അബുദാബി: യുഎഇയിൽ വരും ദിവസങ്ങളിൽ കാലാവസ്ഥയിൽ കാര്യമായ മാറ്റമുണ്ടാകുമെന്ന് ദേശീയ കാലാവസ്ഥാ നിരീക്ഷണ കേന്ദ്ര(എൻസിഎം)ത്തിന്റെ മുന്നറിയിപ്പ്. വരും ദിവസങ്ങളിൽ രാജ്യം അസ്ഥിരമായ കാലാവസ്ഥയ്ക്ക് സാക്ഷ്യം വഹിക്കുമെന്നും ശനിയാഴ്ച വരെ താപനില ക്രമാനുഗതമായി വർധിക്കുമെന്നും റിപ്പോർട്ടുകൾ സൂചിപ്പിക്കുന്നു. പുലർച്ചെയും രാത്രിയിലും അനുഭവപ്പെടുന്ന കടുത്ത മൂടൽമഞ്ഞ് റോഡ് ഗതാഗതത്തെ ബാധിക്കാൻ സാധ്യതയുള്ളതിനാൽ ഡ്രൈവർമാർ ജാഗ്രത പാലിക്കണം.
ഇന്ന് (ചൊവ്വ) പുലർച്ചെ മുതൽ തീരദേശങ്ങളിലും ഉൾപ്രദേശങ്ങളിലും ദൂരക്കാഴ്ച പരിധി കുറയ്ക്കുന്ന രീതിയിൽ കനത്ത മഞ്ഞ് അനുഭവപ്പെട്ടേക്കാം. വടക്കൻ മേഖലകളിൽ ആകാശം ഭാഗികമായി മേഘാവൃതമായിരിക്കുമെന്നും ചിലയിടങ്ങളിൽ നേരിയ മഴയ്ക്ക് സാധ്യതയുണ്ടെന്നും കാലാവസ്ഥാ കേന്ദ്രം അറിയിച്ചു. പൊടിക്കാറ്റിനും സാധ്യതയുള്ളതിനാൽ ശ്വാസകോശ സംബന്ധമായ അസുഖമുള്ളവർ മുൻകരുതൽ എടുക്കണം. ബുധനാഴ്ചയോടെ അന്തരീക്ഷം തെളിയുമെങ്കിലും തീരദേശങ്ങളിലും പടിഞ്ഞാറൻ ഉൾപ്രദേശങ്ങളിലും മൂടൽമഞ്ഞ് തുടരും. വ്യാഴം, വെള്ളി ദിവസങ്ങളിലും സമാനമായ രീതിയിൽ രാവിലെ മഞ്ഞും പകൽ സമയങ്ങളിൽ ഭാഗികമായി മേഘാവൃതവുമായ കാലാവസ്ഥയായിരിക്കും അനുഭവപ്പെടുക.
കടൽ പൊതുവെ ശാന്തമായിരിക്കുമെങ്കിലും ചില സമയങ്ങളിൽ നേരിയ തോതിൽ തിരമാലകൾ ഉയർന്നേക്കാം.അറബ് മേഖലയിലെ ജ്യോതിശാസ്ത്ര കണക്കുകൾ പ്രകാരം മാർച്ച് 20-ഓടെ യുഎഇയിൽ ശൈത്യകാലത്തിന് ഔദ്യോഗികമായി വിടവാങ്ങലാകും. നിലവിൽ താപനില 18 ഡിഗ്രി സെൽഷ്യസ് മുതൽ 32 ഡിഗ്രി സെൽഷ്യസ് വരെ ഉയരാൻ സാധ്യതയുള്ളതിനാൽ വേനലിന്റെ വരവറിയിച്ചുകൊണ്ടുള്ള ചൂട് വരും ആഴ്ചകളിൽ പ്രകടമാകും. വടക്കൻ ഹിമാലയൻ കാറ്റുകളുടെ സ്വാധീനം കുറയുന്നതും സൂര്യൻ ഭൂമധ്യരേഖയ്ക്ക് നേരെ എത്തുന്നതുമാണ് താപനില ഉയരാൻ കാരണമാകുന്നത്. വരും മാസങ്ങളിൽ ‘സരയാത്ത്’ എന്ന് പ്രാദേശികമായി വിളിക്കപ്പെടുന്ന ഇടിമിന്നലോടുകൂടിയ മഴയ്ക്കും സാധ്യതയുണ്ടെന്ന് വിലയിരുത്തുന്നു
