ദുബായ്: യുഎഇയുടെ വികസനത്തിൽ നിർണായക പങ്കുവഹിക്കുന്ന തൊഴിലാളി സമൂഹത്തിന് ആദരവും സന്തോഷവും പകർന്ന് ദുബായിൽ വിപുലമായ ഈദ് അൽ അദ്ഹ ആഘോഷങ്ങൾ സംഘടിപ്പിക്കുന്നു. ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്സ് അഫയേഴ്സിന്റെ (GDRFA) നേതൃത്വത്തിലാണ് “സെലിബ്രേറ്റ് ഈദ് അൽ അദ്ഹ 2026 വിത്ത് ദുബായ്സ് വർക്ക്ഫോഴ്സ്” എന്ന പേരിൽ വമ്പിച്ച ആഘോഷ പരിപാടികൾ ഒരുക്കുന്നത്.
മേയ് 27, 28 തീയതികളിലായി അൽ ഖൂസ്, ജബൽ അലി, മുഹൈസ്ന (സോണാപൂർ) എന്നീ മേഖലകളിലാണ് ആഘോഷങ്ങൾ നടക്കുക. ഇതിൽ അൽ ഖൂസായിരിക്കും പ്രധാന വേദി. നേരിട്ടുള്ള പരിപാടികൾക്ക് പുറമെ ഡിജിറ്റൽ സംവിധാനങ്ങളും സമന്വയിപ്പിച്ചുകൊണ്ടുള്ള ഒരു ഹൈബ്രിഡ് ആഘോഷമായിരിക്കും ഇത്. ‘ബ്ലൂ കണക്ട്’ (Blue Connect) ആപ്പിലൂടെ ഓൺലൈൻ ആഘോഷങ്ങൾ തത്സമയം തൊഴിലാളികളിലേക്ക് നേരിട്ടെത്തും. ജോലിസ്ഥലങ്ങളിലിരുന്നും ക്യാമ്പുകളിലിരുന്നും കൂടുതൽ തൊഴിലാളികൾക്ക് ഈ ഈദ് ആഘോഷങ്ങളുടെ ഭാഗമാകാൻ ഇത് അവസരമൊരുക്കും.
തൊഴിലാളികളുടെ സന്തോഷവും ക്ഷേമവും മുൻനിർത്തി സംഘടിപ്പിക്കുന്ന പരിപാടിയിൽ ലക്ഷക്കണക്കിന് ദിർഹം വിലമതിക്കുന്ന സമ്മാനങ്ങളാണ് ഒരുക്കിയിരിക്കുന്നത്.സ്വർണം, കാഷ് പ്രൈസുകൾ, ഗിഫ്റ്റ് വൗച്ചറുകൾ, ആഡംബര കാർ സമ്മാനം എന്നിവ ഉൾപ്പെടെ 400-ലേറെ സമ്മാനങ്ങൾ വിജയികൾക്ക് ലഭിക്കും. ഓൺ ഗ്രൗണ്ട് പരിപാടികളോടൊപ്പം വെർച്വൽ ഇവന്റുകളും സംഘടിപ്പിക്കുന്നതിനാൽ കൂടുതൽ തൊഴിലാളികൾക്ക് ആഘോഷത്തിൽ പങ്കാളികളാകാൻ അവസരമൊരുങ്ങും.
പരിപാടിയിൽ സാംസ്കാരിക കലാപരിപാടികൾ, ഫോക് ഷോകൾ, ലൈവ് ഡി.ജെ പ്രകടനങ്ങൾ, നൃത്ത-സംഗീത അവതരണങ്ങൾ, ആപ്പ് അധിഷ്ഠിത ഗെയിമുകൾ, കുടുംബ സൗഹൃദ വിനോദങ്ങൾ എന്നിവയും അരങ്ങേറും. ഇന്ത്യയുൾപ്പെടെ വിവിധ രാജ്യങ്ങളിൽ നിന്നുള്ള കലാകാരൻമാർ പരിപാടിയുടെ ഭാഗമാകും. ഗായകരായ രൂപം ഭട്ടാചാര്യ, ബിസ്വജിത് മഹാപാത്ര, അങ്കുഷ് ഭർദ്വാജ് എന്നിവരും നർത്തകരായ അൻഷിക പാണ്ഡെ, രശ്മി ഗുപ്ത എന്നിവരും ഡി.ജെമാരായ അലി മർച്ചന്റ്, തസ്യ സ്റ്റെപനോവ എന്നിവരും ആഘോഷ വേദിയെ ആവേശഭരിതമാക്കും.
യു.എ.ഇയുടെ സഹിഷ്ണുതയും മാനവികതയും പ്രതിഫലിപ്പിക്കുന്ന ആഘോഷമായിരിക്കും ഇത്. രാജ്യത്തിന്റെ വളർച്ചയ്ക്ക് നിർണായക പങ്കുവഹിക്കുന്ന തൊഴിലാളികൾക്ക് സന്തോഷവും അംഗീകാരവും നൽകുക എന്നതാണ് ഈ പരിപാടിയുടെ പ്രധാന ലക്ഷ്യമെന്ന് ജി ഡി ആർ എഫ് എ ദുബായ് ഉപമേധാവി മേജർ ജനറൽ ഉബൈദ് മുഹൈർ ബിൻ സുറൂർ പറഞ്ഞു.വിവിധ സമൂഹങ്ങളെ ഒരുമിപ്പിക്കുന്ന ഈദ് ആഘോഷം ദുബായുടെ ബഹുസ്വര സാംസ്കാരിക മുഖത്തെ കൂടുതൽ ശക്തിപ്പെടുത്തുമെന്ന് അദ്ദേഹം കൂട്ടിച്ചേർത്തു.
“തൊഴിലാളികൾ സമൂഹത്തിന്റെ പ്രധാന ശക്തിയാണ്. അവരുടെ സന്തോഷവും മാനസിക ഉല്ലാസവും വർധിപ്പിക്കുന്നതിനായി വിനോദവും സമ്മാനങ്ങളും നിറഞ്ഞ പ്രത്യേക ആഘോഷമാണ് ഒരുക്കിയിരിക്കുന്നതെന്ന് ലേബർ റിലേഷൻസ് സെക്ടർ അസിസ്റ്റന്റ് ഡയറക്ടർ കേണൽ ഉമർ മത്തർ അൽ മുസൈന അഭിപ്രായപ്പെട്ടു .ഡിജിറ്റൽ, ഗ്രൗണ്ട് ഇവന്റുകൾ ഒരുമിച്ച് ഉൾപ്പെടുത്തിയിരിക്കുന്നതിനാൽ കൂടുതൽ തൊഴിലാളികൾക്ക് പങ്കാളികളാകാൻ അവസരം ലഭിക്കുമെന്ന് അദ്ദേഹം വ്യക്തമാക്കി
ദുബായിലെ വിവിധ സർക്കാർ-സ്വകാര്യ സ്ഥാപനങ്ങളുടെ സഹകരണത്തോടെയാണ് പരിപാടി സംഘടിപ്പിക്കുന്നത്. തൊഴിലാളി സമൂഹത്തിനായി സന്തോഷവും ഐക്യവും പങ്കിടുന്ന ഏറ്റവും വലിയ ഈദ് ആഘോഷങ്ങളിലൊന്നായിരിക്കും ഇത് .
