ചെന്നൈ: തമിഴ്നാട് നിയമസഭ തെരഞ്ഞെടുപ്പിന്റെ വോട്ടെണ്ണൽ പുരോഗമിക്കുന്നതിനിടെ തമിഴക വെട്രി കഴകം നേതാവ് വിജയ്യുടെ വസതിക്ക് മുന്നിൽ വൻ തിരക്ക്. വോട്ടെണ്ണൽ വെറും നാല് റൗണ്ടുകൾ പിന്നിടുമ്പോൾ തന്നെ വിജയ് മത്സരിക്കുന്ന മണ്ഡലങ്ങളിൽ വ്യക്തമായ ലീഡ് നിലനിൽക്കുന്നതിനാൽ ആരാധകർ ആഘോഷം ആരംഭിച്ചു.
ചെന്നൈയിലെ പനയൂരിലുള്ള വിജയ്യുടെ വസതിക്ക് മുന്നിൽ ആയിരക്കണക്കിന് പ്രവർത്തകരും ആരാധകരുമാണ് തടിച്ചുകൂടിയത്. സ്ഥിതി നിയന്ത്രിക്കാൻ പൊലീസും സുരക്ഷാസേനയും വൻ സുരക്ഷാ സംവിധാനങ്ങളാണ് ഒരുക്കിയിരിക്കുന്നത്. സംഘർഷ സാധ്യത ഒഴിവാക്കുന്നതിനായി കർശന നിയന്ത്രണങ്ങളും ഏർപ്പെടുത്തി.
കോയമ്പത്തൂരിലെ വോട്ടെണ്ണൽ കേന്ദ്രങ്ങൾക്കും പാർട്ടി ഓഫീസുകൾക്കും മുന്നിലും ആഘോഷങ്ങൾ നിറഞ്ഞ ദൃശ്യങ്ങളാണ്. വിജയ്യുടെ ചിത്രങ്ങളുള്ള പതാകകൾ ഉയർത്തിയും പാട്ടും നൃത്തവുമായി പ്രവർത്തകർ ആവേശം പ്രകടിപ്പിക്കുന്നു. “ദളപതി” വിളികളാൽ പ്രദേശങ്ങൾ മുഴങ്ങുന്ന കാഴ്ചയാണ്.
നിലവിലെ ഫലസൂചനകൾ പ്രകാരം വിജയ് നയിക്കുന്ന തമിഴക വെട്രി കഴകം ഒന്നാം സ്ഥാനത്ത് മുന്നിലാണ്. എ.ഐ.എ.ഡി.എം.കെ നേതൃത്വം നൽകുന്ന സഖ്യം രണ്ടാം സ്ഥാനത്തും ഭരണകക്ഷിയായ ഡി.എം.കെ മൂന്നാം സ്ഥാനത്തുമാണ്. ഈ പ്രവണത സംസ്ഥാന രാഷ്ട്രീയത്തിൽ വലിയ മാറ്റത്തിന് വഴിയൊരുക്കുന്നുവെന്നാണ് വിലയിരുത്തൽ.
വിജയ് മത്സരിച്ച തിരുച്ചിറപ്പള്ളി ഈസ്റ്റ്, പെരമ്പൂർ മണ്ഡലങ്ങളിലുമുള്ള ലീഡും ശ്രദ്ധേയമാണ്. എന്നാൽ പുതുച്ചേരിയിൽ പാർട്ടിക്ക് പിന്നോട്ടുപോകുന്ന പ്രവണതയാണ് റിപ്പോർട്ടുകൾ സൂചിപ്പിക്കുന്നത്.
വിജയ്യുടെ രാഷ്ട്രീയ പ്രവേശനത്തിന് സിനിമാ ലോകത്തുനിന്നും വലിയ പിന്തുണ ലഭിച്ചിരിക്കുകയാണ്. വിജയ്യുടെ പിതാവും സംവിധായകനുമായ എസ്.എ. ചന്ദ്രശേഖർ വോട്ടെണ്ണലിന് മുൻപ് തിരുത്തണി മുരുകൻ ക്ഷേത്രത്തിൽ ദർശനം നടത്തിയിരുന്നു. നടന്മാരായ സിബി സത്യരാജ്, ജയ്, വരലക്ഷ്മി ശരത്കുമാർ, ശ്രീമൻ എന്നിവർ സാമൂഹിക മാധ്യമങ്ങളിലൂടെ പിന്തുണ അറിയിച്ചു.
ദ്രാവിഡ രാഷ്ട്രീയത്തിലെ പരമ്പരാഗത സമവാക്യങ്ങളെ മാറ്റിമറിക്കുന്ന തരത്തിൽ വിജയ്യുടെ മുന്നേറ്റം തുടരുകയാണെങ്കിൽ തമിഴ്നാട്ടിൽ പുതിയ രാഷ്ട്രീയ അധ്യായത്തിന് തുടക്കമാകുമെന്നാണ് രാഷ്ട്രീയ നിരീക്ഷകർ വിലയിരുത്തുന്നത്.
