്രസിഡന്റ് ശൈഖ് മുഹമ്മദ് ബിൻ സായിദ് അൽ നഹ്യാൻ. തടവുകാരുടെ ശിക്ഷയുമായി ബന്ധപ്പെട്ട സാമ്പത്തിക ബാധ്യതകളും വ്യക്തിപരമായി ഏറ്റെടുക്കുമെന്ന് പ്രസിഡന്റിന്റെ ഓഫീസ് അറിയിച്ചു.
മാനുഷിക പരിഗണന മുൻനിർത്തിയുള്ള ഈ തീരുമാനം കുടുംബബന്ധങ്ങളും സാമൂഹിക ഐക്യവും ശക്തിപ്പെടുത്തുന്നതിനുള്ള യുഎഇ നേതൃത്വത്തിന്റെ പ്രതിബദ്ധതയെയാണ് പ്രതിഫലിപ്പിക്കുന്നത്. പ്രത്യേകിച്ച് ഈദ് അൽ അദ്ഹ പോലുള്ള വിശുദ്ധ ആഘോഷ വേളയിൽ തടവുകാർക്ക് സമൂഹത്തിലേക്ക് തിരിച്ചുചേരാനും കുടുംബങ്ങളോടൊപ്പം സമയം ചെലവഴിക്കാനും അവസരം നൽകുകയാണ് നടപടിയുടെ പ്രധാന ലക്ഷ്യം.
സമൂഹത്തിൽ കരുണ, സഹവർത്തിത്വം, സാമൂഹിക ഉത്തരവാദിത്വം എന്നീ മൂല്യങ്ങൾ ശക്തിപ്പെടുത്തുന്നതിനായി യുഎഇ ഭരണകൂടം പതിവായി ഇത്തരം മാനുഷിക ഇടപെടലുകൾ നടത്താറുണ്ട്. തടവുകാർക്ക് പുതുജീവിതത്തിനുള്ള അവസരം ഒരുക്കുന്നതിനൊപ്പം കുടുംബങ്ങളുടെ മാനസിക സ്ഥിരതക്കും ഈ നടപടി സഹായകരമാകുമെന്നാണ് വിലയിരുത്തൽ.
