കഴിഞ്ഞ ഒരുവർഷത്തെ കാരുണ്യ പ്രവർത്തനങ്ങൾ വിലയിരുത്തി; അബൂ ഹെയിലിൽ നടന്ന സംഗമം നാഷണൽ കെഎംസിസി ജനറൽ സെക്രട്ടറി പി.കെ. അൻവർ നഹ ഉദ്ഘാടനം ചെയ്തു.
ദുബായ്: കഴിഞ്ഞ ഒരുവർഷത്തെ ജീവകാരുണ്യ ഇടപെടലുകൾ അവലോകനം ചെയ്തും സംഘടനാ ശാക്തീകരണം ലക്ഷ്യമിട്ടും ദുബായ് കെഎംസിസി തിരൂരങ്ങാടി മണ്ഡലം കമ്മിറ്റി വർക്കിങ് കമ്മിറ്റി യോഗം ചേർന്നു. പുതിയ ഭാരവാഹികൾക്കുള്ള സ്വീകരണവും ചടങ്ങിൽ നടന്നു.
പ്രവാസലോകത്തും നാട്ടിലും ദുബായ് കെഎംസിസി തിരൂരങ്ങാടി മണ്ഡലം കമ്മിറ്റി നടത്തിയ ജീവകാരുണ്യ പ്രവർത്തനങ്ങൾ വിലയിരുത്തുന്നതിനും പുതിയ ഭാരവാഹികളെ ആദരിക്കുന്നതിനുമായി അബൂ ഹെയിലിലെ ബാബ് അൽ സലാം റസ്റ്റോറന്റിൽ മണ്ഡലം വർക്കിങ് കമ്മിറ്റി യോഗം സംഘടിപ്പിച്ചു.
നാട്ടിലും ഗൾഫിലുമുള്ള സാധാരണക്കാരായ പ്രവാസികൾക്കായി നടപ്പിലാക്കിയ ചികിത്സാ സഹായങ്ങൾ, പുനരധിവാസ പദ്ധതികൾ, അടിയന്തര ഇടപെടലുകൾ എന്നിവ യോഗം സമഗ്രമായി ചർച്ച ചെയ്തു. കഴിഞ്ഞ ഒരുവർഷത്തെ പ്രവർത്തനങ്ങൾ ഉൾക്കൊള്ളിച്ചുള്ള വാർഷിക റിപ്പോർട്ട് മണ്ഡലം ജനറൽ സെക്രട്ടറി പി.കെ. ജബ്ബാർ അവതരിപ്പിച്ചു.
മണ്ഡലം പ്രസിഡന്റ് വി.സി. സൈദലവി ഉള്ളണത്തിന്റെ അധ്യക്ഷതയിൽ ചേർന്ന യോഗം നാഷണൽ കെഎംസിസി ജനറൽ സെക്രട്ടറി പി.കെ. അൻവർ നഹ ഉദ്ഘാടനം ചെയ്തു. പ്രവാസികളുടെ സാമൂഹിക സുരക്ഷയും സംഘടനാപരമായ ഐക്യവും മുൻനിർത്തി ദുബായ് കെഎംസിസി സെക്രട്ടറി അബ്ദുൽ ഖാദർ അരിപ്രാമ്പ്ര മുഖ്യപ്രഭാഷണം നടത്തി.
ദുബായ് കെഎംസിസി മലപ്പുറം ജില്ലാ വൈസ് പ്രസിഡന്റായി തിരഞ്ഞെടുക്കപ്പെട്ട ഫൈസൽ തെന്നല, തിരൂരങ്ങാടി മണ്ഡലം കമ്മിറ്റി സെക്രട്ടറിമാരായി ചുമതലയേറ്റ സാബിത് തെന്നല, താഷിബ് പരപ്പനങ്ങാടി എന്നിവർക്ക് ചടങ്ങിൽ പ്രത്യേക സ്വീകരണം നൽകി.
ദുബായ് കെഎംസിസി സംസ്ഥാന വൈസ് പ്രസിഡന്റ് കെ.പി.എ. സലാം, സെക്രട്ടറി പി.വി. നാസർ, മലപ്പുറം ജില്ലാ പ്രസിഡന്റ് സിദ്ധീഖ് കാലടി, ജില്ലാ ജനറൽ സെക്രട്ടറി എ.പി. നൗഫൽ എന്നിവർ സംബന്ധിച്ചു. ജില്ലാ ഭാരവാഹികളായ മുജീബ് കോട്ടക്കൽ, ഒ.ടി. സലാം, ടി.പി. സൈദലവി, ഹംസ ഹാജി മാട്ടുമ്മൽ, ഫൈസൽ തെന്നല എന്നിവർ ആശംസകൾ നേർന്നു സംസാരിച്ചു.
സെക്രട്ടറി സാലി സ്വാഗതവും സ്വീകരണത്തിന് നന്ദി അറിയിച്ചുകൊണ്ട് സാബിത് തെന്നല കൃതജ്ഞതയും രേഖപ്പെടുത്തി.
