അബുദാബിയിൽ നടക്കുന്ന ‘എഐ എവരിതിങ്’ ഉച്ചകോടിയിൽ പുതിയ ഏജന്റിക് എഐ, ബിഗ് ഡാറ്റ പ്ലാറ്റ്‌ഫോമുകൾ അവതരിപ്പിച്ച് കമ്പനി.
അബുദാബി, ഒക്ടോബർ 7, 2026:ആഗോള നിർമിതബുദ്ധി (എഐ) രംഗത്തെ മുൻനിര കേന്ദ്രമായി യുഎഇയെ മാറ്റിയെടുക്കുന്നതിൽ രാജ്യത്തിനകത്ത് വികസിപ്പിച്ചെടുക്കുന്ന തദ്ദേശീയ സാങ്കേതികവിദ്യകൾ നിർണായക പങ്കുവഹിക്കുമെന്ന് സാൽ.എഐ ചീഫ് എക്സിക്യൂട്ടീവ് ഓഫീസർ വിക്രമൻ പൊതുവാൾ വ്യക്തമാക്കി.
ആഗോള നിർമിതബുദ്ധി (എഐ) രംഗത്തെ മുൻനിര കേന്ദ്രമായി യുഎഇയെ മാറ്റിയെടുക്കുന്നതിൽ രാജ്യത്തിനകത്ത് വികസിപ്പിച്ചെടുക്കുന്ന തദ്ദേശീയ സാങ്കേതികവിദ്യകൾ നിർണായക പങ്കുവഹിക്കുമെന്ന് സാൽ.എഐ ചീഫ് എക്സിക്യൂട്ടീവ് ഓഫീസർ വിക്രമൻ പൊതുവാൾ വ്യക്തമാക്കി.
തലസ്ഥാനത്ത് പുരോഗമിക്കുന്ന ‘എഐ എവരിതിങ് അബുദാബി 2026’ രാജ്യാന്തര സാങ്കേതിക ഉച്ചകോടിയുടെ ഭാഗമായി സംസാരിക്കുകയായിരുന്നു അദ്ദേഹം. രാജ്യത്തെ ടെക്നോളജി ആവാസവ്യവസ്ഥ അതിവേഗം വളരുകയാണെന്നും ഈ മുന്നേറ്റത്തിന് ആക്കം കൂട്ടാൻ യുഎഇയിൽ തന്നെ രൂപകൽപ്പന ചെയ്ത ആധുനിക ഡിജിറ്റൽ സംവിധാനങ്ങൾ കൂടുതൽ കരുത്തേകുമെന്നും അദ്ദേഹം എമിറേറ്റ്സ് ന്യൂസ് ഏജൻസിയോട് (വാം) പറഞ്ഞു.
അബുദാബി ആസ്ഥാനമായി പ്രവർത്തിക്കുന്ന പ്രമുഖ ആർട്ടിഫിഷ്യൽ ഇന്റലിജൻസ്, ബിഗ് ഡാറ്റാ ഉത്പന്ന നിർമാണ കമ്പനിയായ സാൽ.എഐ, പൂർണമായും യുഎഇയിൽ തയ്യാറാക്കിയ രണ്ട് മുൻനിര സംവിധാനങ്ങളാണ് ഉച്ചകോടിയിൽ പ്രദർശിപ്പിച്ചത്. ഉപഭോക്താക്കളുടെ ബിസിനസ് ഡാറ്റ ചിട്ടപ്പെടുത്തി വിശകലനത്തിന് സജ്ജമാക്കുന്ന ബിഗ് ഡാറ്റ പ്ലാറ്റ്‌ഫോമും, സങ്കീർണമായ വാണിജ്യ പ്രവർത്തനങ്ങൾ സ്വയം നിർവഹിക്കാൻ ശേഷിയുള്ള ‘ഏജന്റിക് എഐ’ അധിഷ്ഠിത പ്ലാറ്റ്‌ഫോമുമാണ് കമ്പനി വിപണിയിലെത്തിച്ചിരിക്കുന്നത്.
തദ്ദേശീയ പ്രതിഭകളെ കണ്ടെത്തി ശാക്തീകരിക്കുന്നതിലൂടെ മാത്രമേ രാജ്യം നേരിടുന്ന സാങ്കേതിക ആവശ്യങ്ങൾക്ക് ശാശ്വത പരിഹാരം കാണാൻ സാധിക്കൂ എന്ന് വിക്രമൻ പൊതുവാൾ ചൂണ്ടിക്കാട്ടി. സ്വദേശി ഗവേഷണങ്ങളെയും നൂതനാശയങ്ങളെയും പിന്തുണയ്ക്കുന്നത് വഴി യുഎഇയുടെ സ്വാശ്രയ ടെക്നോളജി വികസനത്തിന് അടിത്തറ പാകാനാകും.
വിവിധ മേഖലകളിൽ നിന്നുള്ള സംരംഭകരുമായും ഉപഭോക്താക്കളുമായും നേരിട്ട് ആശയവിനിമയം നടത്താനും പ്രാദേശിക സാങ്കേതിക പരീക്ഷണങ്ങൾ വ്യാവസായിക തലത്തിൽ അവതരിപ്പിക്കാനും ‘എഐ എവരിതിങ്’ പോലുള്ള വേദികൾ മികച്ച അവസരമാണ് ഒരുക്കുന്നതെന്നും അദ്ദേഹം കൂട്ടിച്ചേർത്തു.
