റസുവയിലും ത്രിശൂലി നദീതീരത്തും അത്യാധുനിക ഡ്രോണുകളും 3D മാപ്പിംഗും ഉപയോഗിച്ച് തിരച്ചിൽ ഊർജിതം; കണ്ടെത്തിയവരുടെ എണ്ണം 18 ആയി.
കാഠ്മണ്ഡു, സെപ്റ്റംബർ 12, 2026 : പ്രളയം കനത്ത നാശം വിതച്ച നേപ്പാളിൽ കാണാതായ പത്തുപേരെക്കൂടി യുഎഇ സെർച്ച് ആൻഡ് റെസ്ക്യൂ സംഘം സുരക്ഷിതമായി കണ്ടെത്തി. ഇതോടെ ദൗത്യം ആരംഭിച്ച ശേഷം യുഎഇ സംഘം കണ്ടെത്തിയവരുടെ എണ്ണം 18 ആയി ഉയർന്നതായി അധികൃതർ അറിയിച്ചു.
നേപ്പാൾ ദുരന്തനിവാരണ സേനയുമായി ചേർന്ന് അതീവ ദുർഘടമായ പ്രദേശങ്ങളിലാണ് യുഎഇ സംഘം തിരച്ചിൽ നടത്തുന്നത്. റസുവ ജില്ല, ത്രിശൂലി നദീതീരം, മണ്ണിടിച്ചിലുണ്ടായ സമീപ പ്രദേശങ്ങൾ എന്നിവിടങ്ങളിലാണ് നിലവിൽ പ്രവർത്തനങ്ങൾ കേന്ദ്രീകരിച്ചിരിക്കുന്നത്. ശക്തമായ മലവെള്ളപ്പാച്ചിലിലും മണ്ണിടിച്ചിലിലും ഗതാഗതം പൂർണമായി തടസ്സപ്പെട്ട ഇടങ്ങളിലേക്ക് ഡ്രോണുകളും 3D മാപ്പിങ് സാങ്കേതികവിദ്യയും ഉപയോഗിച്ചാണ് സംഘം എത്തിയത്.
രക്ഷാപ്രവർത്തനങ്ങൾക്ക് കരുത്തുപകർന്ന് അത്യാധുനിക ഉപകരണങ്ങളുമായി യുഎഇയുടെ അഞ്ചാമത്തെ ദുരിതാശ്വാസ വിമാനം കാഠ്മണ്ഡുവിൽ എത്തിച്ചേർന്നു. റബ്ബർ റെസ്ക്യൂ ബോട്ടുകൾ, അത്യാധുനിക ഡ്രോണുകൾ, വലിയ ജനറേറ്ററുകൾ, ലൈഫ് ഡിറ്റക്ഷൻ ഉപകരണങ്ങൾ എന്നിവയാണ് വിമാനത്തിൽ എത്തിച്ചത്. ഈ സാമഗ്രികൾ നേപ്പാൾ രക്ഷാപ്രവർത്തകർക്ക് കൈമാറും.
നേപ്പാൾ അധികൃതർ നൽകുന്ന കൃത്യമായ വിവരങ്ങളുടെയും മുൻഗണനകളുടെയും അടിസ്ഥാനത്തിലാണ് രക്ഷാദൗത്യം മുന്നോട്ട് കൊണ്ടുപോകുന്നതെന്ന് യുഎഇ റിലീഫ് ഓപ്പറേഷൻസ് ഡയറക്ടർ ഹമ്മൂദ് അൽ അഫാരി വ്യക്തമാക്കി. പ്രതികൂല കാലാവസ്ഥയിലും ഉൾപ്രദേശങ്ങളിലേക്ക് വേഗത്തിൽ എത്തിച്ചേരാൻ നേപ്പാൾ സേനയ്ക്ക് ആവശ്യമായ സാങ്കേതിക സഹായങ്ങളും ഉപകരണങ്ങളും യുഎഇ ഉറപ്പാക്കുന്നുണ്ടെന്നും അദ്ദേഹം അറിയിച്ചു.
കനത്ത മഴയിൽ നദികൾ കരകവിഞ്ഞൊഴുകിയതോടെ താഴ്ന്ന പ്രദേശങ്ങൾ ഇപ്പോഴും വെള്ളത്തിനടിയിലാണ്. വരുംദിവസങ്ങളിലും ത്രിശൂലി നദീതട കേന്ദ്രങ്ങളിൽ തിരച്ചിൽ ശക്തമായി തുടരാനാണ് സംയുക്ത സേനയുടെ തീരുമാനം.
