ആദ്യ യു.എ.ഇ വനിതാ അധ്യാപികയായ ശൈഖ നാമ ബിൻത് മാജിദ് അൽ ഖാസിമിയുടെ പോരാട്ടവീര്യം ചിത്രീകരിച്ച് പൗത്രി നൂറുൽ ഖാസിമിയുടെ ‘ദി ഫസ്റ്റ്’.
ദുബായ് : യു.എ.ഇയിലെ ആദ്യത്തെ വനിതാ അധ്യാപികയായ ശൈഖ നാമ ബിൻത് മാജിദ് അൽ ഖാസിമിയുടെ ജീവിതവും വിദ്യാഭ്യാസ മേഖലയിലെ സംഭാവനകളും പ്രമേയമാക്കി തയ്യാറാക്കിയ ഹ്രസ്വചിത്രത്തിന് അന്താരാഷ്ട്ര തലത്തിൽ ശ്രദ്ധയും പുരസ്കാരങ്ങളും. ശൈഖ നാമയുടെ പൗത്രിയും സിനിമാ വിദ്യാർത്ഥിനിയുമായ നൂറുൽ ഖാസിമിയാണ് ‘ദി ഫസ്റ്റ്’ എന്ന് പേരിട്ടിരിക്കുന്ന ഈ ഡോക്യുമെന്ററി നിർമ്മിച്ചിരിക്കുന്നത്.
ഷാർജയിലെ സർവ്വകലാശാലയിൽ മൂന്നാം വർഷ സിനിമാ പഠനം നടത്തുന്ന ഇരുപതുകാരിയായ നൂറുൽ ഖാസിമി, തനിക്ക് ലഭിച്ച ഒരു യൂണിവേഴ്സിറ്റി അസൈൻമെന്റിന്റെ ഭാഗമായാണ് ഈ ചിത്രം ഒരുക്കിയത്. പേരക്കുട്ടി മുത്തശ്ശിക്ക് അയക്കുന്ന സന്ദേശത്തിന്റെ രൂപത്തിൽ നിർമ്മിച്ച ഈ ഡോക്യുമെന്ററി യു.എ.ഇയുടെ ആദ്യകാല വിദ്യാഭ്യാസ ചരിത്രത്തിലേക്ക് വെളിച്ചം വീശുന്നു.
ജൂലൈ 26-ന് സമാപിച്ച 12-ാമത് എമിറേറ്റ്സ് ഫിലിം ഫെസ്റ്റിവലിൽ മികച്ച എമിറാത്തി ചിത്രത്തിനുള്ള പുരസ്കാരം ‘ദി ഫസ്റ്റ്’ നേടി. ദുബായ് സിറ്റി ഫിലിം ഫെസ്റ്റിവൽ, ജർമ്മനിയിലെ മാൻഹൈം ആർട്സ് ആൻഡ് ഫിലിം ഫെസ്റ്റിവൽ എന്നിവയിലും ചിത്രം പ്രദർശിപ്പിച്ചു.
1970-കളിൽ ഷാർജയിലെ ഫാത്തിമ അൽ സഹ്റ സ്കൂളിൽ ശൈഖ നാമ അധ്യാപികയായി സേവനമനുഷ്ഠിച്ച കാലഘട്ടവും അന്നത്തെ സാമൂഹിക അന്തരീക്ഷവുമാണ് ചിത്രത്തിൽ ഉൾപ്പെടുത്തിയിരിക്കുന്നത്. സ്ത്രീകളുടെ വിദ്യാഭ്യാസത്തിന് പരിമിതികൾ മാത്രമുണ്ടായിരുന്ന കാലത്ത്, വരുംതലമുറയ്ക്കായി വഴിതുറന്ന തന്റെ മുത്തശ്ശിയുടെ ജീവിതം രേഖപ്പെടുത്തേണ്ടത് ചരിത്രപരമായ ഉത്തരവാദിത്തമാണെന്ന് നൂറുൽ ഖാസിമി വ്യക്തമാക്കുന്നു.
കുടുംബങ്ങളിലും സമൂഹങ്ങളിലും രേഖപ്പെടുത്തപ്പെടാതെ പോകുന്ന ചരിത്രപുരുഷന്മാരുടെയും വനിതാ പ്രമുഖരുടെയും കഥകൾ സിനിമയിലൂടെ ലോകത്തിന് മുന്നിലെത്തിക്കാനാണ് നൂറുൽ ഖാസിമി ലക്ഷ്യമിടുന്നത്. യു.എ.ഇയിലെ വിവിധ മേഖലകളിൽ തുടക്കം കുറിച്ച വഴിവിളക്കുകളായ വ്യക്തികളുടെ ജീവിതം ആസ്പദമാക്കി കൂടുതൽ ചിത്രങ്ങൾ ഒരുക്കാനുള്ള തയ്യാറെടുപ്പിലാണ് ഈ യുവ സംവിധായിക.
