ദുബായ്: പുസ്തകപ്രേമികൾ ആവേശത്തോടെ കാത്തിരിക്കുന്ന ലോകത്തിലെ ഏറ്റവും വലിയ സഞ്ചരിക്കുന്ന പുസ്തകമേള ‘ബിഗ് ബാഡ് വുൾഫ്’ (Big Bad Wolf Books) വീണ്ടും ദുബായിലെത്തുന്നു. വെറും രണ്ട് ദിർഹം മുതൽ ആരംഭിക്കുന്ന പുസ്തകങ്ങളുമായി ഫെബ്രുവരി 26 മുതൽ മാർച്ച് 8 വരെ ദുബായ് സ്റ്റുഡിയോ സിറ്റിയിലാണ് ഈ അക്ഷരോത്സവം നടക്കുന്നത്. ഷാർജ ബുക്ക് അതോറിറ്റി, ദുബായ് കൾച്ചർ ആൻഡ് ആർട്സ് അതോറിറ്റി എന്നിവയുടെ സഹകരണത്തോടെ ഒരുക്കുന്ന ഈ വിപുലമായ വിപണി വായനയെ സാധാരണക്കാരിലേക്ക് എത്തിക്കുക എന്ന വലിയ ലക്ഷ്യത്തോടെയാണ് ഇത്തവണയും വിരുന്നെത്തുന്നത്.
“ബിയോണ്ട് ദ നോയ്സ്” (Beyond the Noise) എന്ന പ്രമേയത്തിൽ അധിഷ്ഠിതമായ 2026-ലെ എഡിഷൻ, പരിശുദ്ധ റമദാൻ മാസത്തോടനുബന്ധിച്ചാണ് സംഘടിപ്പിക്കപ്പെടുന്നത്. വിവരങ്ങളുടെ കുത്തൊഴുക്കിനിടയിൽ വായനയെ ചിന്തിക്കാനും പുതിയ കാര്യങ്ങൾ ഗ്രഹിക്കാനുമുള്ള സുപ്രധാന മാർഗമായി കാണണമെന്നാണ് ഈ പ്രമേയം വിഭാവനം ചെയ്യുന്നത്. കുട്ടികളുടെ പുസ്തകങ്ങൾ, നോവലുകൾ, ശാസ്ത്രം, ചരിത്രം, സ്വയംവികസന ഗ്രന്ഥങ്ങൾ തുടങ്ങി ലക്ഷക്കണക്കിന് പുസ്തകങ്ങൾ 75 മുതൽ 95 ശതമാനം വരെ വിലക്കുറവിൽ മേളയിൽ ലഭ്യമാകുമെന്നത് വായനക്കാർക്ക് വലിയ ആശ്വാസമാണ്.
വായന കേവലം ഒരു ആഡംബരമല്ല, മറിച്ച് എല്ലാവരുടെയും അവകാശമാണെന്ന കാഴ്ചപ്പാടാണ് ബിഗ് ബാഡ് വുൾഫിനെ വ്യത്യസ്തമാക്കുന്നത്. പുസ്തകങ്ങൾ താങ്ങാനാവുന്ന വിലയിൽ ലഭ്യമാക്കുന്നതിലൂടെ സമൂഹത്തിലെ എല്ലാ വിഭാഗം ജനങ്ങളെയും അറിവിന്റെ ലോകത്തേക്ക് ആകർഷിക്കാൻ കഴിയുമെന്ന് ബിഗ് ബാഡ് വുൾഫ് സഹസ്ഥാപകൻ ആൻഡ്രൂ യാപ്പ് വ്യക്തമാക്കി. യുഎഇയുടെ സാംസ്കാരിക പാരമ്പര്യം ഉയർത്തിപ്പിടിക്കാനും പുതിയ തലമുറയിൽ വായനാശീലം വളർത്താനും ഇത്തരം സംരംഭങ്ങൾ വലിയ പങ്കുവഹിക്കുന്നുണ്ട്.
ഷാർജ ബുക്ക് അതോറിറ്റിയുമായുള്ള പങ്കാളിത്തം മേളയുടെ വ്യാപ്തി വർദ്ധിപ്പിക്കുകയും അറബി സാഹിത്യത്തിന് വലിയ പ്രാധാന്യം നൽകുകയും ചെയ്യുന്നു. കഴിഞ്ഞ വർഷങ്ങളിൽ ലഭിച്ച മികച്ച പ്രതികരണം കണക്കിലെടുത്ത് ഇത്തവണ കൂടുതൽ സൗകര്യങ്ങളും വിപുലമായ ശേഖരവുമാണ് സംഘാടകർ ഒരുക്കിയിരിക്കുന്നത്. ദുബായ് സ്റ്റുഡിയോ സിറ്റിയിലെ ‘സൗണ്ട് സ്റ്റേജിൽ’ വെച്ച് നടക്കുന്ന മേളയിലേക്ക് പ്രവേശനം തികച്ചും സൗജന്യമാണ്. രാവിലെ 10 മണി മുതൽ പുലർച്ചെ 2 മണി വരെ നീളുന്ന സമയക്രമം കുടുംബങ്ങൾക്കും വിദ്യാർത്ഥികൾക്കും ജോലി കഴിഞ്ഞെത്തുന്നവർക്കും ഒരുപോലെ പ്രയോജനകരമാകും.
