മഹാത്മാഗാന്ധി കൾച്ചറൽ ഫോറവും ഷാർജ ഹെൽത്ത് അതോറിറ്റിയും ഇന്ത്യൻ അസോസിയേഷനും സംയുക്തമായി നടത്തിയ ക്യാംപിൽ പങ്കെടുത്തത് നൂറുകണക്കിന് പ്രവാസികൾ
ഷാർജ — ഗാന്ധി ജയന്തി ദിനാചരണത്തിന്റെ ഭാഗമായി മഹാത്മാഗാന്ധി കൾച്ചറൽ ഫോറം (എം.ജി.സി.എഫ്) ഷാർജ ഹെൽത്ത് അതോറിറ്റിയുമായി സഹകരിച്ച് ഷാർജ ഇന്ത്യൻ അസോസിയേഷൻ ഹാളിൽ വിപുലമായ രക്തദാന ക്യാംപും സൗജന്യ മെഡിക്കൽ പരിശോധനയും സംഘടിപ്പിച്ചു.
മഹാത്മാഗാന്ധി കൾച്ചറൽ ഫോറത്തിന്റെ (എം.ജി.സി.എഫ്) ആഭിമുഖ്യത്തിൽ ഷാർജ ഇന്ത്യൻ അസോസിയേഷൻ അങ്കണത്തിൽ സംഘടിപ്പിച്ച ഗാന്ധി ജയന്തി ദിനാചരണവും രക്തദാന-മെഡിക്കൽ ക്യാംപും പ്രവാസി പങ്കാളിത്തം കൊണ്ട് ശ്രദ്ധേയമായി. യുഎഇയിലെ വിവിധ എമിറേറ്റുകളിൽ നിന്നായി നൂറുകണക്കിന് സന്നദ്ധ രക്തദാതാക്കളും പൊതുജനങ്ങളും പരിപാടിയിൽ പങ്കെടുത്തു.
ഷാർജ ഹെൽത്ത് അതോറിറ്റിയുമായി ചേർന്നാണ് രക്തദാന പരിപാടി നടത്തിയത്. ഡോക്ടേഴ്സ് മെഡിക്കൽ സെന്ററുമായി സഹകരിച്ച് പ്രവാസികൾക്കായി സൗജന്യ ജനറൽ മെഡിക്കൽ ക്യാംപും ഇതോടൊപ്പം ഒരുക്കിയിരുന്നു.
പുതുപ്പള്ളി എം.എൽ.എ ചാണ്ടി ഉമ്മൻ രക്തദാന ക്യാംപ് ഉദ്ഘാടനം ചെയ്തു. സർവ ലോകത്തും ശാന്തിയും സമാധാനവും നിറയ്ക്കുന്ന കെടാത്ത സൂര്യതേജസ്സാണ് മഹാത്മാഗാന്ധിയുടെ ജീവിതവും ദർശനങ്ങളുമെന്ന് അദ്ദേഹം പറഞ്ഞു. മനുഷ്യസ്നേഹവും പരസ്പര സഹായവും മുറുകെപ്പിടിച്ചുകൊണ്ടുള്ള ഇത്തരം കാരുണ്യ പ്രവർത്തനങ്ങൾ ഗാന്ധിയൻ സന്ദേശങ്ങളുടെ യഥാർത്ഥ പ്രയോഗമാണെന്ന് അദ്ദേഹം കൂട്ടിച്ചേർത്തു.
ഷാർജ ഇന്ത്യൻ അസോസിയേഷൻ വൈസ് പ്രസിഡന്റ് പ്രദീപ് നെന്മാറ ചടങ്ങിൽ അധ്യക്ഷത വഹിച്ചു. മെഡിക്കൽ ക്യാംപിൽ പങ്കെടുത്ത തൊഴിലാളികൾ ഉൾപ്പെടെയുള്ളവർക്ക് രക്തസമ്മർദ്ദം, പ്രമേഹം തുടങ്ങിയ ജീവിതശൈലീ രോഗനിർണയ പരിശോധനകളും ഡോക്ടർമാരുടെ കൺസൾട്ടേഷനും സൗജന്യമായി ലഭ്യമാക്കി.
ക്യാംപിന്റെ സുഗമമായ നടത്തിപ്പിന് എം.ജി.സി.എഫ് ഭാരവാഹികളായ പ്രഭാകരൻ പന്ത്രോളി, അഡ്വ. സന്തോഷ് നായർ, ജോൺ മാത്യു, റഹ്മാൻ കാസിം, ഷാഗിൻ, സബിത, പ്രീന, പ്രീതി, സ്മിജോ, പത്മ, സുരേന്ദ്രൻ, കുഞ്ഞുമോൻ, ജാസ്മിൻ, ആമിന, രഘു എന്നിവർ നേതൃത്വം നൽകി. ശേഖരിച്ച രക്തം ശീതീകരണ സംവിധാനങ്ങളോടെ ഷാർജയിലെ സെൻട്രൽ ബ്ലഡ് ബാങ്കിലേക്ക് കൈമാറിയതായി ഭാരവാഹികൾ അറിയിച്ചു.
