വർഷത്തിൽ ഒന്നോ രണ്ടോ ചെക്കുകൾ മുൻകൂട്ടി നൽകുന്ന രീതിക്ക് മാറ്റം; പ്രമുഖ റിയൽ എസ്റ്റേറ്റ് കമ്പനികളുമായി കൈകോർത്ത് ദുബായ് ലാൻഡ് ഡിപ്പാർട്ട്മെന്റ്.
ദുബായ്: ദുബായിലെ താമസക്കാർക്ക് വലിയ സാമ്പത്തിക ആശ്വാസം പകരുന്ന പുതിയ ‘ഫ്ലെക്സി റെന്റ്സ്’ (Flexi Rents) പദ്ധതിക്ക് ദുബായ് ലാൻഡ് ഡിപ്പാർട്ട്മെന്റ് (DLD) തുടക്കം കുറിച്ചു. വർഷം തോറും വലിയ തുകകൾ മുൻകൂറായി ചെക്കുകളായി നൽകേണ്ടി വരുന്ന നിലവിലെ രീതിക്ക് പകരം, വാടക തുക പ്രതിമാസ ഗഡുക്കളായോ കൃത്യമായ ഇടവേളകളിലോ അടയ്ക്കാൻ സാധിക്കുന്നതാണ് പദ്ധതി. ഇത് പ്രവാസികൾ ഉൾപ്പെടെയുള്ള ലക്ഷക്കണക്കിന് താമസക്കാരുടെ സാമ്പത്തിക ഭാരം ഗണ്യമായി കുറയ്ക്കും.
ചൊവ്വാഴ്ചയാണ് ദുബായ് ലാൻഡ് ഡിപ്പാർട്ട്മെന്റ് ഈ നിർണായക പ്രഖ്യാപനം നടത്തിയത്. ദുബായിലെ ഭവന മേഖല കൂടുതൽ സുസ്ഥിരവും ഉപഭോക്തൃ സൗഹൃദവുമാക്കുന്നതിന്റെ ഭാഗമായാണ് ഈ നടപടി. വർഷങ്ങളായി തുടരുന്ന പരമ്പരാഗത രീതി അനുസരിച്ച് ഒന്നോ രണ്ടോ അല്ലെങ്കിൽ നാലോ ആറോ ചെക്കുകളിലായാണ് താമസക്കാർ വാടക തുക നൽകാറുള്ളത്. ഇത് വലിയൊരു തുക ഒറ്റയടിക്ക് കണ്ടെത്താൻ കുടുംബങ്ങളെ നിർബന്ധിതരാക്കുകയും മറ്റ് ജീവിതച്ചെലവുകൾക്കൊപ്പം കനത്ത സാമ്പത്തിക പ്രതിസന്ധി സൃഷ്ടിക്കുകയും ചെയ്തിരുന്നു. പുതിയ പദ്ധതിയിലൂടെ ഈ പ്രതിസന്ധിക്കാണ് പരിഹാരമാകുന്നത്.
ഫ്ലെക്സി റെന്റ് മാതൃകയുടെ ആദ്യ ഘട്ടത്തിൽ, പദ്ധതിയുമായി സഹകരിക്കുന്ന പ്രമുഖ പ്രോപ്പർട്ടി മാനേജ്മെന്റ് കമ്പനികളും ഭൂവുടമകളും താമസക്കാരുടെ സാമ്പത്തിക ശേഷിക്ക് അനുസൃതമായ പ്ലാനുകൾ വാഗ്ദാനം ചെയ്യും. പ്രതിമാസ വാടക, മൂന്ന് മാസത്തിലൊരിക്കലുള്ള (ക്വാർട്ടർലി) പ്ലാനുകൾ, ആറ് മാസത്തിലൊരിക്കലുള്ള പ്ലാനുകൾ എന്നിവ ഇതിൽ ഉൾപ്പെടുന്നു. ചില സാഹചര്യങ്ങളിൽ വാടക കാലാവധി 12 മാസം വരെ നീട്ടി നൽകാനും വ്യവസ്ഥയുണ്ട്. ഇതിലൂടെ ശമ്പള വരുമാനത്തിന് അനുസരിച്ച് വാടക കൃത്യമായി ആസൂത്രണം ചെയ്യാൻ താമസക്കാർക്ക് സാധിക്കും.
വാടക ഇളവുകൾക്ക് പുറമെ അധിക ആനുകൂല്യങ്ങളും പദ്ധതി ഉറപ്പുനൽകുന്നുണ്ട്. കമ്പനികളുടെ തീരുമാനപ്രകാരം വാടകക്കാർക്ക് ഗ്രേസ് പിരീഡുകൾ, പരിഷ്കരിച്ച പേയ്മെന്റ് ഷെഡ്യൂളുകൾ, പ്രത്യേക പ്രൊമോഷണൽ ഓഫറുകൾ എന്നിവ ലഭിക്കും. കൂടാതെ ചെക്കുകൾ വൈകുമ്പോൾ ഈടാക്കാറുള്ള അഡ്മിനിസ്ട്രേറ്റീവ് ഫീസുകൾ ഒഴിവാക്കാനും വാടക വർദ്ധനവിന് താല്കാലിക നിയന്ത്രണം ഏർപ്പെടുത്താനും ചില ഉടമകൾ തയ്യാറായിട്ടുണ്ട്. ക്രെഡിറ്റ് കാർഡുകൾ, ഡെബിറ്റ് കാർഡുകൾ, പരമ്പരാഗത ചെക്കുകൾ എന്നിവ വഴി തുക കൈമാറാം. പുതിയ വാടകക്കാർക്ക് മാത്രമല്ല, നിലവിൽ കരാറുള്ളവർക്കും ഉടമകളുടെ സമ്മതത്തോടെ പുതിയ ഫ്ലെക്സി റെന്റ് രീതിയിലേക്ക് മാറാൻ സാധിക്കും.
പദ്ധതിയുടെ വിജയകരമായ നടത്തിപ്പിനായി ദുബായിലെ മുൻനിരയിലുള്ള 12 റിയൽ എസ്റ്റേറ്റ് കമ്പനികളുമായി ഡി.എൽ.ഡി കരാർ ഒപ്പിട്ടു കഴിഞ്ഞു. വസ്ൽ പ്രോപ്പർട്ടീസ്, ദിയാർ പ്രോപ്പർട്ടി മാനേജ്മെന്റ്, ദുബായ് വേൾഡ് റിയൽ എസ്റ്റേറ്റ്, മോഡേൺ റിയൽ എസ്റ്റേറ്റ്, ദുബായ് ഇൻവെസ്റ്റ്മെന്റ് റിയൽ എസ്റ്റേറ്റ്, എസ്.ബി.കെ റിയൽ എസ്റ്റേറ്റ്, റോക്കി റിയൽ എസ്റ്റേറ്റ്, എസ്.ആർ.ജി പ്രോപ്പർട്ടീസ്, ഹാർബർ റിയൽ എസ്റ്റേറ്റ്, ഡ്രിവൻ പ്രോപ്പർട്ടീസ്, അൽ ഷുഐബ് റിയൽ എസ്റ്റേറ്റ് എന്നിവരാണ് ആദ്യ ഘട്ടത്തിലുള്ള പങ്കാളികൾ.
ദുബായിലെ ജനസംഖ്യാ വളർച്ചയും ശക്തമായ സാമ്പത്തിക മുന്നേറ്റവും കാരണം വാടക വിപണി അതിവേഗം വികസിച്ചുകൊണ്ടിരിക്കുന്ന പശ്ചാത്തലത്തിലാണ് ഈ പരിഷ്കാരം. ഡി.എൽ.ഡി കണക്കുകൾ പ്രകാരം കഴിഞ്ഞ വർഷം മാത്രം 1.2 ദശലക്ഷം വാടക കരാറുകളാണ് ദുബായിൽ രജിസ്റ്റർ ചെയ്തത്. ദുബായ് റിയൽ എസ്റ്റേറ്റ് സെക്ടർ സ്ട്രാറ്റജി 2033, ദുബായ് ഇക്കണോമിക് അജണ്ട (D33) എന്നിവയുടെ ലക്ഷ്യങ്ങൾ കൈവരിക്കുന്നതിനും, ആഗോളതലത്തിൽ ബിസിനസിനും ജീവിത നിലവാരത്തിനും ഏറ്റവും മികച്ച നഗരമായി ദുബായിയെ നിലനിർത്താനും ഈ ഫ്ലെക്സി റെന്റ് പദ്ധതി സഹായിക്കും.
പദ്ധതിയുടെ ആദ്യ ഘട്ടത്തിന്റെ പുരോഗതി കൃത്യമായ സൂചകങ്ങൾ ഉപയോഗിച്ച് ഡി.എൽ.ഡി വിലയിരുത്തും. വരും മാസങ്ങളിൽ താമസക്കാരുടെ ജീവിതനിലവാരം ഉയർത്തുന്ന കൂടുതൽ വിപ്ലവകരമായ പ്രഖ്യാപനങ്ങൾ ഉണ്ടാകുമെന്ന് അധികൃതർ വ്യക്തമാക്കിയിട്ടുണ്ട്.
