ദുബായ്: യുഎഇയിലെ ആരോഗ്യ മേഖലയിൽ സ്വദേശിവൽക്കരണം കൂടുതൽ ശക്തമാക്കാനുള്ള നീക്കത്തിന്റെ ഭാഗമായി നഴ്സിങ് രംഗത്തും കൂടുതൽ സ്വദേശി നിയമനങ്ങൾക്ക് തയ്യാറെടുക്കുകയാണ് അധികൃതർ. സ്വദേശി യുവതീയുവാക്കളെ നഴ്സിങ് മേഖലയിലേക്ക് ആകർഷിക്കുന്നതിനായി പുതിയ പദ്ധതികളും പ്രോത്സാഹന നടപടികളും നടപ്പാക്കാനാണ് ലക്ഷ്യമിടുന്നത്.
കഴിഞ്ഞ രണ്ട് വർഷത്തിനിടെ 1,897 സ്വദേശികൾ നഴ്സിങ് തൊഴിൽ തിരഞ്ഞെടുത്തതായി ബന്ധപ്പെട്ട അധികൃതർ അറിയിച്ചു. നിലവിൽ രാജ്യത്തെ ആകെ നഴ്സുമാരിൽ സ്വദേശികളുടെ പങ്ക് 2.8 ശതമാനം മാത്രമാണ്. ഈ ശതമാനം ഗണ്യമായി ഉയർത്തുന്നതിനുള്ള ദീർഘകാല പദ്ധതികളാണ് സർക്കാർ ആവിഷ്കരിക്കുന്നത്.
നഴ്സിങ് മേഖലയെ സ്വദേശികൾക്ക് കൂടുതൽ ആകർഷകമാക്കുന്നതിനായി വിവിധ ആനുകൂല്യങ്ങളും ബോധവത്കരണ പരിപാടികളും നടപ്പാക്കുന്നുണ്ട്. മുൻപ് നിരവധി പദ്ധതികൾ ആരംഭിച്ചിരുന്നെങ്കിലും പ്രതീക്ഷിച്ച തോതിൽ സ്വദേശിവൽക്കരണ ലക്ഷ്യം കൈവരിക്കാൻ സാധിച്ചിരുന്നില്ല. ഇതോടെയാണ് കൂടുതൽ വ്യാപകമായ പ്രചാരണ പ്രവർത്തനങ്ങളിലേക്കും പരിശീലന പദ്ധതികളിലേക്കും അധികൃതർ ശ്രദ്ധ കേന്ദ്രീകരിക്കുന്നത്.
നിലവിൽ രാജ്യത്തെ വിവിധ വിദ്യാഭ്യാസ സ്ഥാപനങ്ങളിലായി ഏകദേശം 2,500 സ്വദേശി വിദ്യാർഥികൾ നഴ്സിങ് പഠനം തുടരുന്നുണ്ട്. ഭാവിയിൽ ആരോഗ്യ മേഖലയിലെ സ്വദേശി സാന്നിധ്യം വർധിപ്പിക്കുന്നതിൽ ഇവർ നിർണായക പങ്കുവഹിക്കുമെന്നാണ് വിലയിരുത്തൽ.
പ്രത്യേകിച്ച് പുരുഷന്മാർ നഴ്സിങ് രംഗത്തേക്ക് കടന്നുവരുന്നത് ആരോഗ്യ മന്ത്രാലയം പ്രതീക്ഷയോടെയാണ് കാണുന്നത്. ഏതാനും വർഷങ്ങൾക്ക് മുമ്പ് നഴ്സിങ് കോഴ്സുകളിൽ രണ്ട് ആൺ വിദ്യാർഥികൾ മാത്രമാണ് ഉണ്ടായിരുന്നതെങ്കിൽ ഇപ്പോൾ ആ എണ്ണം 300 ആയി ഉയർന്നിട്ടുണ്ട്. കൂടുതൽ പുരുഷ വിദ്യാർഥികളെ ഈ മേഖലയിലേക്ക് ആകർഷിക്കുന്നതിനായി പ്രത്യേക പദ്ധതികളും നടപ്പാക്കാൻ ആലോചനയുണ്ട്.
ആരോഗ്യ മേഖലയിലെ സ്വദേശിവൽക്കരണം ശക്തമാകുന്നത് ദീർഘകാലാടിസ്ഥാനത്തിൽ തൊഴിൽ വിപണിയിൽ മാറ്റങ്ങൾ സൃഷ്ടിക്കുമെന്നാണ് വിലയിരുത്തപ്പെടുന്നത്. അതേസമയം, ആരോഗ്യ സേവനങ്ങളുടെ ഗുണനിലവാരം ഉയർത്തുന്നതിനും സ്വദേശി മനുഷ്യവിഭവശേഷി വികസിപ്പിക്കുന്നതിനുമുള്ള ശ്രമങ്ങളുടെ ഭാഗമായാണ് ഈ നടപടികളെന്ന് അധികൃതർ വ്യക്തമാക്കുന്നു.
