ആഴ്ചകൾ നീണ്ട അനിശ്ചിതത്വത്തിനൊടുവിൽ സേവനങ്ങൾ ലഭ്യമായി തുടങ്ങി; ബർ ദുബായ് കേന്ദ്രത്തിന് മുന്നിൽ പുലർച്ചെ മുതൽ അപേക്ഷകരുടെ നീണ്ട നിര.
ദുബായ് : ആഴ്ചകൾ നീണ്ട അനിശ്ചിതത്വങ്ങൾക്കും യാത്രാ തടസ്സങ്ങൾക്കും പരിഹാരമായി യു.എ.ഇയിലെ ഇന്ത്യൻ കോൺസുലർ, പാസ്പോർട്ട് സേവനങ്ങൾ അൽ ഹിന്ദ് കേന്ദ്രങ്ങൾ വഴി ഔദ്യോഗികമായി പുനരാരംഭിച്ചു. സേവനങ്ങൾ ലഭ്യമായി തുടങ്ങിയതോടെ കേന്ദ്രങ്ങൾക്ക് മുന്നിൽ അപേക്ഷകരുടെ വൻ തിരക്കാണ് അനുഭവപ്പെടുന്നത്.
ബർ ദുബായിലെ അൽ ഹിന്ദ് അപേക്ഷാ കേന്ദ്രത്തിന് മുന്നിൽ പുലർച്ചെ 5:45 മുതൽ അപേക്ഷകരുടെ നീണ്ട നിര ദൃശ്യമായി. പാസ്പോർട്ട് പുതുക്കൽ, വിസ നടപടികൾ, സാക്ഷ്യപ്പെടുത്തൽ (Attestation) എന്നിവ തടസ്സപ്പെട്ടിരുന്ന പ്രവാസികൾക്ക് സേവനങ്ങൾ പുനരാരംഭിച്ചത് വലിയ ആശ്വാസമായിട്ടുണ്ട്.
സേവനങ്ങൾ ലഭ്യമാണെന്ന ഔദ്യോഗിക അറിയിപ്പ് വന്ന് മിനിറ്റുകൾക്കകം രണ്ടായിരത്തോളം (2,000) അപ്പോയിന്റ്മെന്റ് സ്ലോട്ടുകളാണ് ബുക്ക് ചെയ്യപ്പെട്ടത്. വരും ദിവസങ്ങളിലും അപേക്ഷകരുടെ തിരക്ക് ശക്തമായി തുടരുമെന്നാണ് വിലയിരുത്തൽ.
ഇന്ത്യൻ എംബസിയിലും കോൺസുലേറ്റിലും നേരിട്ടുള്ള അപേക്ഷകൾ ഇനി സ്വീകരിക്കില്ല. പകരം രാജ്യത്തുടനീളം അൽ ഹിന്ദ് പ്രവർത്തിപ്പിക്കുന്ന 16 ഇന്ത്യൻ കോൺസുലർ ആപ്ലിക്കേഷൻ സെന്ററുകൾ (ICACs) വഴിയാണ് നടപടികൾ പൂർത്തിയാക്കേണ്ടത്.
തിരക്ക് നിയന്ത്രിക്കുന്നതിനായി ദിവസേന രാവിലെ 9 മണിക്കും രാത്രി 9 മണിക്കും consularsevainuae.com എന്ന വെബ്സൈറ്റ് വഴി പുതിയ അപ്പോയിന്റ്മെന്റ് സ്ലോട്ടുകൾ ലഭ്യമാക്കുമെന്ന് അധികൃതർ അറിയിച്ചു. കേന്ദ്രങ്ങൾ രാവിലെ 8 മുതൽ വൈകിട്ട് 6 വരെ പ്രവർത്തിക്കും.
അതേസമയം, തത്കാൽ പാസ്പോർട്ട്, നവജാത ശിശുക്കളുടെ അപേക്ഷകൾ, എമർജൻസി സർട്ടിഫിക്കറ്റ് (EC), 60 വയസ്സിന് മുകളിലുള്ള മുതിർന്ന പൗരന്മാർ എന്നിവർക്ക് മുൻകൂട്ടി അപ്പോയിന്റ്മെന്റ് ഇല്ലാതെ തന്നെ നേരിട്ടെത്തി അപേക്ഷ സമർപ്പിക്കാം.
