ദുബൈ: കേരളത്തിന്റെ മുൻ മുഖ്യമന്ത്രിയും മുസ്ലിം ലീഗ് നേതാവുമായിരുന്ന സി.എച്ച്. മുഹമ്മദ് കോയയുടെ സ്മരണാർത്ഥം സംസ്ഥാനത്തുടനീളം സി.എച്ച്. സെന്റർ നടപ്പാക്കുന്ന മാനുഷിക സേവന പ്രവർത്തനങ്ങൾ സമാനതകളില്ലാത്തതാണെന്ന് കാഞ്ഞങ്ങാട് സി.എച്ച്. സെന്റർ യു.എ.ഇ. കേന്ദ്ര കമ്മിറ്റി ജനറൽ കൺവീനറും ദുബൈ കെ.എം.സി.സി വൈസ് പ്രസിഡന്റുമായ അബ്ദുള്ള ആറങ്ങാടി അഭിപ്രായപ്പെട്ടു.
ദുബായ് കെ.എം.സി.സി പി.കെ. കുഞ്ഞി അബ്ദുല്ല ഹാജി ഓഡിറ്റോറിയത്തിൽ സംഘടിപ്പിച്ച സി.എച്ച്. സെന്റർ ദുബായ് കാഞ്ഞങ്ങാട് ചാപ്റ്റർ കൺവെൻഷൻ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. സമൂഹത്തിലെ നിർധനർ, രോഗികൾ, അടിയന്തര സഹായം ആവശ്യമായവർ തുടങ്ങി നിരവധി ആളുകൾക്ക് ആശ്വാസവും കൈത്താങ്ങുമായി പ്രവർത്തിക്കുന്ന സ്ഥാപനമാണ് സി.എച്ച്. സെന്ററെന്നും അദ്ദേഹം പറഞ്ഞു.
ചടങ്ങിൽ ദുബായ് കാഞ്ഞങ്ങാട് ചാപ്റ്ററിന്റെ പുതിയ കമ്മിറ്റി രൂപീകരിക്കുകയും ഭാരവാഹികളെ തിരഞ്ഞെടുക്കുകയും ചെയ്തു. ഹനീഫ് ബാവ നഗർ ചെയർമാനായും ബഷീർ പാറപ്പള്ളി ജനറൽ കൺവീനറായും ആരിഫ് കൊത്തിക്കാൽ ട്രഷററായും അഷ്റഫ് ബച്ചൻ അതിഞ്ഞാൽ കോ-ഓർഡിനേറ്ററായും തിരഞ്ഞെടുക്കപ്പെട്ടു.
വൈസ് ചെയർമാൻമാരായി അഷ്റഫ് ഓട്ടോമിഡാസ്, ജലീൽ മെട്രോ, ഹനീഫ് കുളത്തിങ്ങൽ, സന മാണിക്കോത്ത്, ഖാലിദ് പാലക്കി, റഷീദ് ആവിയിൽ, കെ.എം.കെ. സുബൈർ, ഫൈസൽ മുട്ടുംതല എന്നിവർ തെരഞ്ഞെടുക്കപ്പെട്ടു. ജോയിന്റ് കൺവീനർമാരായി അസീസ് പടന്നക്കാട്, ബാവ മുഹമ്മദ് അലി, ഷുഹൈബ് ഭാവനഗർ, ഡോ. താജുദ്ദീൻ കാരാട്ട്, ഷാനിദ് മാണിക്കോത്ത്, അഷ്റഫ് ആവിയിൽ, ഇർഫാദ് തായൽ, ജലീൽ ഭാവനഗർ എന്നിവർ തിരഞ്ഞെടുക്കപ്പെട്ടു.
കൺവെൻഷനിൽ ഹനീഫ് ബാവ നഗർ അധ്യക്ഷത വഹിച്ചു. ജനറൽ കൺവീനർ ബഷീർ പാറപ്പള്ളി സ്വാഗതം പറഞ്ഞു. സി.എച്ച്. നൂറുദ്ദീൻ കാഞ്ഞങ്ങാട്, അഷ്റഫ് ഓട്ടോമിഡാസ്, ജലീൽ മെട്രോ, ഖാലിദ് പാലക്കി, റഷീദ് ആവിയിൽ എന്നിവർ സംസാരിച്ചു. ദുബായ് സി.എച്ച്. സെന്റർ ട്രഷറർ ആരിഫ് കൊത്തിക്കാൽ നന്ദി രേഖപ്പെടുത്തി.
പ്രവാസി സമൂഹത്തിന്റെ പിന്തുണയോടെ സാമൂഹിക പ്രതിബദ്ധതയുള്ള പ്രവർത്തനങ്ങൾ കൂടുതൽ ശക്തിപ്പെടുത്തുന്നതിനുള്ള പ്രതിജ്ഞയോടെയാണ് കൺവെൻഷൻ സമാപിച്ചത്.
