ചെന്നൈ: തമിഴ്നാട് നിയമസഭ തെരഞ്ഞെടുപ്പിൽ നടൻ വിജയ് നയിക്കുന്ന തമിഴക വെട്രി കഴകം ശക്തമായ മുന്നേറ്റം തുടരുന്നതിനിടെ പനയൂരിലെ വിജയ്യുടെ വസതിയിൽ ആവേശകരമായ നിമിഷങ്ങൾ. വിജയ് മുന്നേറുന്ന സാഹചര്യത്തിൽ സന്തോഷം പങ്കിടാൻ നടി തൃഷ നേരിട്ട് വസതിയിലെത്തി.
തൃഷയുടെ പിറന്നാൾ ദിനം കൂടിയായതിനാൽ ഈ സന്ദർശനം കൂടുതൽ ശ്രദ്ധ നേടുകയും ചെയ്തു. തിരുപ്പതി ക്ഷേത്രത്തിൽ ദർശനം നടത്തിയ ശേഷം തന്നെ തൃഷ വിജയ്യുടെ വസതിയിലേക്ക് എത്തിയതായാണ് വിവരം. അടുത്ത സുഹൃത്ത് എന്ന നിലയിൽ വിജയ്യുടെ ഈ രാഷ്ട്രീയ നേട്ടത്തിൽ പങ്കുചേരാനാണ് തൃഷ എത്തിയത്.
തമിഴ്നാട് തെരഞ്ഞെടുപ്പുമായി ബന്ധപ്പെട്ട് കഴിഞ്ഞ ദിവസങ്ങളിൽ സാമൂഹിക മാധ്യമങ്ങളിൽ ഏറെ ചര്ച്ചയായ പേരാണ് തൃഷയുടെത്. വിജയ്യുടെ രാഷ്ട്രീയ പ്രവേശനത്തിന് പിന്നാലെ നടിക്കെതിരെ സൈബർ ആക്രമണങ്ങളും ഉണ്ടായിരുന്നുവെന്ന് റിപ്പോർട്ടുകളുണ്ട്. വിജയ്യുമായുള്ള സൗഹൃദം പോലും ചില രാഷ്ട്രീയ ചർച്ചകളിൽ വിവാദമായി ഉയർന്നിരുന്നു.
ഇതിനിടെ, വോട്ടെണ്ണൽ പുരോഗമിക്കുമ്പോൾ വിജയ്യുടെ പാർട്ടി നിരവധി മണ്ഡലങ്ങളിൽ ലീഡ് നേടി മുന്നേറുകയാണ്. ആദ്യ ഫലസൂചനകൾ പുറത്തുവന്നതോടെ ചെന്നൈയിലെ പനയൂരിൽ ആയിരക്കണക്കിന് ആരാധകർ എത്തി ആഘോഷങ്ങൾ ആരംഭിച്ചു.
തമിഴ് രാഷ്ട്രീയത്തിൽ പുതിയ ശക്തിയായി വിജയ് ഉയർന്നുവരുന്ന സാഹചര്യത്തിൽ സിനിമയും രാഷ്ട്രീയവും തമ്മിലുള്ള ബന്ധവും കൂടുതൽ ചർച്ചയാകുകയാണ്. വിജയ്യുടെ മുന്നേറ്റം തുടർന്നാൽ സംസ്ഥാനത്ത് പുതിയ രാഷ്ട്രീയ സമവാക്യങ്ങൾ രൂപപ്പെടാനിടയുണ്ടെന്നാണ് വിലയിരുത്തൽ.
