ദുബായ് കെ.എം.സി.സി കാസർഗോഡ് ജില്ലാ കമ്മിറ്റിയുടെ ‘ടോക്ക് ടൈം വിത്ത് ലീഡർ’ പരിപാടിയിൽ സംസാരിക്കവെ പ്രവാസി സമൂഹം നേരിടുന്ന പുതിയ വെല്ലുവിളികളും പരിഹാരങ്ങളും പേസ് ഗ്രൂപ്പ് മാനേജിംഗ് ഡയറക്ടർ വിശദീകരിച്ചു.
ദുബായ്:മാറിവരുന്ന ആഗോള, സാമൂഹിക സാഹചര്യങ്ങളിൽ പ്രവാസി സമൂഹത്തിന്റെ വളർച്ചയ്ക്കും സംരക്ഷണത്തിനും പരസ്പര സഹകരണവും സാമൂഹിക ഉത്തരവാദിത്വവും കൂടുതൽ ശക്തിപ്പെടുത്തണമെന്ന് പേസ് ഗ്രൂപ്പ് മാനേജിംഗ് ഡയറക്ടർ മുഹമ്മദ് സൽമാൻ ഇബ്രാഹിം പ്രസ്താവിച്ചു.
ദുബായ് കെ.എം.സി.സി കാസർഗോഡ് ജില്ലാ കമ്മിറ്റി സംഘടിപ്പിച്ച ‘ടോക്ക് ടൈം വിത്ത് ലീഡർ’ പരിപാടിയിൽ മുഖ്യാതിഥിയായി പങ്കെടുത്തു സംസാരിക്കുകയായിരുന്നു അദ്ദേഹം. വ്യക്തിപരമായ വിജയങ്ങൾക്കപ്പുറം പ്രവാസി സമൂഹത്തിന്റെ പൊതുവായ പുരോഗതിക്കായി ഓരോരുത്തരും പങ്കാളികളാകേണ്ട സമയമാണിതെന്ന് അദ്ദേഹം ഓർമ്മിപ്പിച്ചു.
പ്രവാസലോകത്ത് സാമ്പത്തികമായും സാമൂഹികമായും ബുദ്ധിമുട്ടുകൾ അനുഭവിക്കുന്നവർക്ക് കൃത്യമായ സഹായം ഉറപ്പാക്കാൻ സംഘടിത രൂപത്തിലുള്ള ഇടപെടലുകൾ അത്യാവശ്യമാണ്. പുതിയ തലമുറയ്ക്ക് ഗുണനിലവാരമുള്ള വിദ്യാഭ്യാസവും തൊഴിലവസരങ്ങളും ഒരുക്കുന്നതിൽ പ്രവാസി സംഘടനകൾ വലിയ പങ്ക് വഹിക്കുന്നുണ്ട്. വിദേശത്തെ ജീവിതത്തിലൂടെയും ജോലിയിലൂടെയും നേടുന്ന അനുഭവപരിചയം പ്രവാസി സമൂഹത്തിന്റെ സാമൂഹിക ക്ഷേമത്തിനായി ഉപയോഗപ്പെടുത്തണം.
സാങ്കേതികവിദ്യയും ആധുനിക സൗകര്യങ്ങളും വേഗത്തിൽ വളരുമ്പോഴും മാനവിക മൂല്യങ്ങളും പരസ്പരബന്ധങ്ങളും മുറിഞ്ഞുപോകാതെ സൂക്ഷിക്കേണ്ടതുണ്ട്. യുവതലമുറയെ നേതൃനിരയിലേക്ക് ഉയർത്തിക്കൊണ്ടുവരാനും അവരുടെ കഴിവുകൾ ക്രിയാത്മക മേഖലകളിൽ പ്രയോജനപ്പെടുത്താനും കൂടുതൽ അവസരങ്ങൾ സൃഷ്ടിക്കപ്പെടണമെന്നും അദ്ദേഹം അഭിപ്രായപ്പെട്ടു.
ചടങ്ങിൽ ദുബായ് കെ.എം.സി.സി സംസ്ഥാന വൈസ് പ്രസിഡന്റ് ഹംസ തൊട്ടി, കാസർഗോഡ് ജില്ലാ കമ്മിറ്റിയുടെ ഉപഹാരം മുഹമ്മദ് സൽമാൻ ഇബ്രാഹിമിന് കൈമാറി.
ജില്ലാ പ്രസിഡന്റ് സലാം കന്യപ്പാടി അധ്യക്ഷത വഹിച്ച ചടങ്ങിൽ ആക്ടിംഗ് ജനറൽ സെക്രട്ടറി അഷ്റഫ് ബായാർ സ്വാഗതം ആശംസിച്ചു. ദുബായ് കെ.എം.സി.സി വൈസ് പ്രസിഡന്റ് അബ്ദുല്ല അരങ്ങാടി, സെക്രട്ടറി അഫ്സൽ മേട്ടമ്മൽ, ജില്ലാ ഭാരവാഹികളായ റഫീഖ് പടന്ന, പി.ഡി. നൂറുദ്ദീൻ, ആസിഫ് ഹൊസങ്കടി, സിദ്ദീഖ് ചൗക്കി, സൈഫുദ്ദീൻ മൊഗ്രാൽ തുടങ്ങിയ പ്രമുഖർ ചടങ്ങിൽ സംബന്ധിച്ചു.
