യുഎഇയിൽ വാറ്റ് നിയമങ്ങളിൽ നിർണായക മാറ്റം: വൻകിട പണമിടപാടുകൾക്കും ജീവനക്കാരുടെ താമസച്ചെലവുകൾക്കും പുതിയ നികുതി നിബന്ധനകൾ

ഒക്ടോബർ 1 മുതൽ പുതിയ എക്സിക്യൂട്ടീവ് റെഗുലേഷൻസ് പ്രാബല്യത്തിൽ; നിർദിഷ്ട പരിധിക്ക് മുകളിലുള്ള പണമിടപാടുകൾക്ക് ഇൻപുട്ട് ടാക്സ് റീഫണ്ട് നഷ്ടപ്പെടാൻ സാധ്യത, ലേബർ ക്യാമ്പ് ചെലവുകൾക്ക് മാനദണ്ഡങ്ങൾ കർശനമാക്കി.

ദുബായ് — യുണൈറ്റഡ് അറബ് എമിറേറ്റ്സിൽ പ്രവർത്തിക്കുന്ന ബിസിനസ് സ്ഥാപനങ്ങൾ പണമായി (ക്യാഷ്) നടത്തുന്ന ഉയർന്ന ഇടപാടുകൾക്കും ജീവനക്കാർക്ക് നൽകുന്ന താമസസൗകര്യങ്ങൾക്കും നികുതിയിളവ് ക്ലെയിം ചെയ്യുന്നതിൽ കർശന നിയന്ത്രണങ്ങൾ വരുന്നു. വാറ്റ് എക്സിക്യൂട്ടീവ് റെഗുലേഷൻസിൽ വരുത്തിയ ഭേദഗതികൾ 2026 ഒക്ടോബർ ഒന്നു മുതൽ പ്രാബല്യത്തിൽ വരും.

വൻകിട പണമിടപാടുകൾ വഴി സാധനങ്ങളോ സേവനങ്ങളോ വാങ്ങുമ്പോൾ നൽകുന്ന ഇൻപുട്ട് വാറ്റ് (Input VAT) തിരികെ ക്ലെയിം ചെയ്യാനുള്ള അവകാശമാണ് പ്രധാനമായും നിയന്ത്രിക്കപ്പെടുന്നത്. ഒരു നിശ്ചിത തുകയ്ക്ക് മുകളിലുള്ള ഇടപാടുകൾക്ക് ക്യാഷ് പേയ്‌മെന്റുകൾ നടത്തിയാൽ വാറ്റ് റിക്കവറി സാധ്യമാകില്ല. ഈ തുകയുടെ പരിധിയും അനുബന്ധ നിബന്ധനകളും ധനകാര്യ മന്ത്രാലയം ഉടൻ പുറത്തിറക്കുന്ന പ്രത്യേക ഉത്തരവിലൂടെ പ്രഖ്യാപിക്കും. ബാങ്ക് ട്രാൻസ്ഫറുകൾ, ഡിജിറ്റൽ പേയ്‌മെന്റുകൾ തുടങ്ങിയ ബാങ്കിങ് ഇടപാടുകളിലേക്ക് സ്ഥാപനങ്ങൾ മാറേണ്ടതുണ്ട്.

റീട്ടെയിൽ, റെസ്റ്റോറന്റുകൾ, കോൺട്രാക്റ്റിങ്, പെറ്റി ക്യാഷ് കൈകാര്യം ചെയ്യുന്ന സൈറ്റുകൾ, ക്യാഷ്-ഓൺ-ഡെലിവറി സർവീസുകൾ എന്നിവയെ പുതിയ ഭേദഗതി കാര്യമായി ബാധിച്ചേക്കാം. ഇടപാടിന്റെ ഒരു ഭാഗം മാത്രം പണമായി നൽകിയാലും മുഴുവൻ ബില്ലിന്റെയും ഇൻപുട്ട് ടാക്സ് റിക്കവറിയെ അത് ബാധിക്കുമോ എന്നതിൽ മന്ത്രാലയത്തിന്റെ തുടർവിശദീകരണം നിർണായകമാകും.

നിർമാണം, ഹോസ്പിറ്റാലിറ്റി, ലോജിസ്റ്റിക്സ്, മാനുഫാക്ചറിങ്, ഫെസിലിറ്റി മാനേജ്‌മെന്റ് തുടങ്ങിയ മേഖലകളിൽ പ്രവർത്തിക്കുന്ന സ്ഥാപനങ്ങൾ ജീവനക്കാർക്കായി ഒരുക്കുന്ന താമസസൗകര്യങ്ങളുടെ വാറ്റ് റിക്കവറിയിലും പുതിയ വ്യവസ്ഥ ബാധകമാണ്. നിലവിൽ പൊതു ലേബർ നിയമങ്ങളുടെ അടിസ്ഥാനത്തിൽ ലേബർ ക്യാമ്പുകളുടെയും സ്റ്റാഫ് ഹൗസിങ്ങിന്റെയും വാറ്റ് ചെലവുകൾ കമ്പനികൾ റിക്കവർ ചെയ്യാറുണ്ടായിരുന്നു.

പുതിയ ഭേദഗതി പ്രകാരം, മാനവവിഭവശേഷി സ്വദേശിവൽക്കരണ മന്ത്രാലയത്തിന്റെ (MoHRE) നേരിട്ടുള്ള ഉത്തരവുകളോ നിർദേശങ്ങളോ വഴി നൽകാൻ നിർബന്ധിതമായിട്ടുള്ള താമസസൗകര്യങ്ങൾക്ക് മാത്രമേ ഇൻപുട്ട് വാറ്റ് തിരികെ ക്ലെയിം ചെയ്യാനാകൂ. കേവലം തൊഴിൽ കരാറുകളുടെയോ കമ്പനി നയങ്ങളുടെയോ അടിസ്ഥാനത്തിൽ നൽകുന്ന സ്വമേധയായുള്ള താമസച്ചെലവുകൾക്ക് ഈ ഇളവ് ലഭിക്കില്ല.

താമസമൊഴികെയുള്ള മറ്റ് സ്റ്റാഫ് ആനുകൂല്യങ്ങൾക്ക് (മെഡിക്കൽ, ട്രാൻസ്പോർട്ട് തുടങ്ങിയവ) ഔദ്യോഗിക തൊഴിൽ കരാറിലോ എച്ച്ആർ പോളിസിയിലോ കൃത്യമായി ഉൾപ്പെടുത്തിയിട്ടുണ്ടെങ്കിൽ നികുതിയിളവ് തുടരാം. എന്നാൽ ഇതിനായുള്ള വിശദമായ മാർഗ്ഗരേഖ ഫെഡറൽ ടാക്സ് അതോറിറ്റി (എഫ്.ടി.എ) പിന്നീട് പുറത്തിറക്കും.

നികുതി നൽകേണ്ടതും (taxable) ഒഴിവാക്കപ്പെട്ടതുമായ (exempt) ഉത്പന്നങ്ങൾ ഒരേസമയം വിൽക്കുന്ന സ്ഥാപനങ്ങൾക്കുള്ള വാറ്റ് അനുപാത കണക്കുകൂട്ടൽ രീതിയിലും (apportionment methodology) മാറ്റം വരുത്തിയിട്ടുണ്ട്. ഈ പരിഷ്കാരം 2027 ഒക്ടോബർ 1-ന് ശേഷം ആരംഭിക്കുന്ന ആദ്യ സാമ്പത്തിക വർഷം മുതലാണ് നടപ്പിലാക്കുക. സർക്കാരേതര സ്ഥാപനങ്ങൾ, കമ്പനികൾ എന്നിവ തങ്ങളുടെ കരാറുകളും പണമിടപാടുകളും പുതിയ നികുതി ചട്ടങ്ങൾക്ക് അനുസൃതമായി പുനഃപരിശോധിക്കാൻ എക്സിക്യൂട്ടീവ് റെഗുലേഷൻസ് നിർദേശിക്കുന്നു.