കനേഡിയൻ യൂണിവേഴ്സിറ്റി വിദ്യാർഥികൾ വികസിപ്പിച്ച അഞ്ച് സ്മാർട്ട് എഐ പ്രോട്ടോടൈപ്പുകൾ പരീക്ഷണത്തിന്
ദുബായ്, ഒക്ടോബർ 20, 2026 : ദുബായിലെ റോഡുകളിലെ ഗതാഗതക്കുരുക്ക് ലഘൂകരിക്കുന്നതിനും ട്രാഫിക് സിഗ്നൽ സംവിധാനങ്ങൾ കൂടുതൽ കാര്യക്ഷമമാക്കുന്നതിനുമായി നിർമ്മിത ബുദ്ധി (എഐ) അധിഷ്ഠിത പരിഹാരങ്ങളുമായി ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റി (ആർടിഎ).
ആഗോള ആർട്ടിഫിഷ്യൽ ഇന്റലിജൻസ് കമ്പനിയായ മിസ്ട്രൽ എഐ (Mistral AI), കനേഡിയൻ യൂണിവേഴ്സിറ്റി ദുബായ് എന്നിവയുമായി സഹകരിച്ച് ആർടിഎ ആസ്ഥാനത്തെ ഫോർത്ത് ഇൻഡസ്ട്രിയൽ റെവല്യൂഷൻ ലാബിലാണ് നാല് ദിവസത്തെ ‘സ്മാർട്ട് മൊബിലിറ്റി ഇന്നൊവേഷൻ ചലഞ്ച്’ സംഘടിപ്പിച്ചത്.
ആർടിഎയുടെ കോർപ്പറേറ്റ് ടെക്നോളജി സപ്പോർട്ട് സർവീസസ് വിഭാഗത്തിന് കീഴിലുള്ള എമർജിംഗ് ആൻഡ് ഇന്നൊവേറ്റീവ് ടെക്നോളജീസ് വിഭാഗമാണ് പരിപാടി ഏകോപിപ്പിച്ചത്. കനേഡിയൻ യൂണിവേഴ്സിറ്റി ദുബായിൽ നിന്നുള്ള അഞ്ച് മൾട്ടിഡിസിപ്ലിനറി വിദ്യാർത്ഥി സംഘങ്ങളാണ് മത്സരത്തിൽ മാറ്റുരച്ചത്.
നാല് ദിവസങ്ങളിലായി നടന്ന തീവ്ര പരിശീലനത്തിലും പ്രൊജക്റ്റ് നിർമ്മാണത്തിലും മിസ്ട്രൽ എഐയുടെ അത്യാധുനിക എഐ ടൂളുകളും സാങ്കേതിക പ്ലാറ്റ്‌ഫോമുകളുമാണ് വിദ്യാർത്ഥികൾ പ്രയോജനപ്പെടുത്തിയത്. ആർടിഎയിലെ സാങ്കേതിക വിദഗ്ധരുടെ മേൽനോട്ടത്തിൽ ഗതാഗത വിവരങ്ങൾ വിശകലനം ചെയ്ത വിദ്യാർത്ഥികൾ അഞ്ച് പ്രവർത്തനക്ഷമമായ പ്രോട്ടോടൈപ്പുകൾ വികസിപ്പിച്ചെടുത്തു.
പ്രധാനമായും അഞ്ച് മേഖലകളിലാണ് പദ്ധതികൾ ശ്രദ്ധ കേന്ദ്രീകരിച്ചത്:
- റോഡുകളിലെ വാഹനപ്പെരുപ്പത്തിന് അനുസൃതമായി ട്രാഫിക് സിഗ്നലുകൾ സ്വയം ക്രമീകരിക്കൽ
- റോഡുകളിൽ ബ്ലോക്ക് ഉണ്ടാകാൻ സാധ്യതയുള്ള ഇടങ്ങൾ മുൻകൂട്ടി പ്രവചിക്കൽ
- വാഹനങ്ങളുടെ സഞ്ചാര വേഗതയും തടസ്സങ്ങളും തത്സമയം വിശകലനം ചെയ്യൽ
- അടുത്തടുത്തുള്ള ജംഗ്ഷനുകളെ ഒരേസമയം പരസ്പരം ബന്ധിപ്പിച്ചു കൊണ്ടുള്ള സിഗ്നൽ ഏകോപനം
- കൺട്രോൾ റൂമുകളിലെ ഉദ്യോഗസ്ഥർക്ക് വേഗത്തിൽ ശരിയായ തീരുമാനങ്ങളെടുക്കാൻ സഹായിക്കുന്ന എഐ സംവിധാനം
വിദ്യാർത്ഥികൾ അവതരിപ്പിച്ച ഈ സാങ്കേതിക ആശയങ്ങൾ വിദഗ്ദ്ധ സമിതി വിലയിരുത്തി. ഇവയിൽ മികച്ച പ്രൊജക്റ്റുകൾ കൂടുതൽ പരീക്ഷണങ്ങൾക്കും വികസനത്തിനുമായി ആർടിഎ ലാബുകളിൽ ഉപയോഗിക്കും. വിജയകരമെന്ന് കണ്ടെത്തുന്നവ ഭാവിയിൽ ദുബായിലെ റോഡ് ശൃംഖലയിൽ പ്രായോഗികമായി നടപ്പിലാക്കാനും ആലോചനയുണ്ട്.
സർക്കാർ സംവിധാനങ്ങളും പ്രമുഖ എഐ കമ്പനികളും വിദ്യാഭ്യാസ സ്ഥാപനങ്ങളും ഒരുമിക്കുന്ന ഇത്തരം സംരംഭങ്ങൾ വഴി ഭാവി സാങ്കേതിക തലമുറയെ വളർത്തിയെടുക്കാനും നഗര ഗതാഗതം കൂടുതൽ സുഗമമാക്കാനും സാധിക്കുമെന്ന് ആർടിഎ വ്യക്തമാക്കി.
