ദുബായ്: അറബ് ലോകത്തെ മാനുഷിക പ്രവർത്തനങ്ങൾക്കും സാമൂഹിക മുന്നേറ്റങ്ങൾക്കും പ്രോത്സാഹനം നൽകുന്നതിനായി സംഘടിപ്പിക്കുന്ന ‘മെയ്ക്കേഴ്‌സ് ഓഫ് ഹോപ്പ്’ പുരസ്‌കാരത്തിന്റെ ഏഴാമത് പതിപ്പിലേക്ക് നാമനിർദേശങ്ങൾ ക്ഷണിച്ചു. യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽ മക്തൂമാണ് 2026-ലെ പുരസ്‌കാരത്തിനായുള്ള പ്രഖ്യാപനം നടത്തിയത്.
മാനുഷിക സേവനങ്ങൾക്കായി ജീവിതം സമർപ്പിച്ച വ്യക്തികളെയും സമൂഹത്തിൽ പ്രതീക്ഷയും പോസിറ്റീവായ മാറ്റങ്ങളും സൃഷ്ടിക്കുന്നവരെയും ആദരിക്കുകയാണ് പദ്ധതിയുടെ ലക്ഷ്യം.
മാനുഷിക സമൂഹങ്ങളുടെയും ഭാവിയുടെയും ഏറ്റവും വിലപ്പെട്ട നിക്ഷേപമാണ് പ്രതീക്ഷയുടെ സൃഷ്ടിയെന്ന് ശൈഖ് മുഹമ്മദ് ബിൻ റാഷിദ് വ്യക്തമാക്കി. നന്മയ്ക്കും സഹകരണത്തിനും പ്രാധാന്യം നൽകുന്ന യുഎഇ, മേഖലയിലും ലോകത്തും പോസിറ്റീവായ മാറ്റങ്ങൾ സൃഷ്ടിക്കുന്നതിനുള്ള പ്രചോദനമായി തുടരുമെന്നും അദ്ദേഹം പറഞ്ഞു.
നാമനിർദേശങ്ങൾ ഓൺലൈനായി
ഔദ്യോഗിക വെബ്സൈറ്റായ arabhopemakers.com വഴി ഏഴാമത് പതിപ്പിലേക്കുള്ള നാമനിർദേശങ്ങൾ സമർപ്പിക്കാം.
‘മെയ്ക്കേഴ്‌സ് ഓഫ് ഹോപ്പ്’ പുരസ്‌കാര ജേതാവിന് ഒരു മില്യൺ ദിർഹമാണ് സമ്മാനമായി ലഭിക്കുക. മാനുഷിക സേവനങ്ങൾക്കും സമൂഹത്തിന് നൽകുന്ന വിലപ്പെട്ട സംഭാവനകൾക്കുമുള്ള അംഗീകാരമായാണ് ഈ പുരസ്‌കാരം നൽകുന്നത്.
അറബ് ലോകത്തിന്റെ വിവിധ ഭാഗങ്ങളിൽ നിന്നുള്ള ആയിരക്കണക്കിന് പ്രതീക്ഷയുടെ കഥകൾ കണ്ടെത്തുകയും അവയെ ലോകത്തിന് മുന്നിലെത്തിക്കുകയും ചെയ്യുന്നതാണ് ഈ സംരംഭത്തിന്റെ പ്രധാന ലക്ഷ്യം.
