വിദേശത്തുനിന്നും നാട്ടിൽ നിന്നും എത്തുന്ന പ്രവാസികൾക്കും യാത്രക്കാർക്കുമായി റൂട്ടുകളിൽ പ്രത്യേക വിഭവങ്ങൾ ലഭ്യമാക്കും.
തിരുവനന്തപുരം :ഓണത്തോടനുബന്ധിച്ച് യാത്രക്കാർക്കായി പ്രത്യേക ഓണസദ്യ വിമാനത്തിനുള്ളിൽ ലഭ്യമാക്കി എയർ ഇന്ത്യ എക്സ്പ്രസ്. തിരുവനന്തപുരത്ത് നടന്ന ചടങ്ങിൽ ടൂറിസം, സാംസ്കാരിക, സിനിമാ വകുപ്പ് മന്ത്രി പി.സി. വിഷ്ണുനാഥ് ഓണസദ്യയുടെ ഔദ്യോഗിക ഉദ്ഘാടനം നിർവഹിച്ചു.
നാട്ടിലേക്ക് മടങ്ങിയെത്തുന്ന ഗൾഫ് പ്രവാസികൾക്കും മറ്റ് സംസ്ഥാനങ്ങളിൽ നിന്നുള്ള യാത്രക്കാർക്കും കേരളത്തിന്റെ പാരമ്പര്യ തനിമയിലുള്ള ഭക്ഷണാനുഭവം സമ്മാനിക്കുകയാണ് ഈ പദ്ധതിയിലൂടെ കമ്പനി ലക്ഷ്യമിടുന്നത്.
വാഴയിലയുടെ മാതൃകയിലുള്ള പ്ലേറ്റിൽ തയ്യാറാക്കിയ ചോറ്, അവിയൽ, തോരൻ, സാമ്പാർ, ഓലൻ, രസം, കായ വറുത്തത്, പായസം തുടങ്ങിയ പരമ്പരാഗത വിഭവങ്ങളാണ് എയർ ഇന്ത്യ എക്സ്പ്രസ് ലഭ്യമാക്കുന്നത്.
കേരളത്തിന്റെ സാംസ്കാരിക പൈതൃകവും ഭക്ഷ്യസങ്കൽപ്പങ്ങളും ആഗോള തലത്തിലേക്ക് എത്തിക്കാൻ ഇത്തരം സംരംഭങ്ങൾ സഹായിക്കുമെന്ന് മന്ത്രി പി.സി. വിഷ്ണുനാഥ് പറഞ്ഞു. എയർ ഇന്ത്യ ഗ്രൂപ്പ് മാർക്കറ്റിംഗ്, ഇ-കൊമേഴ്സ്, ലോയൽറ്റി വിഭാഗം മേധാവി സുനിൽ സുരേഷ് ചടങ്ങിൽ പങ്കെടുത്തു. ആഘോഷകാലത്ത് യാത്രക്കാർക്ക് തനത് രുചികൾ പ്രീമിയം നിലവാരത്തിൽ ലഭ്യമാക്കാനാണ് ശ്രമിക്കുന്നതെന്ന് അദ്ദേഹം വ്യക്തമാക്കി.
തിരഞ്ഞെടുത്ത ആഭ്യന്തര പാതകളിലും കേരളത്തിൽ നിന്നുള്ള ഗൾഫ് വിമാന സർവീസുകളിലും ആഘോഷ കാലയളവിൽ ഈ ഓണസദ്യ ലഭ്യമായിരിക്കും. എയർ ഇന്ത്യ എക്സ്പ്രസിന്റെ ഔദ്യോഗിക വെബ്സൈറ്റ്, മൊബൈൽ ആപ്പ് എന്നിവ വഴി യാത്രക്കാർക്ക് നേരത്തെ തന്നെ സദ്യ ബുക്ക് ചെയ്യാം.
