തിരുവനന്തപുരം: നിയമസഭ തെരഞ്ഞെടുപ്പിൽ ആത്മവിശ്വാസം വർധിച്ചതായി നേമത്തെ എൽ.ഡി.എഫ് സ്ഥാനാർഥി വി. ശിവൻകുട്ടി. ജനങ്ങളിൽ നിന്നുള്ള പ്രതികരണങ്ങൾ ഏറെ സന്തോഷകരമാണെന്നും ജനാധിപത്യ-മതേതര പ്രസ്ഥാനം വിജയിക്കുമെന്നത് വ്യക്തമായിക്കൊണ്ടിരിക്കുകയാണെന്നും അദ്ദേഹം പറഞ്ഞു.
മണക്കാട് പള്ളിയിൽ ഈദ് ഗാഹിന് ശേഷം സംസാരിക്കുകയായിരുന്നു ശിവൻകുട്ടി. മണ്ഡലത്തിലെ വോട്ടർമാർ വികസന തുടർച്ചയ്ക്കാണ് മുൻഗണന നൽകുന്നതെന്നും അദ്ദേഹം കൂട്ടിച്ചേർത്തു.
അതേസമയം, ചടയമംഗലം മണ്ഡലത്തിലെ എൽ.ഡി.എഫ് സ്ഥാനാർഥി ജെ. ചിഞ്ചുറാണിയും വിജയത്തിൽ ആത്മവിശ്വാസം പ്രകടിപ്പിച്ചു. മണ്ഡലത്തിന്റെ വിവിധ മേഖലകളിൽ സമഗ്ര വികസനം നടപ്പാക്കാൻ കഴിഞ്ഞുവെന്നും അതിന്റെ അടിസ്ഥാനത്തിൽ വലിയ ഭൂരിപക്ഷം നേടുമെന്നും അവർ പറഞ്ഞു.
കഴിഞ്ഞ പത്ത് വർഷത്തിനിടെ മണ്ഡലത്തിൽ ശ്രദ്ധേയമായ മാറ്റങ്ങൾ ഉണ്ടായതായി ചിഞ്ചുറാണി വ്യക്തമാക്കി. എൽ.ഡി.എഫിന്റെ ഒറ്റക്കെട്ടായ പ്രവർത്തനമാണ് ഇതിന് കാരണമെന്നും അവർ കൂട്ടിച്ചേർത്തു.
ചടയമംഗലം ‘ചുവന്ന മണ്ണാണ്’ എന്നും ഒരിക്കൽ മാത്രമാണ് മണ്ഡലം നഷ്ടപ്പെട്ടതെന്നും ഈ തെരഞ്ഞെടുപ്പിൽ യാതൊരു ടെൻഷനും ഇല്ലെന്നും അവർ പ്രതികരിച്ചു.
