പുലർച്ചെയുള്ള ആദ്യ യാത്രയ്ക്കായി തലേദിവസം തന്നെ ഫുജൈറയിലെത്തി പ്രവാസികൾ ഉൾപ്പെടെയുള്ള യാത്രക്കാർ; നിശ്ചിത സമയത്തിനും മുൻപേ ട്രെയിൻ തലസ്ഥാനത്തെത്തി.
ദുബായ്: യുഎഇയുടെ പൊതുഗതാഗത രംഗത്ത് പുതിയ ചരിത്രം കുറിച്ചുകൊണ്ട് ഇത്തിഹാദ് റെയിലിന്റെ യാത്രാ സർവീസുകൾക്ക് ചൊവ്വാഴ്ച ഔദ്യോഗിക തുടക്കമായി. ഫുജൈറയിൽ നിന്ന് പുലർച്ചെ 5:34-ന് പുറപ്പെട്ട ചരിത്രപ്രസിദ്ധമായ ആദ്യ ട്രെയിൻ, നിശ്ചിത സമയത്തിനും 7 മിനിറ്റ് മുൻപേ അബുദാബിയിൽ എത്തിച്ചേർന്നു. രാജ്യത്തിന്റെ വിവിധ ഭാഗങ്ങളിൽ നിന്നുള്ള നൂറുകണക്കിന് യാത്രക്കാരാണ് ഈ ചരിത്ര നിമിഷത്തിന് സാക്ഷ്യം വഹിക്കാൻ എത്തിയത്.
ഇത്തിഹാദ് റെയിൽ സർവീസിന് പൊതുജനങ്ങളിൽ നിന്ന് വൻ സ്വീകരണമാണ് ലഭിക്കുന്നത്. പ്രാരംഭ ഘട്ട സർവീസുകൾ ആരംഭിക്കുന്നതിന് മുന്നോടിയായി തന്നെ പതിനായിരത്തിലധികം ടിക്കറ്റുകൾ വിറ്റുപോയതായി അധികൃതർ അറിയിച്ചു. വരും ദിവസങ്ങളിലെ ഭൂരിഭാഗം സർവീസുകളുടെയും ടിക്കറ്റുകൾ ഇതിനകം തന്നെ പൂർണ്ണമായും വിറ്റുതീർന്നിരിക്കുകയാണ്. കിഴക്കൻ തീരപ്രദേശമായ ഫുജൈറയെയും തലസ്ഥാന നഗരമായ അബുദാബിയെയും തമ്മിൽ ബന്ധിപ്പിക്കുന്ന 105 മിനിറ്റ് നീളുന്ന ഈ യാത്ര, എമിറേറ്റുകൾക്കിടയിലുള്ള യാത്രാസമയം ഗണ്യമായി കുറയ്ക്കും.
ചൊവ്വാഴ്ച പുലർച്ചെ മുതൽ തന്നെ ഫുജൈറ സ്റ്റേഷനിൽ വലിയ ഉത്സവപ്രതീതിയായിരുന്നു. പുലർച്ചെ 5:00 മണിയോടെ സ്റ്റേഷനിലെത്തിയ യാത്രക്കാരെ പരമ്പരാഗത എമിറാത്തി നൃത്തച്ചുവടുകളോടെയും അറബിക് കോഫി നൽകിയുമാണ് അധികൃതർ സ്വീകരിച്ചത്. ക്യുആർ കോഡ് സ്കാൻ ചെയ്ത് പ്ലാറ്റ്ഫോമിൽ പ്രവേശിച്ച യാത്രക്കാർക്ക് ട്രെയിനിൽ സൗജന്യ പ്രഭാതഭക്ഷണവും ചായയും ചോക്ലേറ്റുകളും വിതരണം ചെയ്തു. ദുബായ് വേൾഡ് സെൻട്രൽ (DWC), സായിദ് മിലിട്ടറി സിറ്റി എന്നിവ പിന്നിട്ട് കുതിച്ച ട്രെയിൻ, നിശ്ചിത സമയമായ 7:19-ന് പകരം 7:12-ന് തന്നെ അബുദാബിയിൽ എത്തിച്ചേർന്നു.
ഈ ചരിത്ര യാത്രയുടെ ഭാഗമാകാൻ പ്രവാസികൾ ഉൾപ്പെടെയുള്ള നിരവധി യാത്രക്കാർ വിപുലമായ തയ്യാറെടുപ്പുകളാണ് നടത്തിയത്. അബുദാബിയിൽ ജോലി ചെയ്യുന്ന നിഹാദും കൂട്ടുകാരും തലേദിവസം തന്നെ ഫുജൈറയിലെത്തി ഹോട്ടലിൽ താമസിച്ച്, പുലർച്ചെ 4:30-ന് സ്റ്റേഷനിലെത്തുകയായിരുന്നു. ട്രെയിൻ അബുദാബിയിൽ എത്തിയ ഉടൻ തന്നെ ഇവർക്ക് ഓഫീസുകളിലേക്ക് പോകാൻ സാധിച്ചു എന്നത് റെയിൽ സർവീസിന്റെ പ്രായോഗികത വ്യക്തമാക്കുന്നു. അബുദാബിയിൽ നിന്നുള്ള മടക്ക സർവീസ് രാവിലെ 8:19-ന് ഫുജൈറയിലേക്ക് തിരിച്ചു.
യുഎഇയുടെ കോടിക്കണക്കിന് ഡോളർ മൂല്യമുള്ള ഫെഡറൽ റെയിൽ ശൃംഖലയുടെ ഏറ്റവും പ്രധാനപ്പെട്ട ഭാഗമാണ് ഇത്തിഹാദ് റെയിൽ യാത്രാ സർവീസ്. എമിറേറ്റുകളിലെ പ്രധാന ജനവാസ മേഖലകളെയും വ്യവസായ കേന്ദ്രങ്ങളെയും തമ്മിൽ ബന്ധിപ്പിക്കുന്ന ഈ ട്രെയിനുകൾക്ക് മണിക്കൂറിൽ 200 കിലോമീറ്റർ വരെ വേഗതയുണ്ട്. റോഡ് മാർഗ്ഗമുള്ള യാത്രകളെ ആശ്രയിക്കുന്നത് കുറയ്ക്കുന്നതിലൂടെ കാർബൺ പുറന്തള്ളൽ വൻതോതിൽ കുറയ്ക്കാനും യുഎഇയുടെ സുസ്ഥിര വികസന ലക്ഷ്യങ്ങൾ കൈവരിക്കാനും ഈ പദ്ധതി സഹായിക്കും.
