ഷാർജ രാജ്യാന്തര പുസ്തകമേളയിൽ വിവർത്തന കലയെക്കുറിച്ചും ഭാഷാ അധീശത്വത്തെക്കുറിച്ചും മനസ്സ് തുറന്ന് അന്താരാഷ്ട്ര ബുക്കർ പുരസ്‌കാര ജേതാവ്.
ഷാർജ, യു.എ.ഇ — കൃതികൾ മറ്റൊരു ഭാഷയിലേക്ക് പരിഭാഷപ്പെടുത്തുമ്പോൾ വിവർത്തകർ വാക്കുകൾ പകർത്തുന്നവർ മാത്രമല്ലെന്നും വ്യാഖ്യാതാക്കളും പുനരാവിഷ്കർത്താക്കളുമായി മാറുന്നുണ്ടെന്നും അന്താരാഷ്ട്ര ബുക്കർ പുരസ്‌കാര ജേതാവും പ്രമുഖ യു.എസ് എഴുത്തുകാരിയുമായ ഡെയ്സി റോക്ക്‌വെൽ. 45-ാമത് ഷാർജ രാജ്യാന്തര പുസ്തകമേളയിലെ ഫോറം 3-ൽ നടന്ന “ഭാഷകൾക്കപ്പുറം: സാഹിത്യ വിവർത്തന കലയെക്കുറിച്ച് ഡെയ്സി റോക്ക്‌വെൽ” എന്ന സംവാദത്തിൽ സംസാരിക്കുകയായിരുന്നു അവർ.
വിവർത്തകർ കൃതികളിൽ അദൃശ്യ സാന്നിധ്യമായി ഒതുങ്ങുന്നുവെന്ന ധാരണ തികച്ചും തെറ്റാണെന്ന് റോക്ക്‌വെൽ ചൂണ്ടിക്കാട്ടി. മറ്റൊരു എഴുത്തുകാരൻ കണ്ട ലോകത്തെ സ്വന്തം ശൈലിയിൽ പുനർനിർമ്മിക്കുകയാണ് വിവർത്തകർ ചെയ്യുന്നത്. അതിനാൽ നിഘണ്ടുവിലെ ഭാഷാജ്ഞാനത്തേക്കാൾ കാര്യങ്ങൾ മനസ്സിൽ കാണാനും സങ്കൽപ്പിക്കാനുമുള്ള (‘വിഷ്വലൈസ്’) കഴിവാണ് ഈ രംഗത്ത് ഏറ്റവും പ്രധാനം.
മൂലകൃതിയുടെ രചയിതാവിനെ നേരിട്ടറിയുന്നതും അവരുമായി ആശയവിനിമയം നടത്തുന്നതും പരിഭാഷയെ മികച്ചതാക്കാൻ സഹായിക്കുമെന്ന് ഡെയ്സി വ്യക്തമാക്കി. പ്രശസ്ത ഇന്ത്യൻ എഴുത്തുകാരി കൃഷ്ണ സോബ്തിയുടെ ‘എ ഗുജറാത്ത് ഹിയർ എ ഗുജറാത്ത് ദെയർ’ എന്ന പുസ്തകം ഇംഗ്ലീഷിലേക്ക് വിവർത്തനം ചെയ്യുന്നതിന് മുൻപ് അവരുമായി അടുത്ത് ഇടപഴകാൻ കഴിഞ്ഞത് വലിയ തോതിൽ തുണച്ചതായി അവർ അനുസ്മരിച്ചു.
വിവർത്തനം ചെയ്യുന്നയാൾക്ക് സ്വന്തം ജോലിയിൽ ഒരിക്കലും പൂർണ്ണ തൃപ്തി തോന്നാറില്ലെന്നും, എഡിറ്ററുടെ സമയപരിധി കാരണമാണ് പലപ്പോഴും വിവർത്തനം പൂർത്തിയാക്കി നൽകുന്നതെന്നും അവർ പറഞ്ഞു. ബുക്കർ പുരസ്‌കാരം ലഭിച്ച ശേഷവും ഇന്ത്യയെക്കുറിച്ചുള്ള ചില പരാമർശങ്ങളിൽ ഇന്ത്യൻ വായനക്കാരിൽ നിന്ന് വിമർശനങ്ങൾ നേരിടേണ്ടി വന്നിട്ടുണ്ട്. അതിനാൽ ഇന്ത്യൻ കൃതികൾ പരിഭാഷപ്പെടുത്തുമ്പോൾ കൂടുതൽ ജാഗ്രത പുലർത്തുന്നുണ്ട്.
യൂറോപ്യൻ സാഹിത്യത്തെ അപേക്ഷിച്ച് ദക്ഷിണേഷ്യൻ രാജ്യങ്ങളിലെ, പ്രത്യേകിച്ച് ഇന്ത്യയിലെ സാഹിത്യം സാംസ്കാരിക-ഭാഷാ വൈവിധ്യങ്ങൾ കൊണ്ട് കൂടുതൽ ബഹുസ്വരത പുലർത്തുന്നതാണെന്ന് റോക്ക്‌വെൽ വിലയിരുത്തി. എഴുത്തുരംഗത്തേക്ക് കടന്നുവരുന്ന പുതുതലമുറ ദിവസവും എഴുത്തുപരിശീലനം നടത്തണമെന്നും തിരക്കുകൾക്കിടയിലും കുറഞ്ഞത് പതിനഞ്ച് മിനിറ്റെങ്കിലും ഇതിനായി നീക്കിവെക്കണമെന്നും അവർ നിർദ്ദേശിച്ചു.
തുടർന്ന് തന്റെ ‘ഇംഗ്ലീഷ് ഈസ് എ മോണോക്രോപ്പ്’ എന്ന കവിത ഡെയ്സി റോക്ക്‌വെൽ സദസ്സിൽ അവതരിപ്പിച്ചു. ചെറു വയലുകളെ തകർക്കുന്ന വിനാശകരമായ ‘ഏകവിള’ പോലെയാണ് ആഗോള ഭാഷയായ ഇംഗ്ലീഷ് പ്രാദേശിക ഭാഷകൾക്കുമേൽ ആധിപത്യം സ്ഥാപിക്കുന്നതെന്ന് കവിത വരച്ചുകാട്ടുന്നു. മാധ്യമപ്രവർത്തക അനാമിക ചാറ്റർജി പരിപാടിയിൽ മോഡറേറ്ററായി.
