അൽ ഐനിലെ ഖസ്ർ ആമിരി പാലസിൽ സന്നദ്ധപ്രവർത്തകരെ ആദരിച്ചു; പുരസ്കാരം ദുബായ് പൊലീസ് ക്ലബ്ബിൽ നടന്ന അറബ് വോളണ്ടിയറിങ് ഫോറത്തിൽ.
അൽ ഐൻ —യുണൈറ്റഡ് അറബ് എമിറേറ്റ്സിലുടനീളം 12,000-ത്തിലധികം നിർധന കുടുംബങ്ങളിലേക്ക് കാരുണ്യഹസ്തമെത്തിച്ച ‘താങ്ക് യു ഫോർ ഗിവിങ്’ വളണ്ടിയർ ടീമിന് അറേബ്യൻ വേൾഡ് റെക്കോർഡ്സ് അംഗീകാരം.
മാනුഷിക സേവന രംഗത്ത് ശ്രദ്ധേയമായ നാഴികക്കല്ല് പിന്നിട്ട ടീമിലെ സന്നദ്ധപ്രവർത്തകരെ ആദരിക്കുന്നതിനായി അൽ ഐനിലെ ഖസ്ർ ആമിരി പാലസിൽ പ്രത്യേക വിജയാഘോഷം സംഘടിപ്പിച്ചു. വളണ്ടിയർ ടീം ചെയർമാനും എമിറേറ്റ്സ് കാൻസർ സൊസൈറ്റി ചെയർമാനുമായ ശൈഖ് ഡോ. സാലെം ബിൻ റക്കാദ് അൽ ആമിരി ചടങ്ങിൽ അധ്യക്ഷത വഹിക്കുകയും വിവിധ എമിറേറ്റുകളിൽ നിന്നുള്ള വോളണ്ടിയർമാർക്ക് ഉപഹാരങ്ങൾ സമ്മാനിക്കുകയും ചെയ്തു.
അറബ് വോളണ്ടിയറിങ് ഡേ ഫോറത്തിന്റെ ഭാഗമായി സെപ്റ്റംബർ 26-ന് ദുബായ് പൊലീസ് ഓഫീസേഴ്സ് ക്ലബ്ബിൽ നടന്ന ചടങ്ങിലാണ് സംഘടനയ്ക്ക് ഔദ്യോഗികമായി അറേബ്യൻ വേൾഡ് റെക്കോർഡ് സർട്ടിഫിക്കറ്റ് കൈമാറിയത്. ദുബായ് പൊലീസിന്റെ കമ്മ്യൂണിറ്റി വിഭാഗമായ പോസിറ്റീവ് സ്പിരിറ്റ് കൗൺസിലും അറബ് വോളന്ററി യൂണിയനും സംയുക്തമായാണ് ഫോറം സംഘടിപ്പിച്ചത്.
ഏഴ് എമിറേറ്റുകളിലുമുള്ള സാധാരണക്കാരായ പതിനായിരക്കണക്കിന് കുടുംബങ്ങളിലേക്ക് നേരിട്ട് സഹായമെത്തിക്കാൻ സന്നദ്ധപ്രവർത്തകർ നടത്തിയ ചിട്ടയായ പ്രവർത്തനങ്ങളെ ശൈഖ് സാലെം ബിൻ റക്കാദ് അഭിനന്ദിച്ചു. യുഎഇ ഉയർത്തിപ്പിടിക്കുന്ന മാനുഷിക മൂല്യങ്ങളും പരസ്പരസഹായ മനോഭാവവും സമൂഹത്തിൽ വേരോടിക്കാൻ ഇത്തരം കൂട്ടായ്മകൾ വലിയ പങ്കുവഹിക്കുന്നുണ്ടെന്ന് അദ്ദേഹം വ്യക്തമാക്കി.
അറേബ്യൻ വേൾഡ് റെക്കോർഡ്സ് മീഡിയ & ഇവന്റ്സ് ഡയറക്ടർ മുനീർ ബിൻ മൊഹിയുദ്ദീൻ, വിമൻ & ചിൽഡ്രൻസ് മിഷൻ മുൻ നാഷണൽ വൈസ് ചെയർമാൻ ഹിമാൻഷു, അനൂപ് കീച്ചേരി (യുഎഇ വാർത്ത), ഇല്യാസ് പള്ളിപ്പുറം (അബോൺ മെഡ്), ആബിദ് പാണ്ടിയാല (എം പ്ലസ് മീഡിയ) എന്നിവരുൾപ്പെടെ സാമൂഹിക, മാധ്യമ രംഗത്തെ പ്രമുഖർ അൽ ഐനിൽ നടന്ന ചടങ്ങിൽ പങ്കെടുത്തു.
