ഒക്ടോബർ 25 മുതൽ കൊൽക്കത്ത റൂട്ടിൽ അത്യാധുനിക എയർബസ് എ350 വിമാനങ്ങളും എമിറേറ്റ്സ് സർവീസ് നടത്തും.
ദുബായ്, ജൂലൈ 9, 2026: ഇന്ത്യൻ വ്യോമയാന മേഖലയിലെ സാന്നിധ്യം ശക്തമാക്കുന്നതിന്റെ ഭാഗമായി സർവീസുകളിൽ വൻ പരിഷ്കാരങ്ങളുമായി പ്രമുഖ അന്താരാഷ്ട്ര വിമാനക്കമ്പനിയായ എമിറേറ്റ്സ്. ഒക്ടോബർ 25 മുതൽ ഡൽഹിയിലേക്ക് തങ്ങളുടെ ജനപ്രിയ ഡബിൾ ഡെക്കർ വിമാനമായ എയർബസ് എ380 സർവീസ് ആരംഭിക്കുമെന്നും പ്രീമിയം ഇക്കോണമി ക്ലാസ് കൊച്ചിയുൾപ്പെടെ ഇന്ത്യയിലെ ആറ് നഗരങ്ങളിലേക്ക് വ്യാപിപ്പിക്കുമെന്നും എമിറേറ്റ്സ് അറിയിച്ചു.
ഇന്ത്യയും ദുബായും തമ്മിലുള്ള യാത്രക്കാർക്ക് കൂടുതൽ ആഡംബരവും സൗകര്യപ്രദവുമായ യാത്രാനുഭവം ഉറപ്പാക്കാനാണ് എമിറേറ്റ്സിന്റെ പുതിയ തീരുമാനം. മുംബൈ, ബെംഗളൂരു എന്നിവയ്ക്ക് ശേഷം എമിറേറ്റ്സിന്റെ എ380 വിമാനങ്ങൾ സർവീസ് നടത്തുന്ന മൂന്നാമത്തെ ഇന്ത്യൻ നഗരമായി ഡൽഹി മാറും.
ഡൽഹി-ദുബായ് റൂട്ടിലെ EK512, EK513 എന്നീ ഫ്ലൈറ്റുകളിലാണ് എ380 വിമാനങ്ങൾ സർവീസ് നടത്തുക. ഇതോടെ ഈ റൂട്ടിലെ എ380 വിമാനങ്ങളിലും ബോയിംഗ് 777 വിമാനങ്ങളിലും യാത്രക്കാർക്ക് പ്രീമിയം ഇക്കോണമി ക്ലാസ് ലഭ്യമാകും.
ഒക്ടോബർ അവസാനത്തോടെ കൊച്ചി, ഡൽഹി, മുംബൈ, അഹമ്മദാബാദ്, ബെംഗളൂരു, കൊൽക്കത്ത എന്നീ ആറ് ഇന്ത്യൻ നഗരങ്ങളിലേക്കാണ് എമിറേറ്റ്സ് പ്രീമിയം ഇക്കോണമി സൗകര്യം വ്യാപിപ്പിക്കുന്നത്. ലെതർ സീറ്റുകൾ, കൂടുതൽ ലെഗ് റൂം, പ്രത്യേക ഡൈനിംഗ് മെനു എന്നിവയടങ്ങുന്നതാണ് പ്രീമിയം ഇക്കോണമി ക്ലാസ്.
കൊച്ചിയിലേക്ക് ആഴ്ചയിൽ രണ്ട് സർവീസുകൾ
പുതിയ പരിഷ്കാരം നിലവിൽ വരുന്നതോടെ ഒക്ടോബർ മുതൽ വിവിധ ഇന്ത്യൻ നഗരങ്ങളിൽ നിന്നുള്ള പ്രീമിയം ഇക്കോണമി സർവീസുകളുടെ എണ്ണം ഇപ്രകാരമായിരിക്കും:
- മുംബൈ: ആഴ്ചയിൽ 22 സർവീസുകൾ
- കൊൽക്കത്ത: ആഴ്ചയിൽ 12 സർവീസുകൾ
- അഹമ്മദാബാദ്: ആഴ്ചയിൽ 9 സർവീസുകൾ
- ബെംഗളൂരു: ആഴ്ചയിൽ 7 സർവീസുകൾ
- ഡൽഹി: പ്രതിദിനം 4 സർവീസുകൾ
- കൊച്ചി: ആഴ്ചയിൽ 2 സർവീസുകൾ
ഇതിനുപുറമേ, ഒക്ടോബർ 25 മുതൽ കൊൽക്കത്ത റൂട്ടിലെ (EK570, EK571) നിലവിലെ ബോയിംഗ് 777 വിമാനങ്ങൾക്ക് പകരം പുതിയ എയർബസ് എ350 വിമാനങ്ങൾ എമിറേറ്റ്സ് അവതരിപ്പിക്കും.
“ഇന്ത്യൻ വിപണിയോടുള്ള എമിറേറ്റ്സിന്റെ ദീർഘകാല പ്രതിബദ്ധതയുടെ തെളിവാണ് പുതിയ പ്രഖ്യാപനം,” എമിറേറ്റ്സ് ഡെപ്യൂട്ടി പ്രസിഡന്റും ചീഫ് കൊമേഴ്സ്യൽ ഓഫീസറുമായ അദ്നാൻ കാസിം പറഞ്ഞു. നിലവിൽ ഇന്ത്യയിലെ 9 നഗരങ്ങളിൽ നിന്നായി ദുബായിലേക്ക് ആഴ്ചയിൽ 167 സർവീസുകളാണ് എമിറേറ്റ്സ് നടത്തുന്നത്.
