വിജയദശമി ദിനത്തിൽ ബർജുമാന് സമീപമുള്ള യുഡബ്ല്യു മാളിൽ കുരുന്നുകൾ ആദ്യാക്ഷരം കുറിക്കും; റജിസ്ട്രേഷൻ ആരംഭിച്ചു.
ദുബായ് — പ്രവാസി മലയാളി കുടുംബങ്ങളിലെ കുരുന്നുകൾക്ക് അറിവിന്റെ ലോകത്തേക്ക് വഴിതുറന്ന് മലയാള മനോരമ ഒരുക്കുന്ന വിദ്യാരംഭം ഒക്ടോബർ 21ന് ദുബായിൽ നടക്കും.
വിജയദശമി ദിനമായ ഒക്ടോബർ 21ന് രാവിലെ 6.30 മുതൽ ബർജുമാൻ മാൾ മെട്രോ സ്റ്റേഷന് സമീപമുള്ള യുഡബ്ല്യു മാളിലാണ് ചടങ്ങുകൾ ക്രമീകരിച്ചിരിക്കുന്നത്. കേരളത്തിന്റെ തനത് പാരമ്പര്യവും ആചാരപ്പെരുമയും കാത്തുസൂക്ഷിച്ചാണ് ഗൾഫിലെ ഈ വിജ്ഞാനോത്സവം ഒരുക്കുന്നത്.
സാഹിത്യ, സാംസ്കാരിക, വിദ്യാഭ്യാസ രംഗത്തെ പ്രമുഖ വ്യക്തിത്വങ്ങൾ ചടങ്ങിൽ ഗുരുക്കന്മാരായി പങ്കെടുക്കും. കുരുന്നുകളുടെ കൈപിടിച്ച് അരിയിലും സ്വർണമോതിരം കൊണ്ട് നാക്കിലും ഹരിശ്രീ കുറിക്കുന്ന പരമ്പരാഗത ചടങ്ങുകൾ ഇവിടെ പുനരവതരിപ്പിക്കും. ഗൾഫ് നാടുകളിൽ ജനിച്ചുവളരുന്ന പുതിയ തലമുറയ്ക്ക് മാതൃഭാഷയുടെയും സംസ്കാരത്തിന്റെയും ബാലപാഠങ്ങൾ പകർന്നുനൽകുക കൂടിയാണ് ഈ സംരംഭം ലക്ഷ്യമിടുന്നത്.
വിദ്യാരംഭത്തിൽ പങ്കെടുക്കുന്ന എല്ലാ കുട്ടികൾക്കും പ്രത്യേക സമ്മാനങ്ങളും ഗുരുക്കന്മാർക്കും മാതാപിതാക്കൾക്കുമൊപ്പമുള്ള ഫോട്ടോ പതിച്ച സർട്ടിഫിക്കറ്റും വിതരണം ചെയ്യും.
ചടങ്ങിൽ പങ്കെടുക്കാനുള്ള റജിസ്ട്രേഷനും പ്രവേശനവും പൂർണമായും സൗജന്യമാണ്. മുൻകൂട്ടി പേര് റജിസ്റ്റർ ചെയ്യുന്നതിനും വിശദവിവരങ്ങൾക്കും 04 3748920, 050 5784024 എന്നീ നമ്പറുകളിൽ ബന്ധപ്പെടാവുന്നതാണ്.
