ഏറ്റവും കൂടുതൽ പുരസ്കാരങ്ങൾ നേടിയ സ്ഥാപനമെന്ന നിലയിൽ ‘ഓവറോൾ വിന്നർ’ ബഹുമതിയും ദുബായ് ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിൻേഴ്സ് അഫയേഴ്സ് സ്വന്തമാക്കി.
ദുബായ്: ഉപഭോക്തൃ സേവന രംഗത്തെ അസാധാരണ മികവിനും നൂതന ആശയങ്ങൾക്കും അന്താരാഷ്ട്ര തലത്തിൽ ശ്രദ്ധേയമായ വൻ അംഗീകാരം സ്വന്തമാക്കി ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിൻേഴ്സ് അഫയേഴ്സ് ദുബായ് (GDRFA). മികച്ച ഉപഭോക്തൃ അനുഭവം ഉറപ്പാക്കുന്ന സ്ഥാപനങ്ങൾക്കായി ഏർപ്പെടുത്തിയ പ്രശസ്തമായ ‘ഗൾഫ് കസ്റ്റമർ എക്സ്പീരിയൻസ് അവാർഡ്സ് 2026’-ൽ ആറ് സുപ്രധാന പുരസ്കാരങ്ങളാണ് ജിഡിആർഎഫ്എ ദുബായ് അടിച്ചെടുത്തത്. ഈ വർഷത്തെ മേളയിൽ ഏറ്റവും കൂടുതൽ പുരസ്കാരങ്ങൾ നേടിയ സ്ഥാപനമെന്ന നിലയിൽ ‘ഓവറോൾ വിന്നർ’ എന്ന പരമോന്നത ബഹുമതിയും ജിഡിആർഎഫ്എയ്ക്ക് ലഭിച്ചു.
മനുഷ്യകേന്ദ്രിതവും ഭാവി മുന്നിൽ കണ്ടുകൊണ്ടുള്ളതുമായ സർക്കാർ സേവനങ്ങൾ ജനങ്ങളിലേക്ക് എത്തിക്കുന്നതിൽ ജിഡിആർഎഫ്എ ദുബായ് നടത്തുന്ന നിരന്തരമായ പ്രവർത്തനങ്ങൾക്കുള്ള പ്രതിഫലമാണ് ഈ ചരിത്ര നേട്ടം. വിവിധ മത്സര വിഭാഗങ്ങളിലായി നാല് സ്വർണ്ണ മെഡലുകളാണ് ഡയറക്ടറേറ്റ് സ്വന്തമാക്കിയത്. സേവനങ്ങൾ രൂപകൽപന ചെയ്യുമ്പോൾ ജനങ്ങൾക്ക് പ്രഥമ പരിഗണന നൽകിയതിന് ‘കസ്റ്റമർ അറ്റ് ദ ഹാർട്ട് ഓഫ് എവരിതിംഗ്’, എല്ലാവർക്കും എളുപ്പത്തിൽ പ്രാപ്യമാകുന്ന രീതിയിൽ മികച്ച ഡിജിറ്റൽ സേവനങ്ങൾ ഒരുക്കിയതിന് ‘ബെസ്റ്റ് ഡിജിറ്റൽ സി.എക്സ്’ എന്നീ വിഭാഗങ്ങളിൽ ജിഡിആർഎഫ്എ സ്വർണം നേടി.
കൂടാതെ, പൊതുജനങ്ങളുടെ അഭിപ്രായങ്ങൾ കൃത്യമായി വിലയിരുത്തി സേവനങ്ങൾ മെച്ചപ്പെടുത്തിയതിന് ‘ബെസ്റ്റ് യൂസ് ഓഫ് കസ്റ്റമർ ഇൻസൈറ്റ് ആൻഡ് ഫീഡ്ബാക്ക്’, സേവന നിലവാരം ഉയർത്തുന്ന സൃഷ്ടിപരമായ പരിഹാരങ്ങൾക്ക് ‘ബെസ്റ്റ് ഇന്നൊവേഷൻ ഇൻ സി.എക്സ്’ എന്നീ കാറ്റഗറികളിലും സുവർണ്ണ നേട്ടം ആവർത്തിച്ചു. ഇതിനുപുറമെ, സമഗ്രവും സുശക്തവുമായ ഉപഭോക്തൃ നയങ്ങൾ വിജയകരമായി നടപ്പാക്കിയതിന് ‘ബെസ്റ്റ് സി.എക്സ് സ്ട്രാറ്റജി’ വിഭാഗത്തിൽ വെള്ളി പുരസ്കാരവും ഡയറക്ടറേറ്റ് സ്വന്തമാക്കിയിട്ടുണ്ട്.
നൂതന ഡിജിറ്റൽ സാങ്കേതികവിദ്യകളുടെ ഫലപ്രദമായ ഉപയോഗത്തിലൂടെ കൂടുതൽ സുഗമവും ആവശ്യങ്ങൾ മുൻകൂട്ടി തിരിച്ചറിഞ്ഞ് നൽകുന്നതുമായ സേവനങ്ങളാണ് ഡയറക്ടറേറ്റ് പൊതുജനങ്ങൾക്ക് ഉറപ്പാക്കുന്നത്. ലോകോത്തര ഭാവി സർക്കാർ സേവനങ്ങളുടെ മികച്ച മാതൃകയായി ദുബായെ ആഗോളതലത്തിൽ ഉയർത്താൻ ഈ പുരസ്കാരങ്ങൾ വലിയ കരുത്താകുമെന്ന് വിലയിരുത്തപ്പെടുന്നു.
സ്ഥാപന നേതൃത്വത്തിന്റെ ദീർഘവീക്ഷണത്തോടെയുള്ള കാഴ്ചപ്പാടുകളുടെയും മികച്ച മാർഗനിർദേശങ്ങളുടെയും ഫലമാണ് ഈ ഉന്നത അംഗീകാരമെന്ന് ജിഡിആർഎഫ്എ ദുബായ് ലീഡർഷിപ്പ് ആൻഡ് ഫ്യൂച്ചർ സെക്ടർ അസിസ്റ്റന്റ് ഡയറക്ടർ ജനറൽ ബ്രിഗേഡിയർ അബ്ദുസമദ് ഹുസൈൻ സുലൈമാൻ വ്യക്തമാക്കി. ജനങ്ങളുടെ ആവശ്യങ്ങൾ കൃത്യമായി മനസ്സിലാക്കുന്നതിലൂടെയാണ് മികച്ച ഉപഭോക്തൃ സേവനം ആരംഭിക്കുന്നതെന്നും, അവരുടെ പ്രതീക്ഷകൾക്കും അപ്പുറത്തുള്ള മുൻകരുതൽ സേവനങ്ങൾ നൽകുക എന്നതാണ് തങ്ങളുടെ ശൈലിയെന്നും അദ്ദേഹം പറഞ്ഞു. മികച്ച ആശയങ്ങളെ ജനങ്ങൾക്ക് ഉപകാരപ്രദമായ സേവനങ്ങളാക്കി മാറ്റിയ വിവിധ വകുപ്പുകളുടെയും അസിസ്റ്റന്റ് ഡയറക്ടർ ജനറൽമാരുടെയും ജീവനക്കാരുടെയും കൂട്ടായ പരിശ്രമത്തിനുള്ള അംഗീകാരമാണിതെന്നും അദ്ദേഹം കൂട്ടിച്ചേർത്തു.
