വ്യോമപാത നിയന്ത്രണം: ദുബായ്, അബുദാബി വിമാനത്താവളങ്ങളിൽ സർവീസുകൾ മുടങ്ങി; യാത്രക്കാർ ജാഗ്രതയിൽ

എമിറേറ്റ്സ്, ഫ്ലൈദുബായ്, ഇത്തിഹാദ്, എയർ അറേബ്യ സർവീസുകളിൽ സമയമാറ്റം; യുഎഇയിലേക്കുള്ള യൂറോപ്യൻ, ഏഷ്യൻ എയർലൈനുകൾ റൂട്ടുകൾ പുനഃക്രമീകരിക്കുന്നു.

ദുബായ്, ഒക്ടോബർ 06, 2026:പശ്ചിമേഷ്യൻ മേഖലയിലെ വ്യോമപാതാ നിയന്ത്രണങ്ങളും സുരക്ഷാ മുന്നറിയിപ്പുകളും ശക്തമായതോടെ ദുബായ്, അബുദാബി വിമാനത്താവളങ്ങളിൽ നിന്നുള്ള നിരവധി വിമാന സർവീസുകൾ റദ്ദാക്കുകയോ സമയം മാറ്റുകയോ ചെയ്തു.

ചൊവ്വാഴ്ച രാവിലെ മുതൽ ദുബായ് അന്താരാഷ്ട്ര വിമാനത്താവളത്തിലും (DXB) അബുദാബി സായിദ് അന്താരാഷ്ട്ര വിമാനത്താവളത്തിലും (AUH) നിശ്ചയിച്ചിരുന്ന നിരവധി സർവീസുകളാണ് പ്രതിസന്ധിയിലായത്. എമിറേറ്റ്സ്, ഇത്തിഹാദ്, ഫ്ലൈദുബായ്, എയർ അറേബ്യ എന്നിവയുൾപ്പെടെയുള്ള പ്രമുഖ യുഎഇ വിമാനക്കമ്പനികളും വിദേശ എയർലൈനുകളും റൂട്ടുകൾ പുനഃക്രമീകരിച്ചു വരികയാണ്. ടെർമിനലുകളിലേക്ക് പുറപ്പെടുന്നതിന് മുൻപായി സർവീസ് വിവരങ്ങൾ പരിശോധിക്കണമെന്ന് അധികൃതർ യാത്രക്കാരോട് ആവശ്യപ്പെട്ടു.

മേഖലയിലെ സംഘർഷസാഹചര്യങ്ങൾ മുൻനിർത്തി യൂറോപ്യൻ ഏവിയേഷൻ സേഫ്റ്റി ഏജൻസി (EASA) പുറപ്പെടുവിച്ച സുരക്ഷാ മുന്നറിയിപ്പ് നവംബർ 16 വരെ നീട്ടിയിട്ടുണ്ട്. ഗൾഫ് വ്യോമപാതകളിൽ ഏർപ്പെടുത്തിയിട്ടുള്ള നിയന്ത്രണങ്ങൾ കാരണം വിമാനങ്ങൾക്ക് കൂടുതൽ ദൂരം ചുറ്റിപ്പറക്കേണ്ടി വരുന്നതും, അധിക ഇന്ധനം നിറയ്ക്കാനുള്ള സാങ്കേതിക സ്റ്റോപ്പുകളും ഷെഡ്യൂളുകളെ ബാധിക്കുന്നുണ്ട്.

ദുബായ് വിമാനത്താവളത്തിൽ നിന്ന് ചൊവ്വാഴ്ച രാവിലെ തെൽ അവീവിലേക്കുള്ള നാല് ഇസ്രായേർ സർവീസുകൾ പൂർണമായി റദ്ദാക്കി. തായ്പേയ്, ബാങ്കോക്ക്, ജിദ്ദ എന്നിവിടങ്ങളിലേക്കുള്ള എമിറേറ്റ്സിന്റെ ചില സർവീസുകളും, ബെയ്റൂട്ട്, എർബിൽ എന്നിവിടങ്ങളിലേക്കുള്ള ഫ്ലൈദുബായ് വിമാനങ്ങളും പുറപ്പെട്ടില്ല. ഇന്ത്യയിലേക്കുള്ള സർവീസുകളിൽ സ്പൈസ്ജെറ്റിന്റെ ദുബായ്-കൊച്ചി (SG5117) വിമാനം റദ്ദാക്കി; ഡൽഹി, മുംബൈ, കൊച്ചി സെക്ടറുകളിലെ മറ്റ് സർവീസുകൾ വൈകിയാണ് സർവീസ് നടത്തുന്നത്.

അബുദാബിയിൽ നിന്ന് കുവൈത്തിലേക്കും റിയാദിലേക്കുമുള്ള ഇത്തിഹാദ് സർവീസുകൾ വൈകി. തിങ്കളാഴ്ച റിയാദിൽ നിന്ന് അബുദാബിയിലേക്ക് പുറപ്പെടേണ്ടിയിരുന്ന വിമാനം സാങ്കേതിക തടസ്സത്തെത്തുടർന്ന് പുറപ്പെടാനാകാതെ വരികയും, ജീവനക്കാരുടെ ഡ്യൂട്ടി സമയം പരിധി പിന്നിട്ടതിനാൽ റദ്ദാക്കുകയുമുണ്ടായി. മോശം കാലാവസ്ഥ കാരണം കഴിഞ്ഞ ദിവസം അബുദാബിയിൽ നിന്ന് കോഴിക്കോട്ടേക്ക് പോയ ഇത്തിഹാദ് വിമാനം തിരുവനന്തപുരത്തേക്ക് വഴിതിരിച്ചുവിട്ടിരുന്നു.

ഷാർജയിൽ നിന്നുള്ള എയർ അറേബ്യയുടെ കുവൈത്ത്, ബഹ്റൈൻ സർവീസുകളിലും ഭാഗിക തടസ്സങ്ങൾ നേരിട്ടു.

അതേസമയം, ചില അന്താരാഷ്ട്ര എയർലൈനുകൾ യുഎഇയിലേക്കുള്ള സർവീസുകൾ പുനരാരംഭിക്കാൻ തുടങ്ങിയിട്ടുണ്ട്:

• സർവീസ് തുടങ്ങിയവ: എയർ അസ്താന ദുബായിലേക്കുള്ള സർവീസുകൾ പുനരാരംഭിച്ചു. ഫിലിപ്പൈൻ എയർലൈൻസ് മനില–ദുബായ് സെക്ടറിലെ ബുക്കിങ് ഒക്ടോബർ 5 മുതൽ തുറന്നു നൽകി. ലുഫ്താൻസ ഗ്രൂപ്പ് ഒക്ടോബർ അവസാനത്തോടെ മ്യൂണിക്ക്, ഫ്രാങ്ക്ഫർട്ട്, സൂറിച്ച് എന്നിവിടങ്ങളിൽ നിന്ന് ദുബായിലേക്ക് ഘട്ടംഘട്ടമായി സർവീസുകൾ തുടങ്ങും.
• റദ്ദാക്കൽ തുടരുന്നവ: എയർ ഫ്രാൻസ് ഒക്ടോബർ 24 വരെയും, സിംഗപ്പൂർ എയർലൈൻസ് ഡിസംബർ 1 വരെയും ദുബായ് സർവീസുകൾ താൽക്കാലികമായി നിർത്തിവെച്ചു. കാഥെ പസിഫിക് 2027 ജനുവരി 31 വരെ സർവീസുകൾ റദ്ദാക്കിയിട്ടുണ്ട്. ബ്രിട്ടീഷ് എയർവേസ് നവംബർ 3-ന് ദുബായിലേക്ക് പറക്കൽ തുടങ്ങുമെങ്കിലും അബുദാബി സർവീസുകൾ ദീർഘകാലത്തേക്ക് നിർത്തിവെച്ചു.

യുഎഇ യാത്രയുമായി ബന്ധപ്പെട്ട് വിവിധ രാജ്യങ്ങൾ മാർഗനിർദേശങ്ങൾ പുതുക്കി നൽകിയിട്ടുണ്ട്. അത്യാവശ്യമല്ലാത്ത യാത്രകൾ ഒഴിവാക്കണമെന്ന നിർദേശം യുകെ പിൻവലിച്ചെങ്കിലും, വിമാന സർവീസുകളിലെ അനിശ്ചിതത്വം നിലനിൽക്കുന്നതായി മുന്നറിയിപ്പുണ്ട്.

വിമാനത്താവളങ്ങളിലേക്ക് പുറപ്പെടുന്നവർ കുറഞ്ഞത് മൂന്ന് മണിക്കൂർ മുൻപെങ്കിലും എത്തണമെന്ന് എയർലൈനുകൾ ഓർമിപ്പിച്ചു. ദുബായിൽ നിന്ന് ഫ്ലൈദുബായ് വഴി യാത്ര ചെയ്യുന്നവർ നാല് മണിക്കൂർ മുൻപ് ടെർമിനലിൽ റിപ്പോർട്ട് ചെയ്യണം. തത്സമയ വിവരങ്ങൾ അറിയാൻ എയർലൈൻ ആപ്പുകളോ ഔദ്യോഗിക വെബ്സൈറ്റുകളോ പരിശോധിക്കേണ്ടതാണ്.