ദുബൈ: ഔഷധ നിർമ്മാണത്തിന് മുൻപുള്ള ഗവേഷണ ചെലവ് കുറയ്ക്കുന്നതിനായി യുഎഇ ‘ഇൻസിലിക്കോ മെഡിസിൻ’ എന്ന നിർമിതബുദ്ധി അടിസ്ഥാനമാക്കിയ നൂതന പദ്ധതിക്ക് തുടക്കമിട്ടു. ദുബൈയിൽ നടന്ന വേൾഡ് ഹെൽത്ത് എക്സ്പോ (ഡബ്ല്യുഎച്ച്എക്സ് 2026) യിലാണ് എമിറേറ്റ്സ് ഡ്രഗ് എസ്റ്റാബ്ലിഷ്മെന്റ് പദ്ധതി അവതരിപ്പിച്ചത്.
ഡിജിറ്റൽ മാതൃകകൾ ഉപയോഗിച്ച് മരുന്നുകളുടെ സംയുക്ത മൂല്യനിർണയ കൃത്യത വർധിപ്പിക്കുകയും ഗവേഷണ-വികസന പ്രക്രിയ വേഗത്തിലാക്കുകയും ചെയ്യുന്നതാണ് പദ്ധതിയുടെ ലക്ഷ്യം. ഇതിലൂടെ അനുബന്ധ ചെലവുകൾ കുറയുകയും രോഗികളിലേക്ക് പുതിയ ചികിത്സകൾ വേഗത്തിൽ എത്തിക്കുകയും ചെയ്യും.
ഈ മേഖലയിലെ സഹകരണം ശക്തിപ്പെടുത്തുന്നതിനായി എമിറേറ്റ്സ് ഡ്രഗ് എസ്റ്റാബ്ലിഷ്മെന്റും ഇൻസിലിക്കോ മെഡിസിൻ എ.ഐ ലിമിറ്റഡും തമ്മിൽ ധാരണാപത്രത്തിൽ ഒപ്പുവച്ചു. ഇ.ഡി.ഇ ഡയറക്ടർ ജനറൽ ഡോ. ഫാത്തിമ അൽ കാബിയും ഇൻസിലിക്കോ മെഡിസിൻ എ.ഐ ലിമിറ്റഡ് പ്രസിഡന്റ് ഡോ. അലക്സ അലിപറുമാൻയും കരാറിൽ ഒപ്പുവെച്ചു.
ജനറേറ്റീവ് ആർട്ടിഫിഷ്യൽ ഇന്റലിജൻസ്, ഡീപ്പ് ലേണിംഗ് സാങ്കേതികവിദ്യകൾ ഉപയോഗിച്ച് മരുന്നുകളുടെ ഫലപ്രാപ്തി മുൻകൂർ വിലയിരുത്താനാണ് പദ്ധതി ലക്ഷ്യമിടുന്നത്. ഇതിലൂടെ ഗവേഷണ-വികസന ചെലവ് കുറയ്ക്കുകയും ആരോഗ്യരംഗത്തെ ഡിജിറ്റൽ പരിവർത്തനം വേഗത്തിലാക്കുകയും ചെയ്യുമെന്ന് അധികൃതർ അറിയിച്ചു.
