ഷാർജ: ഷാർജ സർക്കാർ ജീവനക്കാർക്കും അവരുടെ കുടുംബാംഗങ്ങൾക്കും കുറഞ്ഞ നിരക്കിൽ മികച്ച സ്വകാര്യ ആരോഗ്യപരിചരണ സേവനങ്ങൾ ലഭ്യമാക്കുന്നതിനായി ഷാർജ ഹെൽത്ത് അതോറിറ്റിയും (SHA) ആസ്റ്റർ ഡിഎം ഹെൽത്ത്‌കെയറിന്റെ പ്രീമിയം ആരോഗ്യപരിചരണ ബ്രാൻഡായ മെഡ്‌കെയർ ഹോസ്പിറ്റൽസ് ആൻഡ് മെഡിക്കൽ സെന്റേഴ്‌സും തന്ത്രപ്രധാന പങ്കാളിത്തത്തിന് തുടക്കമിട്ടു.
ഇതിന്റെ ഭാഗമായി ആരോഗ്യ ഇൻഷുറൻസ് പരിരക്ഷ ഇല്ലാത്തവർക്കും ഉൾപ്പെടെ വിവിധ വിഭാഗങ്ങൾക്ക് പ്രത്യേക ഇളവുകളും ആരോഗ്യസേവനങ്ങളിൽ കൂടുതൽ സൗകര്യങ്ങളും ലഭിക്കും. ഷാർജ സർക്കാർ ജീവനക്കാരുടെയും കുടുംബങ്ങളുടെയും ആരോഗ്യവും ക്ഷേമവും മെച്ചപ്പെടുത്തുക എന്ന ലക്ഷ്യത്തോടെയാണ് പുതിയ പദ്ധതി.
65 വയസ്സിന് മുകളിലുള്ളവർക്കും ഭിന്നശേഷിക്കാർക്കും പ്രത്യേക പരിഗണന
65 വയസ്സും അതിൽ കൂടുതലും പ്രായമുള്ള മുതിർന്ന സർക്കാർ ജീവനക്കാർക്കും അവരുടെ കുടുംബാംഗങ്ങൾക്കും, ഭിന്നശേഷിക്കാർക്കും പ്രത്യേക ആരോഗ്യ ആനുകൂല്യങ്ങൾ ലഭ്യമാക്കും. ഇൻഷുറൻസ് ഇല്ലാത്ത ഭിന്നശേഷിക്കാർ ഉൾപ്പെടെയുള്ള അർഹരായ വിഭാഗങ്ങൾക്കും ഇളവുകളോടെ സ്വകാര്യ ആരോഗ്യപരിചരണ സേവനങ്ങൾ പ്രയോജനപ്പെടുത്താം.
ഡോക്ടറുടെ ഭവന സന്ദർശനം, വീട്ടിലെ ഫിസിയോതെറാപ്പി, ഹ്രസ്വകാല നഴ്‌സിങ് പരിചരണം, മുറിവുകളുടെ ചികിത്സ, കുത്തിവയ്പ്പുകൾ, പ്രത്യേക ഐവി തെറാപ്പി ചികിത്സകൾ തുടങ്ങിയ ഹോം ഹെൽത്ത്‌കെയർ സേവനങ്ങളും പദ്ധതിയിൽ ഉൾപ്പെടുന്നു.
ഷാർജയിലെ നാല് മെഡ്‌കെയർ കേന്ദ്രങ്ങളിൽ സേവനം
പദ്ധതിയുടെ ആനുകൂല്യങ്ങൾ ഷാർജയിലെ മെഡ്‌കെയറിന്റെ നാല് സ്ഥാപനങ്ങളിൽ ലഭ്യമാകും.
- മെഡ്‌കെയർ ഹോസ്പിറ്റൽ – കിങ് ഫൈസൽ റോഡ്
- മെഡ്‌കെയർ ഹോസ്പിറ്റൽ – ഷെയ്ഖ് സഖർ അൽ ഖാസിമി സ്ട്രീറ്റ്
- മെഡ്‌കെയർ മെഡിക്കൽ സെന്റർ – അൽ താവൂൻ
- മെഡ്‌കെയർ മെഡിക്കൽ സെന്റർ – അൽ സഹിയ
വിവിധ മെഡിക്കൽ സേവനങ്ങൾക്ക് ഇളവുള്ള നിരക്കുകൾ ലഭ്യമാക്കുന്നതിലൂടെ സ്വകാര്യ ആരോഗ്യപരിചരണം സാമ്പത്തികമായി കൂടുതൽ പ്രാപ്യമാക്കുകയാണ് പങ്കാളിത്തത്തിന്റെ ലക്ഷ്യം.
ഷാർജ ഹെൽത്ത് അതോറിറ്റി ചെയർമാൻ ഡോ. അബ്ദുൽ അസീസ് സഈദ് അൽ മുഹൈരി പറഞ്ഞു: ഷാർജ സർക്കാർ ജീവനക്കാർക്ക് മികച്ചതും നൂതനവുമായ ആരോഗ്യപരിചരണ സൗകര്യങ്ങൾ അധിക ആനുകൂല്യങ്ങളോടെ ലഭ്യമാക്കാൻ മെഡ്‌കെയറുമായി സഹകരിക്കുന്നതിൽ സന്തോഷമുണ്ട്. ജീവനക്കാരുടെ ആരോഗ്യ ആനുകൂല്യങ്ങൾ മെച്ചപ്പെടുത്താനുള്ള അതോറിറ്റിയുടെ തന്ത്രത്തിന്റെ ഭാഗമാണിത്. പ്രത്യേകിച്ച് മുതിർന്ന ജീവനക്കാർക്ക് കൂടുതൽ ആനുകൂല്യങ്ങൾ ഉറപ്പാക്കുന്നതിന് സുപ്രീം കൗൺസിൽ അംഗവും ഷാർജ ഭരണാധികാരിയുമായ ശൈഖ് ഡോ. സുൽത്താൻ ബിൻ മുഹമ്മദ് അൽ ഖാസിമിയുടെ നിർദേശങ്ങൾക്കനുസരിച്ച് പ്രവർത്തിക്കുമെന്നും അദ്ദേഹം വ്യക്തമാക്കി.
ആസ്റ്റർ ഡിഎം ഹെൽത്ത്‌കെയർ മാനേജിങ് ഡയറക്ടറും ഗ്രൂപ്പ് സിഇഒയുമായ അലീഷ മൂപ്പൻ പറഞ്ഞു: യുഎഇയിലെ ആസ്റ്റർ ഗ്രൂപ്പിന്റെ വളർച്ചയിൽ ഷാർജയ്ക്ക് നിർണായക സ്ഥാനമുണ്ട്. ഷാർജ ഹെൽത്ത് അതോറിറ്റിയുമായുള്ള സഹകരണം കൂടുതൽ ശക്തിപ്പെടുത്തുന്നതിൽ അഭിമാനമുണ്ട്. മെഡ്‌കെയറിന്റെ ആശുപത്രികളുടെയും ക്ലിനിക്കുകളുടെയും ശൃംഖലയിലൂടെ സർക്കാർ ജീവനക്കാർക്ക് ഗുണമേന്മയുള്ളതും രോഗികേന്ദ്രീകൃതവുമായ ആരോഗ്യപരിചരണം ലഭ്യമാക്കുകയാണ് ലക്ഷ്യമെന്നും അവർ പറഞ്ഞു.
മെഡ്‌കെയർ ഹോസ്പിറ്റൽസ് ആൻഡ് മെഡിക്കൽ സെന്റേഴ്‌സ് സിഇഒ ഡോ. ഷനീല ലൈജുവും പങ്കാളിത്തത്തെ സ്വാഗതം ചെയ്തു. ഗുണമേന്മയുള്ള ആരോഗ്യസേവനങ്ങളിലേക്കുള്ള പ്രവേശനം മെച്ചപ്പെടുത്തുന്നതിനും എല്ലാവരെയും ഉൾക്കൊള്ളുന്ന ആരോഗ്യപരിചരണ സംവിധാനം ശക്തിപ്പെടുത്തുന്നതിനും ഇത്തരം സഹകരണങ്ങൾ നിർണായകമാണെന്ന് അവർ പറഞ്ഞു.
പൊതുമേഖലയുടെയും സ്വകാര്യ ആരോഗ്യരംഗത്തിന്റെയും വൈദഗ്ധ്യം സംയോജിപ്പിച്ചുള്ള ഈ പങ്കാളിത്തം ഷാർജയിലെ ആരോഗ്യപരിചരണ സേവനങ്ങൾ കൂടുതൽ ജനകീയമാക്കുന്നതിനും മുതിർന്നവരും ഭിന്നശേഷിക്കാരും ഉൾപ്പെടെയുള്ള വിഭാഗങ്ങൾക്ക് മെച്ചപ്പെട്ട ചികിത്സാ സൗകര്യങ്ങൾ ഉറപ്പാക്കുന്നതിനും സഹായിക്കുമെന്നാണ് പ്രതീക്ഷ.
