ചാൻസലർ ഫ്രീഡ്രിഹ് മെർസ് പങ്കെടുത്തു; ഇരുരാജ്യങ്ങളും തമ്മിലുള്ള തന്ത്രപ്രധാന സഹകരണം കൂടുതൽ ശക്തമാക്കും
ബെർലിൻ — ഔദ്യോഗിക സന്ദർശനത്തിനായി ജർമനിയിലെത്തിയ യുഎഇ പ്രസിഡന്റ് ശൈഖ് മുഹമ്മദ് ബിൻ സായിദ് അൽ നഹ്യാന് ബെർലിനിൽ ഊഷ്മള സ്വീകരണം. ജർമൻ ഫെഡറൽ പ്രസിഡന്റ് ഫ്രാങ്ക്-വാൾട്ടർ സ്റ്റെയിൻമെയർ അദ്ദേഹത്തിന്റെ ബഹുമാനാർഥം ഔദ്യോഗിക വിരുന്ന് സൽക്കാരം നടത്തി.
ജർമൻ ചാൻസലർ ഫ്രീഡ്രിഹ് മെർസ്, യുഎഇ ഉപപ്രധാനമന്ത്രിയും വിദേശകാര്യ മന്ത്രിയുമായ ശൈഖ് അബ്ദുല്ല ബിൻ സായിദ് അൽ നഹ്യാൻ എന്നിവരുൾപ്പെടെ ഇരുരാജ്യങ്ങളിലെയും ഉന്നതതല പ്രതിനിധി സംഘം ചടങ്ങിൽ സംബന്ധിച്ചു.
യുഎഇയും ജർമനിയും തമ്മിലുള്ള ദീർഘകാല സുഹൃദ്ബന്ധം പരസ്പര വിശ്വാസത്തിലും വികസന പങ്കാളിത്തത്തിലുമാണ് അധിഷ്ഠിതമായിരിക്കുന്നതെന്ന് ശൈഖ് മുഹമ്മദ് വ്യക്തമാക്കി. യുഎഇ ഫെഡറേഷൻ രൂപീകരണത്തിന് മുമ്പുതന്നെ രാജ്യത്തിന്റെ വികസനത്തിൽ പങ്കാളികളായവരാണ് ജർമൻ സമൂഹമെന്ന് അദ്ദേഹം അനുസ്മരിച്ചു. ഇരുനൂറിലധികം രാജ്യങ്ങളിൽ നിന്നുള്ള ജനങ്ങൾക്ക് സുരക്ഷിതവും സമൃദ്ധവുമായ തൊഴിൽ-ജീവിത അന്തരീക്ഷമാണ് യുഎഇ ഒരുക്കുന്നതെന്നും കൂടുതൽ ജർമൻ വിദഗ്ധരെ രാജ്യത്തേക്ക് സ്വാഗതം ചെയ്യുന്നതായും അദ്ദേഹം പറഞ്ഞു.
ഇരുരാജ്യങ്ങളും തമ്മിലുള്ള ബന്ധം ദൃഢമാക്കുന്നതിൽ യുഎഇ പ്രസിഡന്റ് വഹിക്കുന്ന പങ്കിനെ പ്രസിഡന്റ് സ്റ്റെയിൻമെയർ അഭിനന്ദിച്ചു. വ്യവസായം, ഊർജം, നൂതന സാങ്കേതികവിദ്യ എന്നീ മേഖലകളിൽ യുഎഇയുമായുള്ള സഹകരണം കൂടുതൽ വിപുലമാക്കാൻ ജർമനി ആഗ്രഹിക്കുന്നതായി അദ്ദേഹം വ്യക്തമാക്കി.
പ്രസിഡൻഷ്യൽ കോർട്ട് ഫോർ സ്പെഷ്യൽ അഫയേഴ്സ് ഡെപ്യൂട്ടി ചെയർമാൻ ശൈഖ് ഹംദാൻ ബിൻ മുഹമ്മദ് ബിൻ സായിദ് അൽ നഹ്യാൻ, യുഎഇ പ്രസിഡന്റിന്റെ ഉപദേഷ്ടാവ് ശൈഖ് മുഹമ്മദ് ബിൻ ഹമദ് ബിൻ തഹ്നൂൻ അൽ നഹ്യാൻ എന്നിവരും വിരുന്നിൽ പങ്കെടുത്തു.
