ലോകത്തിലെ വിമാനത്താവളങ്ങൾ യാത്രാ കേന്ദ്രങ്ങളെന്നതിലുപരി ആധുനിക സൗകര്യങ്ങളോടുകൂടിയ വിനോദകേന്ദ്രങ്ങളായി മാറുന്ന സാഹചര്യത്തിൽ, 2026ലെ സ്കൈട്രാക്സ് വേൾഡ് എയർപോർട്ട് അവാർഡ്സിൽ സിംഗപ്പൂർ ഷാംഗി വിമാനത്താവളം വീണ്ടും ഒന്നാം സ്ഥാനത്തെത്തി. ഇത് 13-ാം തവണയാണ് ഷാംഗി ഈ നേട്ടം സ്വന്തമാക്കുന്നത്.
മികച്ച ഡൈനിംഗ്, മികച്ച ഇമിഗ്രേഷൻ സർവീസ്, ഏഷ്യയിലെ മികച്ച വിമാനത്താവളം തുടങ്ങിയ പുരസ്കാരങ്ങളും ഷാംഗി സ്വന്തമാക്കി.
ലോകത്തിലെ മികച്ച 10 വിമാനത്താവളങ്ങളുടെ പട്ടികയിൽ ഇടംപിടിച്ചവ:
- സിംഗപ്പൂർ ഷാംഗി (സിംഗപ്പൂർ)
- ഇഞ്ചിയോൺ ഇന്റർനാഷണൽ (ദക്ഷിണ കൊറിയ)
- ടോക്കിയോ ഹനേഡ (ജപ്പാൻ)
- ദോഹ ഹമദ് ഇന്റർനാഷണൽ (ഖത്തർ)
- ടോക്കിയോ നരിത (ജപ്പാൻ)
- പാരിസ് ചാൾസ് ഡി ഗോൾ (ഫ്രാൻസ്)
- മ്യൂണിക്ക് (ജർമ്മനി)
- ഇസ്താംബുൾ (തുർക്കി)
- സൂറിച്ച് (സ്വിറ്റ്സർലൻഡ്)
- വാൻകൂവർ ഇന്റർനാഷണൽ (കാനഡ)
ഇഞ്ചിയോൺ വിമാനത്താവളം ‘ഫാമിലി ഫ്രണ്ട്ലി’ വിഭാഗത്തിൽ ഒന്നാമതെത്തി രണ്ടാമത്തെ സ്ഥാനത്തേക്ക് ഉയർന്നു. അതേസമയം, പശ്ചിമേഷ്യൻ സംഘർഷങ്ങൾ കാരണം ദോഹ ഹമദ് വിമാനത്താവളം ആദ്യ സ്ഥാനങ്ങളിൽ നിന്ന് പിന്നോട്ട് പോകേണ്ടി വന്നു.
ഇസ്താംബുൾയും വാൻകൂവറും ഈ വർഷം ശ്രദ്ധേയമായ മുന്നേറ്റം നടത്തി. ഇസ്താംബുൾ 14-ാം സ്ഥാനത്തുനിന്ന് 8-ാം സ്ഥാനത്തേക്കും വാൻകൂവർ 13-ാം സ്ഥാനത്തുനിന്ന് 10-ാം സ്ഥാനത്തേക്കും ഉയർന്നു.
ഇന്ത്യൻ വിമാനത്താവളങ്ങളും മികച്ച പ്രകടനം കാഴ്ചവച്ചു. ഡൽഹി വിമാനത്താവളം ലോകത്തിലെ മികച്ച 30ൽ ഇടംപിടിച്ച ഏക ഇന്ത്യൻ വിമാനത്താവളമായി, 28-ാം സ്ഥാനത്തേക്ക് ഉയർന്നു. ദക്ഷിണേഷ്യയിലെ മികച്ച വിമാനത്താവളമെന്ന നില തുടർച്ചയായ എട്ടാം വർഷവും ഡൽഹി നിലനിർത്തി.
ഹൈദരാബാദ് വിമാനത്താവളം മികച്ച സ്റ്റാഫ് സേവനത്തിനുള്ള പുരസ്കാരം നേടി 43-ാം സ്ഥാനത്തേക്ക് ഉയർന്നു. ബംഗളൂരു കെംപെഗൗഡ വിമാനത്താവളം 41-ാം സ്ഥാനത്തും, ഗോവ മോപ്പ വിമാനത്താവളം ശുചിത്വത്തിൽ ഒന്നാമതും 64-ാം സ്ഥാനത്തും എത്തി. മുംബൈ വിമാനത്താവളം 66-ാം സ്ഥാനത്തേക്ക് മുന്നേറ്റം നടത്തി.
