ട്രാഫിക് നിയമനിർവ്വഹണവും സുരക്ഷിത ഡ്രൈവിംഗും പ്രമേഹമാക്കുന്ന ഹ്രസ്വചിത്രങ്ങൾക്കാണ് അവാർഡ് നൽകുന്നത്; രജിസ്ട്രേഷൻ ആഗസ്റ്റ് 24 മുതൽ.
ദുബായ്, ആഗസ്റ്റ് 18, 2026 — ഗതാഗത സുരക്ഷയെക്കുറിച്ചുള്ള ബോധവൽക്കരണം ലക്ഷ്യമിട്ട് റോഡ്സ് ആൻഡ് ട്രാൻസ്പോർട്ട് അതോറിറ്റി (RTA) സംഘടിപ്പിക്കുന്ന റോഡ് സേഫ്റ്റി ഫിലിം ഫെസ്റ്റിവലിന്റെ രണ്ടാം പതിപ്പ് പ്രഖ്യാപിച്ചു. ആകെ 3,00,000 ദിർഹം മൂല്യമുള്ള സമ്മാനങ്ങളാണ് വിജയികളെ കാത്തിരിക്കുന്നത്. അസീസി ഡെവലപ്പ്മെന്റ്സാണ് മത്സരത്തിന്റെ പ്രധാന പ്രായോജകർ.
2025-ൽ നടന്ന ആദ്യ പതിപ്പിന് ലഭിച്ച വൻ സ്വീകാര്യതയെത്തുടർന്നാണ് രണ്ടാം പതിപ്പ് പ്രഖ്യാപിച്ചിരിക്കുന്നത്. ആഗസ്റ്റ് 24 മുതൽ നവംബർ 22 വരെ ആർ.ടി.എയുടെ ഔദ്യോഗിക വെബ്സൈറ്റ് (www.rta.ae/roadsafetyfilmfestival) വഴി അപേക്ഷകൾ സമർപ്പിക്കാം.
റോഡ് അപകടങ്ങൾ കുറയ്ക്കുന്നതിനും സുരക്ഷിതമായ ഡ്രൈവിംഗ് രീതികൾ പ്രോത്സാഹിപ്പിക്കുന്നതിനും ദൃശ്യമാധ്യമങ്ങൾ ഏറെ ഫലപ്രദമാണെന്ന് ആർ.ടി.എ ട്രാഫിക് ആൻഡ് റോഡ്സ് ഏജൻസി സി.ഇ.ഒ ഹുസൈൻ അൽ ബന്ന വ്യക്തമാക്കി.
മത്സര വിഭാഗങ്ങളും സമ്മാനത്തുകയും
പ്രധാനമായും മൂന്ന് വിഭാഗങ്ങളിലാണ് മത്സരങ്ങൾ സംഘടിപ്പിക്കുന്നത്:
- വ്യക്തികളും സർവ്വകലാശാലാ വിദ്യാർത്ഥികളും: സുരക്ഷിത ഡ്രൈവിംഗ്, ആധുനിക സാങ്കേതികവിദ്യകൾ ഉപയോഗിച്ചുള്ള ബോധവൽക്കരണം എന്നീ ഉപവിഭാഗങ്ങൾ ഇതിൽ ഉൾപ്പെടുന്നു.
- സർക്കാർ, സ്വകാര്യ സ്ഥാപനങ്ങൾ: റോഡ് സുരക്ഷയ്ക്കായി സ്ഥാപനങ്ങൾ നടത്തുന്ന ഇടപെടലുകളെ മുൻനിർത്തിയുള്ള ഈ വിഭാഗത്തിലെ വിജയികൾക്ക് ഔദ്യോഗിക പുരസ്കാര ഫലകങ്ങൾ നൽകും.
- പൊതുസമൂഹം: കുടുംബ സുരക്ഷയെ മുൻനിർത്തിയുള്ള ചിത്രങ്ങളും ട്രാഫിക് അപകടങ്ങളിൽപ്പെട്ടവരുടെ യഥാർത്ഥ അനുഭവങ്ങൾ പ്രമേഹമാക്കുന്ന ചിത്രങ്ങളുമാണ് ഇതിൽ മത്സരിക്കുന്നത്.
ഒന്നും മൂന്നും വിഭാഗങ്ങളിലെ ഉപവിഭാഗങ്ങളിലെ വിജയികൾക്കായി ആകെ 2,40,000 ദിർഹം പണമായി നൽകും. ഓരോ ഉപവിഭാഗത്തിലും ഒന്നാം സമ്മാനം 30,000 ദിർഹം, രണ്ടാം സമ്മാനം 20,000 ദിർഹം, മൂന്നാം സമ്മാനം 10,000 ദിർഹം എന്നിങ്ങനെയാണ് ക്രമീകരിച്ചിരിക്കുന്നത്.
തിരഞ്ഞെടുക്കപ്പെടുന്ന ചിത്രങ്ങൾ ആർ.ടി.എയുടെ ഔദ്യോഗിക ഡിജിറ്റൽ പ്ലാറ്റ്‌ഫോമുകളിലും വിദ്യാലയങ്ങളിലെ ബോധവൽക്കരണ പരിപാടികളിലും പ്രദർശിപ്പിക്കും. ദുബായ് പൊലീസുമായി സഹകരിച്ച് നടപ്പിലാക്കുന്ന ‘സീറോ ഫാറ്റാലിറ്റി’ (Zero Fatalities) ലക്ഷ്യത്തിന്റെ ഭാഗമായാണ് ഈ പദ്ധതി.
