ഷാർജ : ഷാർജ സി.എസ്.ഐ പാരിഷ് അൽമായ ഫെലോഷിപ്പിന്റെ നേതൃത്വത്തിൽ നടത്തിവരുന്ന ജീവകാരുണ്യ പദ്ധതിയായ ‘കനിവ്’, ഈ വർഷം ക്രിസ്തീയ കരുതലിന്റെ കാരുണ്യ സ്പർശമായി വൃക്ക രോഗികൾക്ക് ആശ്വാസം ഏകുവാൻ ‘കനിവ് 2026’ എന്ന പേരിൽ വിപുലമായ പരിപാടികളോടെ സംഘടിപ്പിക്കുന്നു. ഗുരുതരമായ വൃക്കരോഗങ്ങളാൽ ദുരിതമനുഭവിക്കുന്നവരെ സഹായിക്കുന്നതിനാണ് ഈ വർഷം പദ്ധതിയിലൂടെ പ്രധാനമായും ശ്രദ്ധ കേന്ദ്രീകരിക്കുന്നത്. 2026 മേയ് 29-ന് വൈകിട്ട് 6.30-ന് ഷാർജ സി.എസ്.ഐ പാരിഷിലാണ് ഈ കാരുണ്യസന്ധ്യ അരങ്ങേറുന്നത്.
പദ്ധതിയുടെ ഭാഗമായി വൃക്കരോഗങ്ങളെക്കുറിച്ചും അവയുടെ പ്രതിരോധ, ചികിത്സാ മാർഗങ്ങളെക്കുറിച്ചും പൊതുജനങ്ങൾക്കായി ഒരു പ്രത്യേക ബോധവൽക്കരണ പരിപാടി ഒരുക്കിയിട്ടുണ്ട്. ദുബായ് ഹെൽത്തിലെ പ്രഗത്ഭ നെഫ്രോളജിസ്റ്റായ ഡോ. ധന്യ മോഹൻ ഈ സെഷന് നേതൃത്വം നൽകും. വൃക്കരോഗങ്ങൾ വർദ്ധിച്ചുവരുന്ന ഇന്നത്തെ സാഹചര്യത്തിൽ, രോഗപ്രതിരോധത്തിനും ആധുനിക ചികിത്സാ സാധ്യതകൾ മനസ്സിലാക്കുന്നതിനും ആവശ്യമായ വിലപ്പെട്ട നിർദ്ദേശങ്ങൾ നൽകാനാണ് ഈ ബോധവൽക്കരണ ക്ലാസ്സിലൂടെ ലക്ഷ്യമാക്കുന്നത്.
കനിവ് 2026-ന്റെ ഏറ്റവും വലിയ ആകർഷണം പ്രശസ്തമായ രണ്ട് കോറൽ ഗ്രൂപ്പുകൾ സംയുക്തമായി അവതരിപ്പിക്കുന്ന ബൃഹത്തായ സംഗീത വിരുന്നാണ്. യു.എ.ഇ-യിലെ പ്രമുഖ ക്രിസ്തീയ ഗായകസംഘമായ ‘ജോയ്ഫുൾ സിംഗേഴ്സ് യു.എ.ഇ’, ‘വൈ.എം.സി.എ ക്വയർ ബഹ്റൈൻ’ എന്നിവർ ചേർന്നാണ് ഈ സംഗീത സന്ധ്യ ഒരുക്കുന്നത്. ഇരു സംഘങ്ങളിൽ നിന്നുമായി 250-ഓളം ഗായകർ ഒരേ വേദിയിൽ അണിനിരക്കുന്ന ഈ സംഗീത വിരുന്ന് സംഗീതാസ്വാദകർക്ക് ഒരു അപൂർവ്വ അനുഭവമായിരിക്കും.
ഇതോടൊപ്പം, എൻ.ടി.വി ചെയർമാനും മാനേജിംഗ് ഡയറക്ടറുമായ മാത്തുകുട്ടി കടോനെ ഈ പരിപാടിയിൽ വിശിഷ്ടാതിഥിയായി പങ്കെടുക്കും.
ഇടവക വികാരി റവ. ജേക്കബ് ജോർജ്, അൽമായ ഫെലോഷിപ്പ് വൈസ് പ്രസിഡന്റ് ബിജു തോമസ് ഓവനാലിൽ, സെക്രട്ടറി അജീഷ് പി ചെറിയാൻ, കൺവീനർമാരായ എബി താഴികയിൽ, ജോസഫ് എബ്രഹാം എന്നിവരുടെ നേതൃത്വത്തിലുള്ള പ്രത്യേക കമ്മിറ്റിയാണ് പരിപാടികൾ ഏകോപിപ്പിക്കുന്നത്. സംഗീതവും കാരുണ്യവും ഇഴചേരുന്ന ഈ സായാഹ്നത്തിലേക്ക് എല്ലാവരെയും ഹാർദ്ദവമായി സ്വാഗതം ചെയ്യുന്നതായി ഭാരവാഹികൾ അറിയിച്ചു.
കൂടുതൽ കൂടുതൽ വിവരങ്ങൾക്കായി ബന്ധപ്പെടുക : 055 2231402
